ଭୁବନେଶ୍ୱର(ଅନିଲ ଦାସ)/ଜୟପୁର(ପବନ ପାଣିଗ୍ରାହୀ),୧୫ା୬: ଆସନ୍ତା ୫ ବର୍ଷ ପାଇଁ କଂଗ୍ରେସ ବିରୋଧୀ ଦଳ ଭୂମିକା ନିର୍ବାହ କରିବ ବୋଲି ଜୟପୁର ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି। କାରଣ ଇଡି, ସିବିଆଇ ଭୟରେ ବିଜେଡି ବିରୋଧୀ ଦଳ ଭୂମିକା ତୁଲାଇ ପାରିବ ନାହିଁ ବୋଲି ସେ କହିଛନ୍ତି।
ଗଣମାଧ୍ୟମକୁ ତାରା କହିଛନ୍ତି ଯେ ୨୦୨୪ ନିର୍ବାଚନରେ ଭାଜପା ସରକାର ଗଢ଼ିଛି। ୨୪ ବର୍ଷ ଧରି ଶାସନ ଗାଦିରେ ବସିଥିବା ବିଜେଡି ମୁଖ୍ୟ ବିରୋଧୀ ଦଳ ହୋଇଛି। କିନ୍ତୁ ଏ ପର୍ଯ୍ୟନ୍ତ କଂଗ୍ରେସର ସ୍ଥିତିରେ ସେଭଳି କୌଣସି ପରିବର୍ତ୍ତନ ଦେଖିବାକୁ ମିଳିନାହିଁ। ଯଦିଓ ଗତ ନିର୍ବାଚନ ତୁଳନାରେ ଚଳିତ ନିର୍ବାଚନରେ ଦଳର ଆସନ ସଂଖ୍ୟା ବୃଦ୍ଧି ପାଇଛି, କିନ୍ତୁ ଦଳର ପ୍ରଦର୍ଶନ ନୈରାଶ୍ୟଜନକ ରହିଛି। କଂଗ୍ରେସ ରାଜ୍ୟରେ ୧ ନମ୍ବର ଦଳ ହେବ। କଂଗ୍ରେସରେ ଗୋଷ୍ଠୀ କନ୍ଦଳ ବନ୍ଦ ହେବା ଦରକାର। ବାରମ୍ବାର ଦିଲ୍ଲୀ ଯିବା ମଧ୍ୟ ବନ୍ଦ ହେବ। ଯିଏ ଦାୟିତ୍ୱ ନିଅନ୍ତୁ ପଛେ କଂଗ୍ରେସକୁ ଭାଗ କରା ନ ଯାଉ। ଏହା ହେଲେ ୨୦୨୯ରେ କଂଗ୍ରେସ ରାଜ୍ୟର ଏକ ନମ୍ବର ଦଳ ହେବ ବୋଲି ତାରା କହିଛନ୍ତି। ଅବିଭକ୍ତ କୋରାପୁଟ ଜିଲାରେ କଂଗ୍ରେସର ୭ ବିଧାୟକ, ଜଣେ ଏମ୍ପି ବିଜୟୀ ହୋଇଛନ୍ତି ା ସମସ୍ତେ ଏକଜୁଟ ହୋଇ ରହିବୁ। ଅବିଭକ୍ତ କୋରାପୁଟ ଜିଲା ସହ ରାଜ୍ୟର ବିଭିନ୍ନ ସମସ୍ୟା ବିଧାନସଭାରେ ଉଠିବ ା ଦଳ ଓ ମାଟି ମା’ ପାଇଁ ଲଢ଼େଇ ଜାରି ରହିବ ା ମୋ ସ୍ବରକୁ କେହି ଅଟକାଇ ପାରିବେ ନାହିଁ ା ରାଜ୍ୟରେ କଂଗ୍ରେସ ସରକାର ନ ଥିଲେ ମଧ୍ୟ ଲୋକଙ୍କ ପାଇଁ କାମ କରିବେ ବୋଲି ତାରା କହିଛନ୍ତି ା
କୋରାପୁଟ ପରେ ଜୟପୁର ବିଧାନସଭା ଆସନରୁ ତାରା ଲଗାତର ୨ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି। ଭାଜପା ଓ ବିଜେଡି ସପକ୍ଷରେ ଅଧିକ ସମର୍ଥନ ଥିବା ସତ୍ତ୍ୱେ ସେ କଂଗ୍ରେସ ଟିକେଟରେ ପୁଣି ବିଜୟୀ ହୋଇଥିବା ଚର୍ଚ୍ଚା ହେଉଛି।