ହିଞ୍ଜିଳିକାଟୁ,୨୬ା୧୨: ଗଞ୍ଜାମ ଜିଲା ହିଞ୍ଜିଳିକାଟୁ ବ୍ଲକ ଓ ପୌରାଞ୍ଚଳ ବିଜେଡି ପକ୍ଷରୁ ମିଳିତ ଭାବରେ ଶନିବାର ହିଞ୍ଜିଳିକାଟୁଠାରେ ଦଳର ୨୪ତମ ପ୍ରତିଷ୍ଠା ଦିବସ ପାଳିତ ହୋଇଯାଇଛି। ପୂର୍ବାହ୍ନରେ ଦଳର ନେତା ଓ କର୍ମୀ ପୂର୍ତ୍ତ ବିଭାଗ ଡାକବଙ୍ଗଳାରୁ ରାଲିରେ ବାହାରି ବିଜୁ ପଟ୍ଟନାୟକ କଲ୍ୟାଣ ମଣ୍ଡପ ଓ ବିଜୁ ଶିଶୁ ଉଦ୍ୟାନରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ। ଶିଶୁ ଉଦ୍ୟାନ ନିକଟରେ ଏକ ସଭାର ଆୟୋଜନ କରାଯାଇଥିଲା। ନଗର ସଭାପତି ଭୀମସେନ ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ବ୍ଲକ ସଭାପତି ସୁରେନ୍ଦ୍ର ପ୍ରଧାନ, ପୂର୍ବତନ ବିଧାୟକ ହରିହର ସାହୁ, ଡି ବିଶ୍ୱନାଥ, ସୁବାସ ପଲେଇ, ପବିତ୍ର ମୋହନ ପାଣିଗ୍ରାହୀ ପ୍ରମୁଖ ମଞ୍ଚାସୀନ ଥିଲେ। ରାଜ୍ୟର ଉନ୍ନତି ଓ ଜାତୀୟ ସ୍ତରରେ ହକ ଅଧିକାର ଲଢ଼େଇ କେବଳ ବିଜେଡି ରାଜନୈତିକ ଦଳ କରୁଛି ବୋଲି ନେତାମାନେ ମତ ରଖିଥିଲେ। ଏଥିରେ ଯୁବ ବିଜେଡି ସଭାପତି ସଞ୍ଜୟ ପଣ୍ଡା, ମନୋଜ ସାବତ, ଅଜୟ ମହାରଣା, ପ୍ୟାରୀ ପାଢ଼ୀ, ନୀଳମଣି ପଟ୍ଟନାୟକଙ୍କ ସମେତ ଦଳର ବହୁ ସରପଞ୍ଚ, ସମିତିସଭ୍ୟ, ଯୁବ ଛାତ୍ରନେତା ସାମିଲ ଥିଲେ।