ଭୁବନେଶ୍ବର, ୧୪।୫(ବ୍ୟୁରୋ): ଝାରସୁଗୁଡ଼ା ଉପନିର୍ବାଚନରେ ବିଜେଡି ପ୍ରାର୍ଥୀ ଦୀପାଳି ଦାସ ୧ ଲକ୍ଷ ୦୭ ହଜାର ୧୯୮ ଭୋଟ ପାଇ ବିଜୟୀ ହୋଇଛନ୍ତି। ଭାଜପା ପ୍ରାର୍ଥୀ ଟଙ୍କଧର ତ୍ରିପାଠୀ ୫୮ ହଜାର ୪୭୭ ଖଣ୍ଡ ଭୋଟ ପାଇଛନ୍ତି। ତେବେ ଦୀପାଳିଙ୍କଠାରୁ ଟଙ୍କଧର ୪୮,୭୨୧ ଖଣ୍ଡ ଭୋଟରେ ପରାଜିତ ହୋଇଛନ୍ତି। ଏହି ଉପନିର୍ବାଚନରେ କଂଗ୍ରେସ ପ୍ରାର୍ଥୀ ତରୁଣ ପାଣ୍ଡେ ୪୪୯୬ ଖଣ୍ଡ ଭୋଟ ପାଇ ଅମାନତ ହରାଇଛନ୍ତି। ତେବେ ସବୁଠାରୁ ବଡ଼ କଥା ହେଉଛି ୨୦୧୯ ସାଧାରଣ ନିର୍ବାଚନରେ ଭାଜପା ପ୍ରାର୍ଥୀ ୪୫, ୬୯୯ ଖଣ୍ଡ ଭୋଟରେ ହାରିଥିବା ବେଳେ ଏଥର ୪୮,୭୨୧ ଖଣ୍ଡ ଭୋଟରେ ବିଜେଡିଠାରୁ ପରାଜିତ ହୋଇଛନ୍ତି। ସେହିପରି କଂଗ୍ରେସ ୨୦୧୯ ନିର୍ବାଚନ ତୁଳନାରେ ବହୁ କମ୍ ଭୋଟ ପାଇଛି। ଏବେ କଂଗ୍ରେସ ନେତୃତ୍ୱକୁ ନେଇ ପୁଣି ଦଳ ଭିତରେ ନେତାମାନେ ପ୍ରଶ୍ନ ଉଠାଇବା ଆରମ୍ଭ କରିଛନ୍ତି।
୨୦୧୯ ସାଧାରଣ ନିର୍ବାଚନରେ ସ୍ବର୍ଗତ ନବ ଦାସ ବିଜେଡି ପ୍ରାର୍ଥୀ ହୋଇଥିଲେ। ଗତଥର ବିଜେଡି ନେତା ନବ ଦାସ ମୋଟ୍ ୯୮,୬୨୦ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ଭାଜପା ପ୍ରାର୍ଥୀ ଦିନେଶ କୁମାର ଜୈନ୍ ୫୨,୯୨୧ ଭୋଟ ପାଇଥିବା ବେଳେ ତାଙ୍କଠାରୁ ୪୫,୬୯୯ ଅଧିକ ଭୋଟରେ ନବ ଦାସ ବିଜୟୀ ହୋଇଥିଲେ। ସେଥର କଂଗ୍ରେସରୁ ପ୍ରାର୍ଥୀ ହୋଇଥିବା ମହେନ୍ଦ୍ର ନାଏକ ମୋଟ ୧୮,୮୨୩ ଖଣ୍ଡ ଭୋଟ ପାଇଥିଲେ। ସେଥର ବିଜେଡି ମୋଟ୍ ୫୫.୯୭ ପ୍ରତିଶତ, ଭାଜପା ୩୦.୪ ଏବଂ କଂଗ୍ରେସ ୧୦.୬୮ ପ୍ରତିଶତ ଭୋଟ ପାଇଥିଲା। ହେଲେ ଏହି ଉପନିର୍ବାଚନରେ ବିଜେଡିକୁ ୬୦.୯୩ ପ୍ରତିଶତ ଭୋଟ ମିଳିଥିବା ବେଳେ ଭାଜପାକୁ ୩୩.୨୪ ପ୍ରତିଶତ ମିଳିଛି। କଂଗ୍ରେସ ୨.୫୬ ପ୍ରତିଶତ ଭୋଟ ପାଇଛି।
