ନୟାଗଡ଼ ଅଫିସ,୧୦।୨: ଗୋତିସାହି, ହରିହରପୁର, ମଗରବନ୍ଧ, ପଞ୍ଚରିଡ଼ାମାନପୁର, ଶରଣକୁଳ, ସୋଲପଟା, ଗୋଡ଼ିପଲ୍ଲୀ ପଞ୍ଚାୟତକୁ ନେଇ ନୟାଗଡ଼ ଜିଲା ଓଡ଼ଗାଁ ବ୍ଲକର ୩ନଂ. ଜୋନ୍ ଗଠିତ । ଏଠାରେ ୪ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। କୁମାରୀ ପାତ୍ର ଭାଜପାରୁ ପ୍ରାର୍ଥୀ ହୋଇଥିବାବେଳେ ସସ୍ମିତା କୁମାରୀ ଦାଶ କଂଗ୍ରେସରୁ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ଚିନ୍ମୟୀ ଦାଶ ବିଜେଡି ପ୍ରାର୍ଥୀ ହୋଇଥିବାବେଳେ ଭାରତର କମ୍ୟୁନିଷ୍ଟ ପାର୍ଟି (ମାକ୍ସବାଦୀ)ରୁ ଜ୍ୟୋତିପ୍ରଭା ଜେନା ନିର୍ବାଚନ ଲଢ଼ୁଛନ୍ତି । ତେବେ ସରପଞ୍ଚ ଓ ସମିତି ସଭ୍ୟ ପଦବୀ ଦଳୀୟ ହୋଇ ନ ଥିଲେ ମଧ୍ୟ ଏଠାରେ ଶାସକ ବିଜେଡିର ସମର୍ଥନରେ ପ୍ରାର୍ଥୀ ଚୟନ ଦଳର ଭୋଟକୁ ବିଭାଜନ କରୁଛି। ଅଧିକାଂଶ ପ୍ରାର୍ଥୀ ନିଜ ପାଇଁ ଭୋଟ ମାଗୁଥିବାବେଳେ ଜିଲା ପରିଷଦ ଭୋଟ ଯାହାକୁ ଦିଅନ୍ତୁ ଚଳିବ ବୋଲି କହୁଛନ୍ତି। ଏଭଳି ସ୍ଥଳେ ବିଜେଡି ଜିଲା ପରିଷଦ ପ୍ରାର୍ଥୀ କାହାକୁ ସହଯୋଗ କରିବେ ଜାଣି ପାରୁନାହାନ୍ତି। ଯାହାକି ବିଜେଡି ପାଇଁ ମୁଣ୍ଡବ୍ୟଥାର କାରଣ ପାଲଟିଛି । ଏସବୁସତ୍ତ୍ୱେ ଭାଜପା ଗଡ଼କୁ ବିଜେଡି ଦଖଲ କରିବାକୁ ପ୍ରାର୍ଥୀ ଚିନ୍ମୟୀ ଦାଶ ଲକ୍ଷ୍ୟ ରଖି ପ୍ରଚାରକୁ ତ୍ୱରାନ୍ବିତ କରିଛନ୍ତି ।
୨୦୧୭ ପଞ୍ଚାୟତ ନିର୍ବାଚନରେ ଏହି ଜୋନ୍ ଭାଜପା ଦଖଲରେ ଥିଲା । ସନ୍ୟାସୀ ପ୍ରଧାନ ଜିଲାପରିଷଦ ସଭ୍ୟ ଥିଲେ । ତେବେ ବିଜେଡିର ଟାର୍ଗେଟକୁ ଟକ୍ଟର ଦେବାକୁ ଭାଜପା ରଣନୀତି ପ୍ରସ୍ତୁତ କରି ନିର୍ବାଚନ ପ୍ରଚାର କରୁଛି । ଭାଜପା