ଆନନ୍ଦପୁର,୨୭।୨(ସୁଶାନ୍ତ କୁମାର ସାହୁ):କେନ୍ଦୁଝର ଜିଲା ଆନନ୍ଦପୁର ବିଧାନସଭା ନିର୍ବାଚନମଣ୍ଡଳୀରେ ପ୍ରମୁଖ ରାଜନୈତିକ ଦଳ ମଧ୍ୟରେ ପ୍ରସ୍ତୁତି ଆରମ୍ଭ ହୋଇଗଲାଣି। ବିଗତ ତିନୋଟି ନିର୍ବାଚନକୁ ଦେଖିଲେ ବିଜେଡି ଏଠାରେ ପ୍ରତିଥର ପ୍ରାର୍ଥୀ ବଦଳାଉଥିବାବେଳେ ଭାଜପା ଓ କଂଗ୍ରେସ ସେମାନଙ୍କ ପ୍ରାର୍ଥତ୍ତ୍ୱକୁ ପ୍ରାୟ ସ୍ଥିର ରଖିଛନ୍ତି। ବିଜେଡିର ପ୍ରାର୍ଥୀ ପରିବର୍ତ୍ତନ ପରୀକ୍ଷଣ ସଫଳ ହେଉଥିବା ବେଳେ କଂଗ୍ରେସ ଓ ଭାଜପା ବିକଳ୍ପ ପ୍ରାର୍ଥୀ ଅଭାବରୁ ଦ୍ୱିତୀୟ ଓ ତୃତୀୟ ସ୍ଥାନରେ ସନ୍ତୁଷ୍ଟ ହେବାକୁ ପଡୁଥିବା ଆଲୋଚନା ହେଉଛି।
୍ଯ ବିଜେଡିରୁ ଭାଗୀରଥି ସେଠୀ ୫୪ ହଜାର ୨୬୬ ଖଣ୍ଡ ଭୋଟ ପାଇ ବିଜୟୀ ହୋଇଥିବାବେଳେ କଂଗ୍ରେସର ଜୟଦେବ ଜେନା ୪୮ହଜାର ୯୬୦ ଖଣ୍ଡ ଭୋଟ ପାଇ ଦ୍ୱିତୀୟରେ ରହିଥିଲେ। ଭାଜପାରୁ ଆରତି ସିଂହ ୧୦ହଜାର ୬୪୪ ଖଣ୍ଡ ଭୋଟ ପାଇ ତୃତୀୟରେ ଥିଲେ। ୨୦୧୪ରେ ବିଜେଡିରୁ ମାୟାଧର ଜେନା ୮୨ ହଜାର ୫୨୦ ଖଣ୍ଡ ଭୋଟ ପାଇ ଜୟଯୁକ୍ତ ହୋଇଥିବା ବେଳେ କଂଗ୍ରେସରୁ ଜୟଦେବ ୬୦ହଜାର ୨୯୬ ଭୋଟ ପାଇ ୨ୟ ଏବଂ ଭାଜପାରୁ ଆଲୋକ ସେଠୀ ୧୨ହଜାର ୬୬୪ ଭୋଟ ପାଇ ୩ୟରେ ଥିଲେ। ୨୦୦୯ରେ ଭାଜପାରୁ ନିର୍ବାଚନ ଲଢ଼ିଥିବା ଆରତି ବିଜେଡିମୁହଁା ହେବାରୁ ଆଲୋକଙ୍କୁ ଭାଜପା ୨୦୧୪ରେ ବିଧାୟକ ପ୍ରାର୍ଥୀ ଭାବେ ମଇଦାନକୁ ଛାଡ଼ିଥିଲା। ସେହିଭଳି ୨୦୧୯ରେ ବିଜେଡିରୁ ଭାଗୀରଥି ନିର୍ବାଚନ ଲଢ଼ି ୮୯ହଜାର ୮୫୦ ଭୋଟ ପାଇ ବିଧାୟକ ହୋଇଥିଲେ। କଂଗ୍ରେସରୁ ଜୟଦେବ ୪୫ହଜାର ୬୫୭ ଭୋଟ ପାଇ ଦ୍ୱିତୀୟ ଏବଂ ଭାଜପାରୁ ଆଲୋକ ୩୧ ହଜାର ୫୫୪ ଭୋଟ ପାଇ ତୃତୀୟ ସ୍ଥାନରେ ରହିଥିଲେ। ଦେଖିବାକୁ ଗଲେ ୨୦୦୯ରୁ ଭାଜପାର ଭୋଟ ହାର କଂଗ୍ରେସ ତୁଳନାରେ ଅପେକ୍ଷାକୃତ ବୃଦ୍ଧି ପାଇଆସିଛି। ୨୦୨୪ ନିର୍ବାଚନକୁ ଦେଖିଲେ ଭାଜପାରୁ ଆଲୋକ ପୁନର୍ବାର ଟିକେଟ ପାଇବାର ସମ୍ଭାବନା ରହିଥିବା ଆଲୋଚନା ହେଉଛି। କାରଣ ଭାଜପାର ସେଭଳି ଆଖିଦୃଶିଆ ବିକଳ୍ପ ନ ଥିବାରୁ ଏଭଳି ସ୍ଥିତି ସୃଷ୍ଟି ହୋଇଛି। ତେବେ ବିଜେଡିରେ ନବାଗତ ଆଶାୟୀଙ୍କ ସଂଖ୍ୟା ବଢ଼ୁଥିବାରୁ ବରିଷ୍ଠମାନେ ନାନା ଆଶଙ୍କା ଭିତରେ ରହିଛନ୍ତି। ପୁଣି ଶୁଣିବାକୁ ମିଳୁଛି, ବିଜେଡି ଟିକେଟ ନ ପାଇଲେ ସେହି ବ୍ୟକ୍ତିଙ୍କୁ ଭାଜପା ଟାର୍ଗେଟ କରିପାରେ। ଅନ୍ୟପକ୍ଷରେ ୨୦୨୪ରେ ଭେଟେରାନ ଜୟଦେବ ପୁନର୍ବାର କଂଗ୍ରେସ ଟିକେଟରେ ନିର୍ବାଚନକୁ ଓହ୍ଲାଇପାରନ୍ତି କିମ୍ବା ଆବଶ୍ୟକ ପଡ଼ିଲେ ତାଙ୍କ ପୁଅ ମନୋଜଙ୍କୁ ମଇଦାନକୁ ଛାଡ଼ିପାରନ୍ତି ବୋଲି ଚର୍ଚ୍ଚା ହେଉଛି।