ବରୀ,୨୯।୧୦(ଡି.ଏନ୍.ଏ.): ଦୀର୍ଘ ଦିନ ଧରି ଚାଲିଥିବା କଳ୍ପନା ଜଳ୍ପନାର ଶେଷରେ ଅନ୍ତ ଘଟିଛି। ୨୦୧୯ ନିର୍ବାଚନରେ ବରୀ ଭାଜପାରୁ ପ୍ରାର୍ଥୀ ହୋଇଥିବା ବିଶ୍ୱ ରଞ୍ଜନ ମଲ୍ଲିକ ଶୁକ୍ରବାର ବିଜେଡିରେ ଯୋଗ ଦେଇଛନ୍ତି। ଆନୁଷ୍ଠାନିକ ଭାବେ ରାଜ୍ୟ ବିଜେଡି କାର୍ଯ୍ୟାଳୟ ପରିସରରେ ଦଳରେ ଯୋଗ ଦେବା ଅବସରରେ ବରୀ ବିଧାୟିକା ସୁନନ୍ଦା ଦାସ ପୁଷ୍ପଗୁଚ୍ଛ ପ୍ରଦାନ କରି ତାଙ୍କୁ ସମ୍ବର୍ଦ୍ଧିତ କରିଛନ୍ତି। ଏହି ଅବସରରେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ, ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟ ପ୍ରମୁଖ ଉପସ୍ଥିତ ଥିଲେ। ଭାଜପା ନେତା ମଲ୍ଲିକ ଓ ବରୀ ବିଧାୟିକାଙ୍କ ମଧ୍ୟରେ ଦୀର୍ଘ ଦିନ ଧରି ତିକ୍ତତା ଲାଗିରହିଥିଲା। ୨୦ ତାରିଖରେ ମଲ୍ଲିକ ଭାଜପାରୁ ଇସ୍ତଫା ଦେଇଥିଲେ। ତେବେ ଆଜିର ମିଶ୍ରଣ ପର୍ବ ଭାଜପା ଶୂନ୍ୟ ବରୀ ବୋଲି ରାଜନୈତିକ ପଣ୍ଡିତମାନେ ମତ ବ୍ୟକ୍ତ କରିଛନ୍ତି। ଆଗାମୀ ପଞ୍ଚାୟତ ନିର୍ବାଚନରେ ତୃଣମୂଳସ୍ତରରେ ଥିବା କର୍ମୀମାନେ ପରସ୍ପର ବିରୋଧୀ ଉଭୟ ନେତାଙ୍କ ମିଶ୍ରଣକୁ କେତେଦୂର ଗ୍ରହଣ କରିବେ ତାହା ଦେଖିବାକୁ ବାକି ରହିଲା।