ଗୁଣପୁର,୨ା୩(ଡି.ଏନ୍.ଏ.): ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଭୋଟ ଗଣତି ସରିଛି। ଏଥିରେ ଶାସକ ବିଜେଡିକୁ ଗୁଣପୁର ବ୍ଲକରେ ଧରାଶାୟୀ ହେବାକୁ ପଡ଼ିଛି। ସେହିପରି ଭାଜପାର ପ୍ରଦର୍ଶନ ନୈରାଶ୍ୟଜନକ ରହିଛି। ଏସବୁ ଭିତରେ କଂଗ୍ରେସ ଦୁଇଟି ଜୋନ୍ ବାଜି ମାରିନେଇଛି। ତେବେ ଶାସକ ବିଜେଡି ଓ ଭାଜପାର ପରାଜୟ ଏବଂ କଂଗ୍ରେସର ବିଜୟକୁ ନେଇ ଏବେ ଅଞ୍ଚଳରେ ବିିଭିନ୍ନ ପ୍ରକାର ଚର୍ଚ୍ଚା ହେଉଛି। ଗୁଣପୁର-ଥେରୁବାଲି ପ୍ରକଳ୍ପକୁ ଅଣଦେଖା କରିବା ଉଭୟ ଦଳ ପାଇଁ ମହଙ୍ଗା ପଡ଼ିଛି ବୋଲି ବୁଦ୍ଧିଜୀବୀଙ୍କ ମଧ୍ୟରେ ଚର୍ଚ୍ଚାର ବିଷୟ ହୋଇଛି।
ବିଜେଡି ପାଇଁ ରାଜ୍ୟ ସଭା ସଦସ୍ୟ ଏନ୍. ଭାସ୍କର ରାଓ, ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ରାଜ୍ୟ ଉପଦେଷ୍ଟା ସୁଧୀର ଦାସ, ଗୁଣପୁର ବିଧାୟକ ରଘୁନାଥ ଗମାଙ୍ଗଙ୍କ ଭଳି ହେଭିୱେଟ୍ମାନେ ପ୍ରଚାର କରିଥିବାବେଳେ ଦୁଇଟି ଜିଲା ପରିଷଦ ଜୋନ୍ରେ ଦଳକୁ ପରାଜୟ ସ୍ବୀକାର କରିବାକୁ ପଡ଼ିଛି। ଅନ୍ୟପକ୍ଷରେ ଭାଜପା ପାଇଁ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ ଏବଂ ରାଜ୍ୟ ପ୍ରଭାରୀ ଡି. ପୁରନ୍ଦେଶ୍ୱରୀ ପ୍ରଚାର କରିଥିଲେ। ତେବେ ଦୁଇ ଦଳକୁ କୌଣସି ସଫଳତା ମିଳିନାହିଁ।
ଅନ୍ୟପକ୍ଷରେ କଂଗ୍ରେସ ପକ୍ଷରୁ କୋରାପୁଟ ଏମ୍ପି ସପ୍ତଗିରି ଉଲାକା ଏବଂ ପୂର୍ବତନ ଜିଲା ପରିଷଦ ଅଧ୍ୟକ୍ଷ ବିଜୟ ଗମାଙ୍ଗ ପ୍ରଚାର ମଙ୍ଗ ଧରିଥିଲେ। ଏମ୍ପି ସପ୍ତଗିରି ଅନେକ ଥର ଗୁଣପୁର-ଥେରୁବାଲି ରେଳପଥ ପ୍ରସଙ୍ଗ ପାର୍ଲାମେଣ୍ଟ ଠାରୁ ଆରମ୍ଭକରି ଅନେକ ସ୍ଥାନରେ ଅଗ୍ରାଧିକାର ଭିତ୍ତିରେ ଉଠାଇଛନ୍ତି। ଏହାର ଫଳ ସ୍ବରୂପ ଗୁଣପୁରର ଦୁଇଟି ଜିଲା ପରିଷଦ ଜୋନ୍ କଂଗ୍ରେସ ସପକ୍ଷକୁ ଯାଇଥିବା କୁହାଯାଉଛି। ରାଜ୍ୟ ଏବଂ କେନ୍ଦ୍ର ମଧ୍ୟରେ ଗୁଣପୁର-ଥେରୁବାଲି ରେଳପଥର ଭାଗ୍ୟ ଅଟକିଥିବାବେଳେ ଏବେ ପୌର ନିର୍ବାଚନ ହେବାକୁ ଯାଉଛି। ଏହାର ପ୍ରଭାବ ପୌରାଞ୍ଚଳର ସଚେତନ ଭୋଟରଙ୍କ ଉପରେ କିଭଳି ପଡ଼ୁଛି ତାହା ଆଗାମୀ ଦିନରେ ଜଣାପଡ଼ିବ।