ଦେବଗଡ,୪ା୬(ଶଶାଙ୍କଶେଖର ଝାଙ୍କର): ଦେବଗଡ଼ ବିଧାନସଭା ନିର୍ବାଚନମଣ୍ଡଳୀରେ ବିଜେଡି ପ୍ରାର୍ଥୀ ରୋମାଞ୍ଚରଞ୍ଜନ ବିଶ୍ୱାଳ ତାଙ୍କର ନିକଟତମ ପ୍ରତିଦ୍ୱନ୍ଦୀ ଭାଜପା ପ୍ରାର୍ଥୀ ସୁବାସ ଚନ୍ଦ୍ର ପାଣିଗ୍ରାହୀଙ୍କୁ ୧୫୭୯୨ଟି ଭୋଟରେ ପରାସ୍ତ କରି ବିଜୟୀ ହୋଇଛନ୍ତି। ବିଜେଡି ପ୍ରାର୍ଥୀ ବିଶ୍ୱାଳ ୮୯୦୭୪ ଖଣ୍ଡ ଭୋଟ ପାଇଥିବାବେଳେ ଭାଜପା ପ୍ରାର୍ଥୀ ପାଣିଗ୍ରାହୀ ୭୩୨୮୨ ଖଣ୍ଡ ଭୋଟପାଇ ଦ୍ୱିତୀୟ ସ୍ଥାନରେ ରହିଛନ୍ତି। ସେହିପରି କଂଗ୍ରେସ ପ୍ରାର୍ଥୀ ସେମ ହେମ୍ରମ ୨୮୨୭୯ ଖଣ୍ଡ ଭୋଟପାଇ ତୃତୀୟ ସ୍ଥାନରେ ରହିଛନ୍ତି। ଅନ୍ୟପକ୍ଷରେ ପ୍ରାଉଟିଷ୍ଟ ବ୍ଲକ ଅଫ ଇଣ୍ଡିଆର ପ୍ରାର୍ଥୀ ଡୋଳାକର ଭୋଇ ୯୦୫ ଖଣ୍ଡ, ସ୍ବାଧୀନ ପ୍ରାର୍ଥୀ ଜ୍ୟୋତି ଜୁଲିଆନ ଲାକ୍ରା ୪୬୨ ଖଣ୍ଡ, ନିରାକାର ପ୍ରଧାନ ୫୬୩ ଖଣ୍ଡ, ପ୍ରମୋଦ କୁମାର ଝାଙ୍କର ୧୪୫୪ ଖଣ୍ଡ ଓ ଶ୍ରୀମନ୍ତ ସାହୁ ୧୦୮୭ ଖଣ୍ଡ ଭୋଟ ପାଇଛନ୍ତି।
ସେହିପରି ୨୭୬୭ ଖଣ୍ଡ ଭୋଟ ନୋଟାରେ ପଡିଥିବା ଜଣାପଡିଛି। ସ୍ଥାନୀୟ ପଲିଟେକ୍ନିକ କଲେଜରେ ମଙ୍ଗଳବାର ସକାଳୁ ଜିଲା ନିର୍ବାଚନ ଅଧିକାରୀ ତଥା ଜିଲାପାଳ ସୋମେଶ କୁମାର ଉପାଧ୍ୟାୟଙ୍କ ତତ୍ତ୍ୱାବଧାନରେ ମତଗଣନା ଆରମ୍ଭ ହୋଇଥିଲା। ନିର୍ବାଚନରେ ବିଜେଡି ପ୍ରାର୍ଥୀ ବିଶ୍ୱାଳଙ୍କ ବିଜୟପରେ ଦଳୀୟ ପଦାଧିକାରୀ, କର୍ମକର୍ତ୍ତା ଓ ତାଙ୍କର ସମର୍ଥକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା।