କୋଲକାତା,୩୦।୮: କୋଲକାତା ବଳାତ୍କାର-ହତ୍ୟା ମାମଲାକୁ ନେଇ ଚାଲିଥିବା ବିରୋଧ ମଧ୍ୟରେ ଚିଠି ଉପରେ ରାଜନୀତି ଚାଲିଛି। ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ପୁଣି ଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି। ଏଥିରେ ସେ କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ପୂର୍ବ ଚିଠି ସମ୍ପର୍କରେ କୌଣସି ଉତ୍ତର ମିଳିନାହିଁ। ଏହାପରେ ଭାଜପା କହିଛି, ମମତା ବାନାର୍ଜୀ ଜଣେ ମିଥ୍ୟାବାଦୀ। ତାଙ୍କୁ ସରକାରଙ୍କ ପକ୍ଷରୁ ଜବାବ ମିଳିଛି। ଚିଠି ଲେଖିବା ପରିବର୍ତ୍ତେ ମମତାଙ୍କୁ ପ୍ରଶ୍ନର ଉତ୍ତର ଦେବା ଉଚିତ୍।
କୋଲକାତାର ଟ୍ରେନି ମହିଳା ଡାକ୍ତରଙ୍କ ସହ ହୋଇଥିବା ଅତ୍ୟାଚାରକୁ ନେଇ ଡାକ୍ତରମାନେ ପ୍ରଦର୍ଶନ କରୁଛନ୍ତି। ଏହି ମାମଲାର ତଦନ୍ତ ସିବିଆଇ ହାତରେ ଅଛି। ଏହି ସମୟରେ ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଦିଆଯାଉ ବୋଲି ସବୁ ଦିଗରୁ ଦାବି ଉଠିଛି। ଏପରି ଦାବି କରୁଥିବା ଲୋକଙ୍କ ମଧ୍ୟରେ ମମତା ବାନାର୍ଜୀ ମଧ୍ୟ ଅନ୍ତର୍ଭୁକ୍ତ । ଅଗଷ୍ଟ ୨୨ରେ ମମତା ପ୍ରଧାନମନ୍ତ୍ରୀ ମୋଦିଙ୍କୁ ଏକ ଚିଠି ଲେଖିଥିଲେ ଯେଉଁଥିରେ ବଳାତ୍କାରର ଅପରାଧୀଙ୍କ ପାଇଁ ସରକାର କଠୋର ଆଇନ ପ୍ରଣୟନ କରିବାକୁ ଦାବି କରିଥିଲେ। ହେଲେ ପ୍ରଧାନମନ୍ତ୍ରୀଙ୍କଠାରୁ କିଛି ଉତ୍ତର ପାଇନଥିବା ଦର୍ଶାଇ ପୁଣି ଥରେ ମମତା ପିଏମ ମୋଦିଙ୍କୁ ଚିଠି ଲେଖିଛନ୍ତି।
ପ୍ରଧାନମନ୍ତ୍ରୀ ମୋଦିଙ୍କୁ ଲେଖାଯାଇଥିବା ଚିଠିର ଉତ୍ତରରେ ଭାଜପା ନେତା ଅମିତ ମାଲଭିଆ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଅନ୍ନପୂର୍ଣ୍ଣା ଦେବୀଙ୍କ ଚିଠିକୁ ଶେୟାର କରି ମମତାଙ୍କୁ ମିଥ୍ୟାବାଦୀ ବୋଲି କହିଛନ୍ତି। ସେ କହିଛନ୍ତି, ମମତା ବାନାର୍ଜୀ ଜଣେ ମିଥ୍ୟାବାଦୀ। କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଅନ୍ନପୂର୍ଣ୍ଣା ଦେବୀ ଅଗଷ୍ଟ ୨୫ରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀଙ୍କୁ ଉତ୍ତର ଦେଇଥିଲେ।