ଡେରାବିଶ,୧୪ା୨(ସ୍ବ.ପ୍ର.): ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଡେରାବିଶ ବ୍ଲ୍ଳକରେ ଆସନ୍ତା ୧୬ରେ ମତଦାନ ହେବ। ୧୩ ନଂ. ଜୋନ୍ ଜିଲା ପରିଷଦ ଆସନ ଉପରେ ଏବେ ସମସ୍ତଙ୍କ ନଜର ରହିଛି। ଏହି ଜୋନ୍ରେ ସମୁଦାୟ ଭୋଟରଙ୍କ ସଂଖ୍ୟା ୪୧ହଜାର ୭୪୮। ସେଥିମଧ୍ୟରୁ ମହିଳା ଭୋଟର ସଂଖ୍ୟା ୧୯ହଜାର୯୩୫ ଥିବା ବେଳେ ପୁରୁଷ ଭୋଟରଙ୍କ ସଂଖ୍ୟା ୨୧ହଜାର ୮୧୩। ଶାସକ ବିଜେଡିରୁ ଗୀତାଞ୍ଜଳି ସେଠୀ, ଭାଜପାରୁ ରଞ୍ଜିତା ସେଠୀ ଓ କଂଗ୍ରେସରୁ ଅନସୂୟା ଦାସ ନିର୍ବାଚନ ପ୍ରତିଦ୍ୱନ୍ଦ୍ୱୀ ଭାବେ ଉଭା ହୋଇଛନ୍ତି।
୧୩ନଂ.ଜୋନ୍ ଅଧୀନରେ ବେଣୀପୁର, ମଙ୍ଗଳପୁର, ଛୋଟି, ନହଙ୍ଗ, କୁରୁଜଙ୍ଗା, କାଉପଡ଼ା, ଗୁଆଳସିଂ, କୁଶିଆପାଳ, ରଘୁଦେଇପୁର ଓ ବାରିମୂଳ ଆଦି ୧୦ ପଞ୍ଚାୟତ ରହିଛି। ପାଟକୁରା ନିର୍ବାଚନମଣ୍ଡଳୀରେ ଗୁରୁତ୍ୱ ବହନ କରୁଥିବା ଏହି ଜୋନ୍ର ବିଭିନ୍ନ ପଞ୍ଚାୟତରେ ଥିବା ସ୍ଥାନୀୟ ସମସ୍ୟାକୁ ନେଇ ପ୍ରାର୍ଥୀମାନେ ଭୋଟରଙ୍କ ସମ୍ମୁଖୀନ ହେଉଛନ୍ତି। ପ୍ରଚାର ଅଭିଯାନରେ ବିଜେଡି ଓ ଭାଜପା ଆଗରେ ଥିବା ବେଳେ କଂଗ୍ରେସ ପ୍ରାର୍ଥୀ ପଛରେ ପଡ଼ିଛନ୍ତି। ବିଜେଡି ପ୍ରାର୍ଥୀ ଗୀତାଞ୍ଜଳିଙ୍କ ପାଇଁ ପାଟକୁରା ବିଧାୟିକା ସାବିତ୍ରୀ ଅଗ୍ରୱାଲ, ରାଜ୍ୟ ବିଜେଡି କାର୍ଯ୍ୟକାରିଣୀ ସଦସ୍ୟ ସଞ୍ଜୟ ଅଗ୍ରୱାଲ ଓ ବିଜେଡି ରାଜ୍ୟ ସାଧାରଣ ସମ୍ପାଦକ ରବି ସାମଲଙ୍କ ସମେତ ଦଳୀୟ ନେତୃବୃନ୍ଦ ଭୋଟରଙ୍କ ସମର୍ଥନ ଯୋଗାଡ଼ କରିବାରେ ଲାଗିଛନ୍ତି। ଏନେଇ ଗୀତାଞ୍ଜଳି କହିଛନ୍ତି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକାଭିମୁଖୀ ଯୋଜନା, ବିଶେଷ କରି ମହିଳାଙ୍କ ଉନ୍ନତି ପାଇଁ ମୁଖ୍ୟମନ୍ତ୍ରୀଙ୍କ ବଳିଷ୍ଠ ପଦକ୍ଷେପକୁ ସାଧାରଣ ଲୋକଙ୍କ ପାଖରେ ପହଞ୍ଚାଇବା ପାଇଁ ଆମେ ଉଦ୍ୟମ ଜାରି ରଖିଛୁ। ଏହି ନିର୍ବାଚନରେ ବିଜେଡିକୁ ଅଧିକ ସମର୍ଥନ ମିଳିବ ବୋଲି ସେ ବହୁ ଆଶାବାଦୀ। ସେହିପରି ଭାଜପା ପ୍ରାର୍ଥୀ ରଞ୍ଜିତା ସେଠୀ ନିଜ ପ୍ରଚାର ଅଭିଯାନକୁ ଜୋରଦାର କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବହୁବିଧ ଯୋଜନାକୁ ଭୋଟରଙ୍କ ନିକଟରେ ସେ ପହଞ୍ଚାଇବା ପାଇଁ ଅଣ୍ଟା ଭିଡ଼ିଛନ୍ତି। ଏଥିସହିତ ଦୁର୍ନୀତିରେ ଉବୁଟୁବୁ ହେଉଥିବା ଏବଂ କେନ୍ଦ୍ର ସରକାରଙ୍କ ବିଭିନ୍ନ ଯୋଜନାକୁ ବାଟବଣା କରୁଥିବା ବିଜେଡି ସରକାରଙ୍କ ବିରୋଧରେ ପ୍ରଚାର କରି ସେ ସାଧାରଣ ଭୋଟରଙ୍କ ନିକଟତର ହେଉଥିବା ରଞ୍ଜିତା ପ୍ରକାଶ କରିଛନ୍ତି। ତେବେ ଚଳିତ ନିର୍ବାଚନରେ ସାଧାରଣ ଭୋଟରଙ୍କ ଭାଜପା ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତି ଅଧିକ ସମର୍ଥନ ଥିବାରୁ ସେ ଏହି ନିର୍ବାଚନରେ ନିଶ୍ଚିତ ବିଜୟୀ ହେବେ ବୋଲି ଦୃଢ଼ୋକ୍ତି ପ୍ରକାଶ କରିଛନ୍ତି। ଅପରପକ୍ଷେ କଂଗ୍ରେସ ପ୍ରାର୍ଥୀ ଅନସୂୟା ନିଜର ସମର୍ଥକଙ୍କ ସହ ପ୍ରତି ପରିବାର ସଦସ୍ୟଙ୍କୁ ଭେଟି ଭୋଟ ଭିକ୍ଷା କରୁଛନ୍ତି। ଅନସୂୟା ନିଜ ପ୍ରତିକ୍ରିୟାରେ କହିଛନ୍ତି, ୧୩ ନଂ. ଜୋନ୍ ଅଧୀନରେ ଥିବା ସମସ୍ତ ପଞ୍ଚାୟତରେ ବହୁ ସମସ୍ୟା ରହିଛି। ଗତ ୨୨ ବର୍ଷ ଶାସନ ମଧ୍ୟରେ ସରକାର ଏହି ଜୋନ୍ ଅଧୀନ ସମସ୍ତ ଗ୍ରାମକୁ ଅଣଦେଖା କରିଛନ୍ତି। ବାସଗୃହ ଯୋଜନାଠାରୁ ଆରମ୍ଭ କରି ପାଇଖାନା ନିର୍ମାଣ ନାମରେ ବହୁ ଦୁର୍ନୀତି ହୋଇଛି। ଏହି ସମସ୍ୟାକୁ ପ୍ରଶାସନ ନିକଟରେ ପହଞ୍ଚାଇବା ପାଇଁ ସେ ସଂକଳ୍ପବଦ୍ଧ ବୋଲି କହିଛନ୍ତି।