ଇଟାନଗର,୯ ।୨: ଅରୁଣାଚଳ ପ୍ରଦେଶରେ ହେବାକୁ ଯାଉଥିବା ଉପନିର୍ବାଚନରେ ଭାରତୀୟ ଜନତା ପାର୍ଟି(ଭାଜପା) ପ୍ରାର୍ଥୀ ନିର୍ଦ୍ବନ୍ଦରେ ବିଜୟୀ ହେବା ଏକ ପ୍ରକାର ନିଶ୍ଚିତ ହୋଇଯାଇଛି । ଉପନିର୍ବାଚନରେ ଭାଜପା ପ୍ରାର୍ଥୀ ଶେରିଂଗ ହାମୁଙ୍କ ବ୍ୟତୀତ ଆଉ କେହି ପ୍ରାର୍ଥୀପତ୍ର ଦାଖଲ କରି ନାହାନ୍ତି । ସେ ହେଉଛନ୍ତି ଏକମାତ୍ର ପ୍ରାର୍ଥୀ । ତେବେ ପ୍ରାର୍ଥୀପତ୍ର ପ୍ରତ୍ୟାହାର ତାରିଖ ଶେଷ ହେବା ପରେ ଯାଇ ଶୁକ୍ରବାର ତାଙ୍କୁ ବିଜୟୀ ଘୋଷଣା କରାଯିବ । ଜାଂବେ ତାଶିଙ୍କ ମୃତ୍ୟୁ ପରେ ଏହି ଆସନ ଖାଲି ହୋଇଥିଲା । ଏବେ ଏଠାରେ ଉପ ନିର୍ବାଚନ ହେଉଛି । ହାମୁ ପୂର୍ବତନ ବିଧାୟକ ଜାଂବେଙ୍କ ପତ୍ନୀ । ଅରୁଣାଚଳ ପ୍ରଦେଶରେ ତବାଂଗ ଜିଲାର ଲୁମଲା ଆସନରେ ୨୭ ଫେବୃୟାରୀରେ ଭୋଟ ଗ୍ରହଣ ହେବାର ଥିଲା । ଜଣେ ନିର୍ବାଚନ ଅଧିକାରୀ ଏହି ସୂଚନା ଦେଇଛନ୍ତି ।
ଉପନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲର ଶେଷ ଦିନ ଥିଲା ମଙ୍ଗଳବାର । ହାମୁଙ୍କ ବ୍ୟତୀତ ଆଉ କେହି ପ୍ରାର୍ଥୀପତ୍ର ଦାଖଲ କରି ନାହାନ୍ତି । ହାମୁଙ୍କ ବିରୋଧରେ ଆଞ୍ଚଳିକ ଦଳ ପିପୁଲ୍ସ ପାର୍ଟି ଅଫ ଅରୁଣାଚଳ(ପିପିଏ) ଜଣେ ଗ୍ରାମ ପ୍ରଧାନକୁ ନିଜ ପ୍ରାର୍ଥୀ କରିଥିଲେ, ହେଲେ ସେ ପରେ ତାଙ୍କ ନାମ ପ୍ରତ୍ୟାହାର କରି ନେଇଥିଲେ । ନିର୍ବାଚନ ଅଧିକାରୀଙ୍କ ସୂଚନା ଅନୁଯାୟୀ, ଭାଜପା ପ୍ରାର୍ଥୀ ଶେରେଂଗ ହାମୁ ଉପନିର୍ବାଚନରେ ଏକମାତ୍ର ପ୍ରାର୍ଥୀ ।