ବଡ଼ବିଲ,୨୦।୭ (ଦେବପ୍ରିୟ ରଣା): କେନ୍ଦୁଝର ଜିଲା ବଡ଼ବିଲର ବିଜେଡି କର୍ମୀ ସୁନୀଲ ସିହ୍ନା ଓରଫ ଭୋଲାଙ୍କୁ ଗୁଳିକରି ହତ୍ୟା ଘଟଣାରେ ଭାଜପା ଫେରାର ଦୁଇ ସୁପାରି କିଲରଙ୍କୁ ଗିରଫ ଓ ବଡ଼ବିଲ ପୌରାଅଧ୍ୟକ୍ଷ ଲକ୍ଷ୍ମଣ ମହାନ୍ତଙ୍କୁ ତଦନ୍ତ ପରିସରଭୁକ୍ତ କରିବାକୁ ଦାବି କରିଛି। ଏନେଇ ଗୁରୁବାର ଭାଜପା ପକ୍ଷରୁ ବଡ଼ବିଲ ଉପଖଣ୍ଡ ଆରକ୍ଷୀ ଅଧିକାରୀଙ୍କ କାର୍ଯ୍ୟାଳୟ ଘେରାଉ କରିବା ସହ ବିକ୍ଷୋଭ ପ୍ରଦର୍ଶନ କରିଛି।
ରାଜ୍ୟ ଭାଜପା ଯୁବ ମୋର୍ଚ୍ଚା ସଭାପତି ଇରାଶିସ ଆଚାର୍ଯ୍ୟ, ବରିଷ୍ଠ ଭାଜପା ନେତା ମୂରଲୀ ମନୋହର ଶର୍ମା, ଭାଜପା ଜିଲା ସଭାପତି ନୀଳମଣି ମହାନ୍ତ, ଭାଜପା ଜିଲା ମହିଳା ମୋର୍ଚ୍ଚା ଉପସଭାନେତ୍ରୀ ଶ୍ରଦ୍ଧାଞ୍ଜଳି କରଙ୍କ ନେତୃତ୍ୱରେ ଶତାଧିକ ଭାଜପା କର୍ମୀ ସାମିଲ ହୋଇଥିଲେ। ବଡ଼ବିଲ ପୌରଅଧ୍ୟକ୍ଷ, ମୃତ ଭୋଲା ଏବଂ ଅଭିଯୁକ୍ତଙ୍କ ମୋବାଇଲକୁ ପୋଲିସ ଜବତ କରି ସମସ୍ତ କଲ ରେକର୍ଡକୁ ଯାଞ୍ଚ କରି ପ୍ରକୃତ ଅପରାଧୀଙ୍କ ମୁଖା ଖୋଲିବାକୁ ଭାଜପା ନେତାମାନେ ଦାବି କରିଥିଲେ। ଅଭିଯୁକ୍ତ ମହିଳା ସୁଖବିନ୍ଦର କୌର ଓରଫ୍ ରଜ୍ଜି ପୌରାଧ୍ୟକ୍ଷଙ୍କ ଉପରେ ନିର୍ଭରଶୀଳ ଥିବାବେଳେ ଭୋଲାଙ୍କ ହତ୍ୟା ନିମନ୍ତେ ଏତେ ଗୁଡିଏ ଟଙ୍କା କେଉଁଠୁ ଆଣି ସୁପାରି ଦେଲେ ବୋଲି ପ୍ରଶ୍ନ କରିଥିଲେ।
ସୂଚନା ଥାଉକି, ମଇ ୧ ସକାଳ ପ୍ରାୟ ସାଢେ ୯ ଟା ବେଳେ ଭୋଲା ନିଜ ସ୍କୁଟିରେ ମନି ଟାୱାର ନିକଟ ରାସ୍ତା ଦେଇ ଯାଉଥିବାବେଳେ ଦୁର୍ବୃତ୍ତ ଭୋଲାଙ୍କ ମୁଣ୍ଡକୁ ଲକ୍ଷ୍ୟକରି ଗୁଳି କରି ଫେରାର ହୋଇଯାଇଥିଲେ। ଭୋଲାଙ୍କ ମୁଣ୍ଡ ପଛପାଖରୁ ଗୁଳିଟି ସମ୍ମୁଖ ଆଖି ଦେଇ ପାର ହୋଇଯାଇଥିଲା। ଘଟଣା ସ୍ଥଳରେ ଭୋଲାଙ୍କ ମୃତ୍ୟୁ ଘଟିଥିଲା। ଘଟଣାରେ ପୋଲିସ ସୁଖବିନ୍ଦର କୌର ଓରଫ୍ ରଜ୍ଜି, ତାଙ୍କ ସହଯୋଗୀ ସାକିର ହୁସୈନଙ୍କୁ ମଇ ୫ରେ ଗିରଫ କରିଥିଲା। ଘଟଣାରେ ସମ୍ପୃକ୍ତ ୨ ସୁପାରି କିଲର ଫେରାର ଅଛନ୍ତି। ହତ୍ୟା ପାଇଁ ରଜ୍ଜି ୪ ଲକ୍ଷ ଟଙ୍କା ସୁପରି ଦେଇଥିଲେ।
