ପୁରୀ ଅଫିସ,୨୭।୪: ପିପିଲି ଉପନିର୍ବାଚନ ପାଇଁ କଂଗ୍ରେସ ପକ୍ଷରୁ ପ୍ରାର୍ଥୀ ଘୋଷଣା ହେବା ପରେ ସୋମବାର ବିଶ୍ୱକେଶନ ହରିଚନ୍ଦନ ମହାପାତ୍ର ଦଳୀୟ ସମର୍ଥକଙ୍କ ଗ୍ରହଣରେ ଆସି କୋଭିଡ୍ କଟକଣା ମଧ୍ୟରେ ପ୍ରାର୍ଥତ୍ପତ୍ର ଦାଖଲ କରିଛନ୍ତି। ସେ ସ୍ଥାନୀୟ କଂଗ୍ରେସ ଭବନଠାରୁ ଶୋଭାଯାତ୍ରାରେ ବାହାରି ଜିଲାପାଳ କାର୍ଯ୍ୟାଳୟରେ ପହଞ୍ଚତ୍ଥିଲେ। ପୂର୍ବତନ ଏମ୍ପି ତଥା ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝି, ବିଧାୟକ ସୁରେଶ ରାଉତରାୟ ଶୋଭାଯାତ୍ରାରେ ସାମିଲ ରହିଥିବା ବେଳେ ରାଜ୍ୟ କଂଗ୍ରେସ ଅନ୍ୟ ନେତୃବୃନ୍ଦମାନଙ୍କୁ ମଧ୍ୟ ଦେଖିବାକୁ ମିଳିଛି। ବିଶ୍ୱକେଶନ ହରିଚନ୍ଦନ ରଟର୍ନିଂ ଅଫିସର ତଥା ଅତିରିକ୍ତ ଜିଲାପାଳ ପ୍ରଦୀପ କୁମାର ସାହୁଙ୍କ ନିକଟରେ ପ୍ରାର୍ଥତ୍ପତ୍ର ଦାଖଲ କରିଛନ୍ତି। ଏ ନେଇ ବିଶ୍ୱକେଶନ କହିଛନ୍ତି, ଅଜିତବାବୁ ଗତ ୬ମାସ ଧରି ସାଧାରଣ ଲୋକଙ୍କ ସହ ସମ୍ପର୍କରେ ରହି ନିର୍ବାଚନକୁ ଗତିଶୀଳ କରି ରଖିଥିଲେ। ତାଙ୍କ ଅକାଳ ବିୟୋଗ ମୋତେ ପ୍ରାର୍ଥିପତ୍ର ଦାଖଲ ପାଇଁ ବାଧ୍ୟ କରିଛି। କଂଗ୍ରେସ ଅମଳରେ ପିପିଲି-ଡେଲାଙ୍ଗରେ ବିକାଶକୁ ଲୋକେ ଦେଖିଛନ୍ତି। ଏହାପରଠାରୁ ଆଖିଦୃଶିଆ ବିକାଶ ହୋଇପାରିନାହିଁ। ପିପିଲି-ଡେଲାଙ୍ଗ ନିର୍ବାଚନ ମଣ୍ଡଳୀ ଭୋଟରମାନେ ଠିକ ପ୍ରାର୍ଥୀକୁ ଭୋଟ ଦେବେ। ଅନ୍ୟପକ୍ଷରେ କାର୍ଯ୍ୟକାରୀ ସଭାପତି ପ୍ରଦୀପ ମାଝି କହିଛନ୍ତି, ପିପିଲି ଭୁବନେଶ୍ୱର ନିକଟସ୍ଥ ଏକ ନିର୍ବାଚନମଣ୍ଡଳୀ ହୋଇଥିଲେ ମଧ୍ୟ ବିକାଶ ହୋଇପାରି ନାହିଁ। ଫନୀ କ୍ଷତିଗ୍ରସ୍ତମାନଙ୍କୁ ସହାୟତା ରାଶି ମିଳିପାରିନାହିଁ। ସେହିଭଳି ଅଜିତ ମଙ୍ଗରାଜଙ୍କ ବିୟୋଗ ପରେ ତାଙ୍କ ପ୍ରତି ଥିବା ଅନୁକମ୍ପା ହିଁ ବିଶ୍ୱକେଶନଙ୍କୁ ବିଜୟ କରାଇବ ବୋଲି ସେ କହିଛନ୍ତି। ଉଲ୍ଲେଖଯୋଗ୍ୟ ଯେ, କଂଗ୍ରେସ ପ୍ରାର୍ଥୀ ଅଜିତ ମଙ୍ଗରାଜଙ୍କ ବିୟୋଗ ପରେ ଜାତୀୟ ନିର୍ବାଚନ କମିଶନଙ୍କ ନିର୍ଦ୍ଦେଶକ୍ରମେ ପୁନଃ ନିର୍ବାଚନ ତାରିଖ ଘୋଷଣା ହୋଇଛି। ମେ ୧୬ରେ ପିପିଲି ଉପନିର୍ବାଚନ ଭୋଟଗ୍ରହଣ ହେବାକୁଥିବା ବେଳେ ୧୯ରେ ଭୋଟ ଗଣିତ ହେବ।