ଛତ୍ରପୁର,୨୯ା୩(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ନିର୍ବାଚନମଣ୍ଡଳୀ ଅଧୀନରେ ଥିବା ୩ ଏନ୍ଏସି ଛତ୍ରପୁର, ଗଞ୍ଜାମ ଓ ରମ୍ଭାରେ ବିଜେଡିର ପରାଜୟ ହୋଇଛି। ଏହି ୩ ଏନ୍ଏସି ଅଧ୍ୟକ୍ଷ ଆସନ ବିଜେଡି ହାତରୁ ଖସିଯାଇଛି। ଗତ ପୌର ନିର୍ବାଚନରେ ବିଜେଡି ଏହି ୩ ଗୋଟି ଏନ୍ଏସି ଦଖଲ କରିଥିଲା। ଦଳୀୟ ପ୍ରାର୍ଥୀ ଅଧ୍ୟକ୍ଷ ହୋଇଥିଲେ। ସେତେବେଳେ ଛତ୍ରପୁର ବିଧାୟକ ବି ବିଜେଡିର ନ ଥିଲେ। ହେଲେ ଚଳିତଥର ବିଜେଡି ଏସବୁ ଆସନ ହରାଇଛି। ଛତ୍ରପୁର ଓ ରମ୍ଭା ଏନ୍ଏସି ଅଧ୍ୟକ୍ଷା ଆସନ ଭାଜପା ଅକ୍ତିଆର କରିଥିବାବେଳେ ସ୍ବାଧୀନ ପ୍ରାର୍ଥୀ ଗଞ୍ଜାମ ଏନ୍ଏସି ଅଧ୍ୟକ୍ଷା ଆସନ ଦଖଲ କରିଛନ୍ତି। ଟିକେଟ ବଣ୍ଟନରେ ତ୍ରୁଟି ବିଜେଡି ପରାଜୟର ବଡ଼ କାରଣ କୁହାଯାଉଛି। ଏହା ୨୦୨୪ ସାଧାରଣ ନିର୍ବାଚନ ପୂର୍ବରୁ ଛତ୍ରପୁର ବିଧାୟକ ଓ ବ୍ରହ୍ମପୁର ଏମ୍ପିଙ୍କୁ ଝଟକା ବୋଲି ରାଜନୈତିକ ସମୀକ୍ଷାକମାନେ କହୁଛନ୍ତି।
ଛତ୍ରପୁର ଏନ୍ଏସିର ୧୪ ୱାଡରୁ ୧୦ଟିରେ ବିଜେଡିର କାଉନସିଲର ପ୍ରାର୍ଥୀ ବିଜୟୀ ହୋଇଥିବା ବେଳେ ୧,୨ ଓ ୧୪ ନମ୍ବର ୱାର୍ଡରେ ଭାଜପା ଏବଂ ୧୦ ନଂ. ୱାର୍ଡରେ ସ୍ବାଧୀନ ପ୍ରାର୍ଥୀ ବିଜୟୀ ହୋଇଛନ୍ତି। ଅନ୍ୟପକ୍ଷରେ ବିଜେଡି ଏନ୍ଏସି ଅଧ୍ୟକ୍ଷା ପ୍ରାର୍ଥିନୀ ି ଟି. ଲକ୍ଷ୍ମୀ ୮୧୮ ଭୋଟ ବ୍ୟବଧାନରେ ତାଙ୍କ ନିକଟତମ ପ୍ରତିଦ୍ବନ୍ଦ୍ୱୀ ଭାଜପାର ଶର୍ମିଷ୍ଠା ପ୍ରଧାନଙ୍କଠାରୁ ପରାଜିତ ହୋଇଛନ୍ତି। ସୂଚନାଯୋଗ୍ୟ, ୨୦୦୮ ନିର୍ବାଚନରେ ଟି. ଲକ୍ଷ୍ମୀ କଂଗ୍ରେସରୁ ପ୍ରାର୍ଥୀ ହୋଇ ଏନ୍ଏସି ଅଧ୍ୟକ୍ଷା ନିର୍ବାଚିତ ହୋଇଥିଲେ। ଚଳିତଥର ସେ ବିଜେଡିରୁ ପ୍ରାର୍ଥୀ ହୋଇ ପରାଜିତ ହୋଇଛନ୍ତି । ଭାଜପା ଜିତିଥିବା ୧,୨ ଓ ୧୪ ନମ୍ବର ୱାର୍ଡରୁ ଅଧ୍ୟକ୍ଷା ପ୍ରାର୍ଥୀଙ୍କୁ ବହୁ କମ୍ ଭୋଟ ମିଳିଛି। ବିଭିନ୍ନ ଓ୍ବାର୍ଡରେ ବିଜେଡି ଏଥର ଦଳୀୟ ଲୋକଙ୍କ ବଦଳରେ ବାହାରୁ ଆସିଥିବା ଲୋକଙ୍କୁ ଟିକେଟ ଦେଇଥିଲା। କେତେଜଣ କାଉନ୍ସିଲର ୨ ଅଙ୍କ ଭୋଟ ବ୍ୟବଧାନରେ ଜିତିଛନ୍ତି। ସେହିପରି ଗଞ୍ଜାମ ଏନ୍ଏସିରେ ମଧ୍ୟ ଦଳୀୟ ଲୋକଙ୍କୁ ଟିକେଟ ନ ଦେଇ ଦଳୀୟ ନେତାଙ୍କ ସମ୍ପର୍କୀୟଙ୍କୁ ଟିକେଟ ଦିଆଯାଇଥିଲା। ଏଥିଯୋଗୁ ସେଠାରେ ସମୀକରଣ ବଦଳିଯାଇଥିଲା। ଜଣେ ସ୍ବାଧୀନ ଅଧ୍ୟକ୍ଷା ପ୍ରାର୍ଥିନୀଙ୍କୁ ବିଭିନ୍ନ ବର୍ଗ ଓ ସଙ୍ଗଠନ ପକ୍ଷରୁ ସମର୍ଥନ ଦିଆଯିବା ସହ ପ୍ରଚାରରେ ସାମିଲ ହୋଇଥିଲେ । ଶେଷରେ ସେ ଅଧ୍ୟକ୍ଷା ଆସନରେ ବସିପାରିଛନ୍ତି । ଦଳୀୟ ଟିକେଟ ନେଇ ବିଜେଡିରେ ଅସନ୍ତୋଷ ଲାଗି ରହିଥିଲା। କେତେଜଣ ନେତା ନୀରବ ରହିଥିବା ବେଳେ ଆଉ କେତେଜଣଙ୍କୁ ବିଜେଡି ଗୁରୁତ୍ୱ ଦେଇ ନ ଥିଲା । ଏଥିଲାଗିି ଗଞ୍ଜାମ ଏନ୍ଏସି ଫଳାଫଳରେ ମହଙ୍ଗା ପଡ଼ିଛି। ସେହିପରି ରମ୍ଭା ଏନ୍ଏସି ଫଳାଫଳ ବିଜେଡିକୁ ଶକ୍ତ ଧକ୍କା ଦେଇଛି । ଏଠାରେ ଭାଜପା ଅଧ୍ୟକ୍ଷା ଆସନ ଅକ୍ତିଆର କରିଥିବାବେଳେ ଦଳ ନିଜ ସ୍ଥିତିକୁ ସୁଦୃଢ଼ କରିପାରିଛି। ପୂର୍ବତନ ଏନ୍୍ଏସି ଅଧ୍ୟକ୍ଷାଙ୍କ ସମ୍ପର୍କୀୟଙ୍କୁ ବିଜେଡି ପୁଣି ଅଧ୍ୟକ୍ଷା ପ୍ରାର୍ଥିନୀ କରିଥିବାରୁ ଦଳ ମଧ୍ୟରେ ଅସନ୍ତୋଷ ଲାଗି ରହିଥିଲା। ତାହାର ପ୍ରଭାବରୁ ଏନ୍ଏସି ହାତରୁ ଖସିଛି।