ଗତଥର ତୁଳନାରେ ଏଥର ବିଜେଡି ୪.୯୬ ପ୍ରତିଶତ ଅଧିକ ଭୋଟ୍ ପାଇଛି। ସେହିପରି ଭାଜପା ୨୦୧୯ ନିର୍ବାଚନ ତୁଳନାରେ ୨.୮୪ ପ୍ରତିଶତ ଅଧିକ ଭୋଟ୍ ପାଇଛି। ହେଲେ କଂଗ୍ରେସ ଗତ ନିର୍ବାଚନ ତୁଳନାରେ ୮.୧୨ ପ୍ରତିଶତ କମ୍ ଭୋଟ ପାଇଛି। କଂଗ୍ରେସର ଏଭଳି ପ୍ରଦର୍ଶନ ପରେ ଦଳର ସ୍ଥିତି ସଜାଡ଼ିବା ନେଇ ପିସିସି ସଭାପତି ଶରତ ପଟ୍ଟନାୟକଙ୍କ ପାରଦର୍ଶିତାକୁ ନେଇ ରାଜନୀତି ଜୋର୍ ଧରିଛି। ସେହିପରି ବିଜେଡି ଗତ ନିର୍ବାଚନ ତୁଳନାରେ ୮୫୭୮ ଖଣ୍ଡ ଏବଂ ଭାଜପା ୫୫୫୬ ଖଣ୍ଡ ଅଧିକ ଭୋଟ ପାଇଛି। ହେଲେ କଂଗ୍ରେସ ଗତଥର ଅପେକ୍ଷା ୧୪,୩୨୭ ଖଣ୍ଡ କମ୍ ଭୋଟ ପାଇଛି। ୨୦୧୪ ସାଧାରଣ ନିର୍ବାଚନରେ କଂଗ୍ରେସରୁ ନବ ଦାସ ପ୍ରାର୍ଥୀ ହୋଇଥିବା ବେଳେ ତାଙ୍କୁ ମୋଟ୍ ୭୪,୪୯୯ ଖଣ୍ଡ ଭୋଟ ମିଳିଥିଲା। ତାଙ୍କ ବିରୋଧରେ ବିଜେଡିରୁ ପ୍ରାର୍ଥୀ ହୋଇ ସ୍ବର୍ଗତ କିଶୋର କୁମାର ମହାନ୍ତି ୬୨,୯୩୬ ଖଣ୍ଡ ଭୋଟ ପାଇଥିଲେ। ସେଥରୁ ଭାଜପାରୁ ଆନନ୍ଦ ପ୍ରଧାନ ପ୍ରାର୍ଥୀ ହୋଇ ୨୧,୦୪୭ ଖଣ୍ଡ ଭୋଟ ପାଇଥିଲେ। କଂଗ୍ରେସକୁ ମୋଟ୍ ୪୫.୧ ପ୍ରତିଶତ, ବିଜେଡିକୁ ୩୮.୧ ଏବଂ ଭାଜପାକୁ ୧୨.୭୪ ପ୍ରତିଶତ ଭୋଟ ମିଳିଥିଲା। ତେବେ ଏହି ଭୋଟ ପ୍ରତିଶତକୁ ଉପନିର୍ବାଚନ ଫଳାଫଳ ସହ ତୁଳନାକଲେ କଂଗ୍ରେସ ୨୦୧୪ ନିର୍ବାଚନ ତୁଳନାରେ ଏଥର ୪୨.୫୪ ପ୍ରତିଶତ କମ୍ ଭୋଟ ପାଇଛି। ବିଜେଡିକୁ ୨୨.୮୩ ଏବଂ ଭାଜପାକୁ ୨୦.୫ ପ୍ରତିଶତ ଅଧିକ ଭୋଟ ମିଳିଛି।