ପକ୍ଷରୁ କେନ୍ଦ୍ର ସରକାରଙ୍କ ବିଭିନ୍ନ ଲୋକହିତକର ଯୋଜନା, ବିଜେଡି କିପରି କେନ୍ଦ୍ର ସରକାରଙ୍କ ଯୋଜନାକୁ ହାଇଜାକ୍ କରୁଛି ସେନେଇ ପ୍ରଚାର ଚାଲିଛି । ପୁଣି ବିଜେଡି ସରକାର ସମୟରେ ହୋଇଥିବା ୩ନଂ. ଜୋନ୍ରେ ବିଭିନ୍ନ ଦୁର୍ନୀତି ନେଇ ଭୋଟରଙ୍କୁ ଅବଗତ କରାଉଛନ୍ତି । ବିଜେଡି ପ୍ରାର୍ଥୀ,ନେତା ପଛରେ ପଡ଼ିନାହାନ୍ତି। ସେମାନେ କେନ୍ଦ୍ରସରକାରଙ୍କ ବିଭିନ୍ନ ଦୋଷ ଦୁର୍ବଳତା,ଓଡ଼ିଶାକୁ ଅଣଦେଖା ନେଇ ଭୋଟରଙ୍କୁ ଭେଟୁଛନ୍ତି । ପୁଣି ନବୀନ ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ବଖାଣୁଛନ୍ତି । ଜିତିଲାପରେ କ’ଣ କରିବେ ନୂଆନୂଆ ପ୍ରତିଶ୍ରୁତି ଦେଉଛନ୍ତି। ଅନ୍ୟପକ୍ଷେ କଂଗ୍ରେସ ଚୁପ ବସିନାହିଁ। ଏହି ଜୋନ୍ରେ ବିଜେଡି ପ୍ରାର୍ଥୀ ଚିନ୍ମୟୀ ଦାଶଙ୍କ ଯାଆ ସସ୍ମିତା କୁମାରୀ ଦାଶ ପ୍ରାର୍ଥୀ ହୋଇଛନ୍ତି । ସସ୍ମିତା ଉଭୟ ବିଜେଡି ଓ ଭାଜପା ସରକାରଙ୍କ ଦୋଷ ଦୁର୍ବଳତାକୁ ଲୋକଲୋଚନକୁ ଆଣି ପରିବର୍ତ୍ତନର ହାୱା ବାଣ୍ଟୁଛନ୍ତି । ଲୋକଙ୍କ ନିକଟରେ ଉଭୟଦଳ କିପରି ଭୋଟରଙ୍କୁ ପ୍ରତାରଣା କରୁଛନ୍ତି ତାହା କହୁଛନ୍ତି । ଭାରତର କମ୍ୟୁନିଷ୍ଟ ପାର୍ଟି (ମାକ୍ସବାଦୀ)ମଧ୍ୟ ପଛରେ ପଡ଼ି ନାହାନ୍ତି। ଭୋଟର ସବୁ ଦେଖୁଛନ୍ତି,ଶୁଣୁଛନ୍ତି କି଼ନ୍ତୁ କିଛି କହୁ ନାହାନ୍ତି। ତେବେ ଗୋଟିଏ କଥା ଦେଖିବାକୁ ମିଳୁଛି ଭୋଟର ବଦଳିବାରେ ଲାଗିଛନ୍ତି । ଗ୍ରାମାଞ୍ଚଳରେ ବିଭିନ୍ନ ସମସ୍ୟା ଥିଲେ ମଧ୍ୟ ବିକାଶ ଚାଲିଛି ବୋଲି ସରକାର ଡିଣ୍ଡିମ ପିଟୁଛନ୍ତି। ହେଲେ ଭୋଟର ଏହାର ଠିକ୍ ଜବାବ ଦେବେ ବୋଲି କେତେଜଣ ଭୋଟର ନିଜ ନାମ ଗୋପନ ରଖି କହିଛନ୍ତି ।