କେନ୍ଦୁଝର, ୧୭ା୩ (ସ୍ବ.ପ୍ର.): କେନ୍ଦୁଝର ଜିଲା ମୁଖ୍ୟାଳୟ ରାସ୍ତାର ମରାମତି ପାଇଁ ବହୁ ଅର୍ଥ ଖର୍ଚ୍ଚ କରାଯାଉଥିଲେ ହେଁ ଉପଯୁକ୍ତ ତଦାରଖ ଅଭାବରୁ ନିମ୍ନମାନର କାମ ଯୋଗୁ କିଛି ଦିନ ମଧ୍ୟରେ ରାସ୍ତାର ଅବସ୍ଥା ଶୋଚନୀୟ ହୋଇପଡିଛି। ବର୍ଷା ଓ ରାତିରେ ଏହି ରାସ୍ତା କାମ କରାଯାଉଥିବାରୁ ଠିକ ଭାବେ ରାସ୍ତାରୁ ଧୂଳି ମାଟି ସଫେଇ ନ କରି ତାହା ଉପରେ ପିଚୁ କାମ ହେଉଥିବାରୁ କମ ଦିନରେ ଅନେକ ସ୍ଥାନରେ ପିଚୁ ଓ ଚିପ୍ସ ଉଠି ଯାଉଥିବା ଅଭିଯୋଗ ହେଉଛି। ଫଳରେ ରାସ୍ତା ଅବସ୍ଥା ଶୋଚନୀୟ ହେବାକୁ ବସିଛି। ଏନେଇ ଦୁର୍ଘଟଣା ଘଟିବା ଆଶଙ୍କା ସୃଷ୍ଟି ହୋଇଛି। ସେହିପରି ପିଚୁ କାମ ସମୟରେ ରାସ୍ତା କଡରେ ଡ୍ରେନକୁ ପାଣି ନିଷ୍କାସନ ପଏଣ୍ଟ ଗୁଡିକ ମଧ୍ୟ ବନ୍ଦ ହୋଇଯାଉଛି। ଫଳରେ ବର୍ଷା ହେଲେ ରାସ୍ତାରେ ପାଣି ଜମି ସମ୍ପୂର୍ଣ୍ଣ ନଷ୍ଟ ହୋଇଯିବ ବୋଲି ଆଶଙ୍କା ହେଉଛି। ତୁରନ୍ତ ଏନେଇ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି।