ଯାଜପୁର,୧୦।୧୧(ହର୍ଷବର୍ଦ୍ଧନ ବେହେରା): ଯାଜପୁର ଜିଲା ବିଞ୍ଝାରପୁର ନିର୍ବାଚନମଣ୍ଡଳୀ ଅନ୍ତର୍ଗତ ରାହାସୋଇ ପଞ୍ଚାୟତରେ ସରକାରୀ ଅନୁଦାନ ହରିଲୁଟ୍ ଏବଂ ବିଭିନ୍ନ ଉନ୍ନୟନ କାର୍ଯ୍ୟରେ ଦୁର୍ନୀତି ବଢ଼ିବାରେ ଲାଗିଥିବା ଅଭିଯୋଗ ହେଉଛି। ଏନେଇ ସୂଚନା ଅଧିକାର (ଆର୍ଟିଆଇ) ଆଇନ ବଳରେ ସମସ୍ତ ପ୍ରକଳ୍ପର ସବିଶେଷ ତଥ୍ୟ ମାଗିବାରୁ ଆର୍ଟିଆଇ କର୍ମୀ ଅଶୋକ କୁମାର ପତି ଏବଂ ତାଙ୍କ ସ୍ତ୍ରୀଙ୍କୁ ମରଣାନ୍ତକ ଆକ୍ରମଣ ହୋଇଛି। ଏହାକୁ ନେଇ ବିଭିନ୍ନ ମହଲରେ ନିନ୍ଦା କରାଯାଉଥିବାବେଳେ ଘଟଣାକୁ ନେଇ ରାଜନୀତି ଜୋର ଧରିଛି। ଯାଜପୁର ଜିଲା ଭାଜପା ସଭାପତି ଗୌତମ ରାୟ କହିଛନ୍ତି, ଯେଉଁମାନେ ଆକ୍ରମଣ କରିଛନ୍ତି ସେମାନେ ସରପଞ୍ଚଙ୍କ ସମର୍ଥକ। ଏହି ଘଟଣାରେ ବଡ଼ବଡ଼ିଆଙ୍କ ହାତ ରହିଛି। ସମ୍ପୃକ୍ତ ସରପଞ୍ଚ ବିଜେଡିର ସମର୍ଥକ ହୋଇଥିବାବେଳେ ରାହାସୋଇ ପଞ୍ଚାୟତରେ ଦୁର୍ନୀତି ଚରମସୀମାରେ ପହଞ୍ଚିଛି। ତେଣୁ ଘଟଣାର ଉପଯୁକ୍ତ ତଦନ୍ତ କରି ବାସ୍ତବତା ଲୋକଲୋଚନକୁ ଆସିବା କଥା। ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରକାର ତପତ୍ରତା ପ୍ରକାଶ କରିଥିବା ରାୟ କହିଛନ୍ତି। ସେହିପରି ବିଞ୍ଝାରପୁରରେ ଗତ ବିଧାନସଭା ନିର୍ବାଚନରେ ଭାଜପା ପକ୍ଷରୁ ପ୍ରାର୍ଥୀ ହୋଇଥିବା ବବିତା ମଲ୍ଲିକ କହିଛନ୍ତି, ରାଜ୍ୟରେ ୨୪ ବର୍ଷର ବିଜେଡି ସରକାରର ପତନ ଘଟିଥିଲେ ସୁଦ୍ଧା ସେହି ଦଳର କର୍ମୀମାନଙ୍କ ଅହଙ୍କାରର ପତନ ଘଟିନାହିଁ। ଯେଉଁ ବିଜେଡି ଦିନେ ମା’କୁ ସମ୍ମାନ ଗାଁକୁ ଯାଇ କାମ କର ସ୍ଲୋଗାନ ଦେଉଥିଲା, ତାହାର ଓଲଟା ରାହାସୋଇ ଗ୍ରାମରେ ଦେଖିବାକୁ ମିଳିଛି। ଏହି ଘଟଣା ସମ୍ପର୍କରେ ବିଞ୍ଝାରପୁରରୁ ୭ ଥର ନିର୍ବାଚିତ ବିଧାୟିକା ଓ ବିଜେଡି କାହିଁକି ଚୁପ୍ ବୋଲି ବବିତା ପ୍ରଶ୍ନ କରିଛନ୍ତି। ଅନ୍ୟପକ୍ଷରେ ବିଞ୍ଝାରପୁର ବିଧାୟିକା ପ୍ରମିଳା ମଲ୍ଲିକ କହିଛନ୍ତି, ଘଟଣାର ପୋଲିସ ତଦନ୍ତ କରୁଛି। ଯିଏ ଦୋଷୀ, ସେମାନେ ନିଶ୍ଚିତ ଭାବେ ଦଣ୍ଡ ପାଇବା ଆବଶ୍ୟକ। ଯେଉଁ ଘଟଣାଟି ଘଟିଛି ତାହା ଆଦୌ ଗ୍ରହଣୀୟ ନୁହେଁ।