ବିରିୟାନୀ କଥା ଉଠିଲେ ପାଟିରୁ ଲାଳ ଗଡିଆସେ। ପ୍ରାୟ ସମସ୍ତଙ୍କୁ ଭଲ ଲାଗେ ଏହାର ସ୍ବାଦ। ଭଲ ଓ ଫେମସ୍ ବିରିୟାନୀ ଖାଇବା ପାଇଁ ତ ଲୋକେ ଯେକୌଣସି ଜାଗାକୁ ଯିବାକୁ ପ୍ରସ୍ତୁତ ହୋଇଯାଆନ୍ତି। ତେବେ ଆମେ ଏଠାରେ ଏମିତି ଏକ ବିରିୟାନୀ କଥା କହିବାକୁ ଯାଉଛୁ, ଯାହାର ଲୁକ୍ ଯେମିତି ସ୍ବାଦ ଆହୁରି ଜବରଦସ୍ତ। ହେଲେ ଏହାକୁ ଖାଇବା ସମସ୍ତଙ୍କ ପକ୍ଷେ ସମ୍ଭବ ନୁହେଁ। କାରଣ ଏ ହେଉଛି ପୃଥିବୀର ସବୁଠାରୁ ମହଙ୍ଗା ବିରିୟାନୀ, ଯାହାର ଗୋଟିଏ ପ୍ଲେଟ୍ର ମୂଲ୍ୟ ୨୦,୦୦୦ଟଙ୍କା। ଏହାକୁ ଦୁବାଇର ଏକ ରେଷ୍ଟୁରାଣ୍ଟ ପ୍ରସ୍ତୁତ କରୁଛି। ରେଷ୍ଟୁରାଣ୍ଟର ନାମ ହେଉଛି ‘ବମ୍ବେ ବୋରୋ’। ଖବର ମୁତାବକ ରେଷ୍ଟୁରାଣ୍ଟର ପ୍ରଥମ ବାର୍ଷିକୀରେ ଏହାର ମାଲିକ ଉକ୍ତ ବିରିୟାନୀକୁ ମେନ୍ୟୁରେ ସାମିଲ କରିଥିଲେ। ତେବେ ଏହି ବିରିୟାନୀକୁ ଜଣେ ଖାଇବା ସମ୍ଭବ ନୁହେଁ। ଏହାକୁ ଏକାଥରେ ୬ ଜଣ ଖାଇପାରିବେ। ଏହା ହେଉଛି ରୟାଲ ବିରିୟାନୀ, ଯାହାକୁ ୨୩ କ୍ୟାରେଟ୍ ସୁନାରେ ସଜାଯାଇଥାଏ। ଏହି ବିରିୟାନୀରେ କଶ୍ମୀରୀ ମଟନ କବାବ, ପୁରୁଣା ଦିଲ୍ଲୀ ମଟନ୍ ଚପ୍ସ, ରାଜପୁତ ଚିକେନ୍ର କବାବ, ମୁଗଲାଇ କୋଫ୍ତେ ଏବଂ ମଲାଇ ଚିକେନ୍ ଆଦି ସାମିଲ କରାଯାଇଛି। ଏହି ବିରିୟାନୀ ସହ ରାଇତା, କରି ଏବଂ ସସ୍ ବି ଦିଆଯାଏ।