ଭୁବନେଶ୍ୱର,୨୪।୫: ନିର୍ବାଚନୀ ପାଗ ଭିତରେ ଥମୁନି ରାଜନୈତିକ ଆରୋପ ପ୍ରତ୍ୟାରୋପ। ରାଜଧାନୀ ପାଗ ମିଜାଜ ବଦଳୁଥିବାବେଳେ ସେଥିରେ ରାଜନୀତିର ପାରା କିନ୍ତୁ ଉପରମୁହାଁ ଧରିଛି। ଏହାରି ଭିତରେ ଭାଜପା ନେତାଙ୍କୁ କିଛି ନିଆରା ଶୈଳୀରେ ଟାର୍ଗେଟ କରିଛନ୍ତି ବିଜେଡି ନେତା । ଓଡିଶା ଭାଜପା ନେତାଙ୍କୁ ତୁରନ୍ତ ମାନସିକ ରୋଗ ପାଇଁ ଚିକିତ୍ସା ଯୋଗାଇ ଦେବାକୁ ଏସସିବି ମନସ୍ତାତ୍ୱିକ ବିଭାଗକୁ ଚିଠି ଲେଖିଛନ୍ତି ବିଜେଡି ନେତା। ଏକ ପ୍ରେସ ରିଲିଜ ଯୋଗେ ଭାଜପା ନେତାଙ୍କ ତାଲିକା ଦେଇଛି ବିଜେଡି । ଆଉ ଏଥିରେ କିଛି ନେତାଙ୍କ ନାଁ ମଧ୍ୟ ରଖିଛି ବିଜେଡି ।
ବିଜେଡି ପ୍ରେସ ରିଲିଜରେ କହିଛି ଯେ, ତାଙ୍କ ପ୍ରତିପକ୍ଷ ଓଡିଶା ଭାଜପାର କିଛି ନେତାଙ୍କ ମାନସିକ ସ୍ଥିତି ଦେଖି ଆମେ ଗଭୀର ଭାବେ ଚିନ୍ତିତ । ୨୦୨୪ ନିର୍ବାଚନ ଅତି ଶୋଚନୀୟ ଭାବେ ହାରିବାକୁ ଯାଉଥିବାରୁ, ସେମାନେ ନିଜ ମାନସିକ ଭାରସାମ୍ୟ ହରାଇ ପ୍ରତିଦିନ ବାଚଳାମି କରୁଛନ୍ତି ବୋଲି କହିଛି ବିଜେଡି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବୈଜୟନ୍ତ ପଣ୍ଡା, ଏମପି ଅପରାଜିତା ଷଡଙ୍ଗୀ ଏବଂ ପୂର୍ବତନ ରାଜ୍ୟ ସଭାପତି ସମୀର ମହାନ୍ତିଙ୍କ ନାଁ ଉଲ୍ଲେଖ କରି ସେମାନଙ୍କର ଚିକିତ୍ସା କରିବାକୁ କହିଛି ବିଜେଡି । ତେବେ ଏନେଇ ବର୍ତ୍ତମାନ ସୁଦ୍ଧା ଓଡ଼ିଶା ଭାଜପା ନେତାଙ୍କ ପ୍ରତିକ୍ରିୟା ଆସିନାହିଁ ।