ଖୋର୍ଦ୍ଧା ଅଫିସ, ୩ା୨: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଲାଗି ଖୋର୍ଦ୍ଧା ଜିଲାରେ ପ୍ରଚାର ଜମି ଆସିଲାଣି। ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସର ପ୍ରାର୍ଥୀମାନେ ସୋସିଆଲ ମିଡିଆରେ ପ୍ରଚାର କରିବା ସହ ଘର ଘର ବୁଲି ଭୋଟ ମାଗିଲେଣି। ତେବେ ଏଥର ଶାସକ ଦଳ ବିଜେଡିର ରଣନୀତି ଆଗରେ ବିରୋଧୀ ଦଳଗୁଡ଼ିକର ରଣନୀତି ଫିକା ପଡ଼ିବ ବୋଲି ଚର୍ଚ୍ଚା ହେଉଛି।
ଜିଲାରେ ମୋଟ ୩୦ଟି ଜିଲାପରିଷଦ ଜୋନ, ୧୯୦ଟି ପଞ୍ଚାୟତ, ୧୫୪୬ଟି ଗ୍ରାମ ଏବଂ ୨୭୧୨ଟି ୱାର୍ଡ ରହିଛି। ଗତ ୨୦୧୭ ନିର୍ବାଚନରେ ୧୨ଲକ୍ଷରୁ ଊର୍ଦ୍ଧ୍ୱ ଭୋଟର ମତଦାନ କରିଥିଲେ। ଚଳିତବର୍ଷ ୧୦ଲକ୍ଷରୁ ଉର୍ଦ୍ଧ୍ୱ ଭୋଟର ମତଦାନ ସାବ୍ୟସ୍ତ କରିବେ। ୨୦୧୨ରେ ବିଜେଡି ୨୫ଟି ଆସନରେ ଜିତିଥିବା ବେଳେ କଂଗ୍ରେସ ଗୋଟିଏ, ଭାଜପା ଓ ଅନ୍ୟ ଦଳ ୨ଟି ଲେଖାଏ ଆସନରେ ବିଜୟ ଲାଭ କରିଥିଲେ। ୨୦୧୭ ନିର୍ବାଚନରେ ବିଜେଡି ୨୦ଟି ଏବଂ ଭାଜପା ୧୦ଟି ଜିଲାପରିଷଦ ଆସନରେ ଜିତିଥିଲା। କଂଗ୍ରେସ ଖାତା ଖୋଲିପାରି ନ ଥିଲା। ଗତ ୨୦୧୭ ନିର୍ବାଚନରେ ଖୋର୍ଦ୍ଧାର ୩ଟି ଜୋନରେ ବିଜେଡି, ଚିଲିକାର ୩ଟି ଜୋନରେ ଭାଜପା, ଜଟଣୀର ୨ଟି ଜୋନରେ ବିଜେଡି, ଟାଙ୍ଗୀର ୪ଟି ଜୋନ ମଧ୍ୟରୁ ଗୋଟିକରେ ଭାଜପା ଏବଂ ୩ଟିରେ ବିଜେଡି ବିଜୟ ଲାଭ କରିଥିଲା। ବାଣପୁରର ୩ଟି ଜୋନରୁ ବିଜେଡି ୧ ଓ ଭାଜପା ୨, ବାଲିଅନ୍ତାର ୩ ବିଜେଡି, ବାଲିପାଟଣାର ଭାଜପା ୧ ବିଜେଡି ୨, ବେଗୁନିଆର ଭାଜପା ୨, ବିଜେଡି୧, ବୋଲଗଡ଼ରେ ବିଜେଡି ୨, ଭାଜପା ୧ ଏବଂ ଭୁବନେଶ୍ୱର ବ୍ଲକର ୩ଟି ଜୋନରେ ବିଜେଡି ପ୍ରାର୍ଥୀ ବିଜୟ ଲାଭ କରିଥିଲେ। ୨୦୧୨ ଓ ୨୦୧୭ରେ ବିଜେଡିକୁ ବହୁମତ ମିଳିଥିବାରୁ ଜିଲାପରିଷଦ ଅଧ୍ୟକ୍ଷ ପଦ ବିଜେଡି ହାତରେ ରହିଥିଲା। ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ମଧ୍ୟ ସମସ୍ତ ବିଜେଡି ପ୍ରାର୍ଥୀ ବିଜୟ ଲାଭ କରିବେ ବୋଲି ଦଳୀୟ କର୍ମକର୍ତ୍ତା ଦୃଢୋକ୍ତି ପ୍ରକାଶ କରିଛନ୍ତି। ଏଥର ବିଜେଡି ନିଜ ଗଡ଼ ବଜାୟ ରଖିବା, ଭାଜପା ଅଧିକ ଆସନ ଦଖଲ କରିବା ଏବଂ କଂଗ୍ରେସ ଖାତା ଖୋଲିବା ପାଇଁ ଲାଗିପଡ଼ିଛନ୍ତି। ତେବେ ୩ ପ୍ରମୁଖ ଦଳରେ ଅନ୍ତଃକନ୍ଦଳ ରହିଛି। ସେହିପରି ଦଳୀୟ ଟିକେଟକୁ ନେଇ ବିଜେଡି କର୍ମୀଙ୍କ ମଧ୍ୟରେ ଅସନ୍ତୋଷ ତେଜୁଛି।
ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସ୍ବଚ୍ଛ ଭାବମୂର୍ତ୍ତି ଓ ବିକାଶ ଏଜେଣ୍ଡାକୁ ବିଜେଡି ଅସ୍ତ୍ର କରିଥିବା ବେଳେ ଭାଜପା କେନ୍ଦ୍ର ସରକାରଙ୍କ ସଫଳତା ଏବଂ କଂଗ୍ରେସ କେନ୍ଦ୍ର ଓ ରାଜ୍ୟ ସରକାରଙ୍କ ବିଫଳତାକୁ ଅସ୍ତ୍ର କରିଥିବା ଜଣାପଡ଼ିଛି। କର୍ମୀ ସମାବେଶ ଓ ବୈଠକ ଜରିଆରେ ବିଜେଡି ସମର୍ଥନ ହାସଲ ପ୍ରକ୍ରିୟା ଜାରି ରଖିଛି। ଅନ୍ୟପଟେ କଂଗ୍ରେସର ପ୍ରାର୍ଥୀଙ୍କ ପ୍ରଚାର ପାଇଁ ପାଣ୍ଠି ସମସ୍ୟା ଦେଖାଦେଇଛି। ଖୋର୍ଦ୍ଧାର ୮ଟି ବିଧାନସଭା ଆସନ ମଧ୍ୟରୁ କେବଳ ଜଟଣୀ କଂଗ୍ରେସ କବ୍ଜାରେ ରହିଛି। ତେଣୁ କଂଗ୍ରେସ ପାଇଁ ବିଜୟ ଲାଭ ଏତେ ସହଜ ହେବନାହିଁ। ଆଗାମୀ ୨୦୨୪ ସାଧାରଣ ନିର୍ବାଚନ ଉପରେ ୨୦୨୨ ପଞ୍ଚାୟତ ନିର୍ବାଚନ ଫଳାଫଳ ପ୍ରଭାବ ପକାଇପାରେ। ଏହାକୁ ଦୃଷ୍ଟିରେ ରଖି ଭାଜପା ଓ ବିଜେଡି ପକ୍ଷରୁ ନିଜ ପ୍ରାର୍ଥୀଙ୍କୁ ଜିତାଇବା ଲାଗି ଜୋରଦାର ଉଦ୍ୟମ ଚାଲିଛି। ବରିଷ୍ଠ ନେତାମାନେ ନିଜ ନିର୍ବାଚନମଣ୍ଡଳୀରେ ଡେରା ପକାଇଛନ୍ତି। ପ୍ରଚାରରେ ବିଜେଡି ଆଗୁଆ ଥିବାବେଳେ ଭାଜପା ଓ କଂଗ୍ରେସ ପଛରେ ପଡ଼ିଛନ୍ତି। ବିଜେଡିର ରଣନୀତି ବିରୋଧୀଙ୍କ ପାଇଁ ଚିନ୍ତାର କାରଣ ହୋଇଛି।