ଭଦ୍ରକ,୩।୧(ସନାତନ ରାଉତ): କୃଷି, ଜଳସେଚନ, ଗମନାଗମନ, ସ୍ବାସ୍ଥ୍ୟ, ଶିକ୍ଷା, ରେଳ ବିକାଶ ଆଦି ବିଭିନ୍ନ କ୍ଷେତ୍ରରେ ଓଡ଼ିଶାକୁ ହକ୍ ପ୍ରଦାନ ଓ ରାଜ୍ୟ ସ୍ବାର୍ଥ ରକ୍ଷା ପାଇଁ ବିଜେଡି ସବୁବେଳେ ସଂଗ୍ରାମ ଜାରି ରଖିଛି ବୋଲି ମଙ୍ଗଳବାର ଭଦ୍ରକସ୍ଥିତ ଦଳୀୟ କାର୍ଯ୍ୟାଳୟରେ ଏକ ଖବରଦାତା ସମ୍ମିଳନୀରେ ଜିଲା ପର୍ଯ୍ୟବେକ୍ଷକ ସଞ୍ଜୟ ଦାସବର୍ମା କହିଛନ୍ତି। ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରୁ ବଞ୍ଚତ୍ତ ଥିବା ହିତାଧିକାରୀମାନଙ୍କ ପାଇଁ ଖୋଲାଯାଇଥିବା ବିଏସ୍କେୱାଇ ନବୀନ କାର୍ଡ ପୋର୍ଟାଲରେ ଆବେଦନ କରିପାରିବେ। ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉତ୍ସବ ପାଇଁ ରାଜ୍ୟର ପ୍ରତ୍ୟେକ ଘରୁ ଗୁଆ, ଅରୁଆ ଚାଉଳ ସଂଗ୍ରହ କରି ଛତିଶା ନିଯୋଗରେ ସମର୍ପଣ କରାଯିବ ବୋଲି ସେ ପ୍ରକାଶ କରିଥିଲେ।
ଜିଲାରେ ବିଭିନ୍ନ ଉନ୍ନୟନ କାର୍ଯ୍ୟ ପାଇଁ ରାଜ୍ୟ ସରକାରଙ୍କ ପକ୍ଷରୁ ଦିଆଯାଇଥିବା ବ୍ୟୟବରାଦର ହିସାବ ମଧ୍ୟ ସେ ଦେଇଥିଲେ। ଧାମନଗରଠାରେ ବୈତରଣୀ ନଦୀରେ କୋଚିଳା ବ୍ୟାରେଜ ପ୍ରତିଷ୍ଠା ପାଇଁ ୪ ଶହ କୋଟି ଟଙ୍କା, ଧାମନଗର ଛକ ଓ ଧାମରାଠାରେ ୨ ହଜାର ଏକର ଜମିରେ ଶିଳ୍ପାୟନ ପ୍ରତିଷ୍ଠା, ଚାନ୍ଦବାଲି ଧନକଣିଆଠାରେ ସେତୁ ନିର୍ମାଣ ପାଇଁ ୮୦ କୋଟି, ପଞ୍ଚୁଟିକିରି ସେତୁ ନିର୍ମାଣ ଲାଗି ୫୦ କୋଟି, ଆଖଣ୍ଡଳମଣି ପୀଠ ଉନ୍ନତୀକରଣ ନିମନ୍ତେ ୫୦ କୋଟି ଟଙ୍କା ସମେତ ଜିଲାକୁ ମିଳିଥିବା ଅନୁଦାନ ନେଇ ସେ ସୂଚନା ପ୍ରଦାନ କରିଥିଲେ। ଭଦ୍ରକର ମୁଖ୍ୟ ଦାବି ମେଡିକାଲ କଲେଜ ଓ ଭଦ୍ରକ କଲେଜକୁ ବିଶ୍ୱବିଦ୍ୟାଳୟ ପ୍ରତିଷ୍ଠା ନେଇ ପ୍ରଶ୍ନର ଉତ୍ତରରେ ପର୍ଯ୍ୟବେକ୍ଷକ କହିଥିଲେ, ଭଦ୍ରକ ଏରିୟା ହସ୍ପିଟାଲ ପାଇଁ ୨ଶହ କୋଟି ଟଙ୍କା ଅନୁଦାନ ଦିଆଯାଇଛି ଏବଂ ପିପିପି ମୋଡ୍ରେ ମେଡିକାଲ ପ୍ରତିଷ୍ଠା ଲାଗି ଆଦାନୀ ସହ ଚୁକ୍ତି ହୋଇଛି। ଏହି ଦାବି ରାଜ୍ୟ ସରକାରଙ୍କ ପାଖରେ ଉପସ୍ଥାପନ କରାଯିବ ବୋଲି ସେ କହିଥିଲେ। ଏମ୍ପି ମଞ୍ଜୁଲତା ମଣ୍ଡଳ, ଭଣ୍ଡାରିପୋଖରୀ ବିଧାୟକ ପ୍ରଫୁଲ୍ଲ ସାମଲ, ଭଦ୍ରକ ବିଧାୟକ ସଞ୍ଜୀବ କୁମାର ମଲ୍ଲିକ, ଚାନ୍ଦବାଲି ବିଧାୟକ ବ୍ୟୋମକେଶ ରାୟ, ବାସୁଦେବପୁର ବିଧାୟକ ବିଷ୍ଣୁବ୍ରତ ରାଉତରାୟ, ଜିଲା ସଭାପତି ଜଗନ୍ନାଥ ସ୍ବାଇଁ, ଜିଲା ପରିଷଦ ସଭାପତି ପ୍ରଫୁଲ୍ଲ ଯେନା, ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳଙ୍କ ସହ ଦଳୀୟ ନେତୃବୃନ୍ଦ ଉପସ୍ଥିତ ଥିଲେ।