Advertisement

ଭାଜପା-ବିଜେଡିର ଦୁଇ ଗୋଷ୍ଠୀ ମଧ୍ୟରେ ମାର୍‌ପିଟ୍‌, ଘଟଣାସ୍ଥଳରେ ଉତ୍ତେଜନା

କେନ୍ଦୁଝର,୮ା୧(ନରେଶ ଚନ୍ଦ୍ର ପଟ୍ଟନାୟକ): ରାସ୍ତା ଜାମକୁ ନେଇ ବୁଧବାର ସନ୍ଧ୍ୟାରେ ଭାଜପା ଓ ବିଜେଡିର ଦୁଇ ଗୋଷ୍ଠୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା। ଉଭୟ ଦଳର ସମର୍ଥକଙ୍କ ମଧ୍ୟରେ ମାର୍‌ପିଟ୍‌ ହେବାରୁ ଉତ୍ତେଜନା ପରିସ୍ଥିତି ଉପୁଜିଥିଲା। ଏହାକୁ ନେଇ ଟାଉନ ଥାନାରେ ଅଭିଯୋଗ ହୋଇଛି। ଅନ୍ୟପକ୍ଷରେ ଏହି ଘଟଣାକୁ ନେଇ ଶତାଧିକ ବିଜେଡି କର୍ମୀ ଟାଉନ ଥାନାରେ ପହଞ୍ଚିଥିବା ବେଳେ ଥାନା ପରିସରରେ ଉତ୍ତେଜନା ପରିସ୍ଥିତି ଦେଖାଦେଇଛି। ଥାନାରେ ଭାଜପା ନେତା ଓ ସମର୍ଥକମାନେ ଖବର ପାଇ ପହଞ୍ଚିଥିବା ଜଣାପଡିଛି। ଫଳରେ ଟାଉନ ଥାନାରେ ସୁରକ୍ଷା ପାଇଁ ବ୍ୟାପକ ପୋଲିସ ମୁତୟନ କରାଯାଇଛି। ଏନେଇ ପୋଲିସ ପକ୍ଷରୁ କୌଣସି ସୂଚନା ମିଳିନାହିଁ।

ଘଟଣାରୁ ଜଣାପଡ଼ିଛି ଯେ, ଆଜି ସନ୍ଧ୍ୟାରେ କେନ୍ଦୁଝର ମାଇନିଂ ରୋଡ୍‌ର କୃଷକ ବଜାର ନିକଟରେ ଗାଡ଼ି ପାର୍କିଂ ଯୋଗୁ ରାସ୍ତା ଜାମ ହୋଇଥିଲା। ଏହାକୁ ନେଇ ଭାଜପାର ଜଣେ ନେତା ଓ ବିଜେଡିର ଜଣେ ନେତାଙ୍କ ଭାଇ ମଧ୍ୟରେ ବିତର୍କ ହୋଇଥିଲା। ଏହି ବିତର୍କ ଉଗ୍ର ରୂପ ନେଇଥିଲା। ଏହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ମାର୍‌ପିଟ୍‌ ହୋଇଥିଲେ । ଖବର ପାଇ ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ଦଳର କେତେକଙ୍କୁ ଥାନାକୁ ଆଣି ଆସିଥିଲେ। ଖବର ପାଇ ଉଭୟ ଦଳର ସମର୍ଥକମାନେ ଥାନାରେ ପହଞ୍ଚି ନ୍ୟାୟ ଦାବି କରିଥିଲେ। ରାତି ପର୍ଯ୍ୟନ୍ତ ପୋଲିସ ଉଭୟ ଦଳର ନେତାଙ୍କ ସହିତ ଆଲୋଚନା ଜାରି ରଖିଥିବା ବେଳେ ଘଟଣାର ମୋଡ଼ କ’ଣ ହେବ ତାହା ପରେ ଜଣାପଡ଼ିବ।

Subscribe to Dharitri WhatsApp ChannelSubscribe to Dharitri WhatsApp Channel

Share
Tags: BJDbjp