ଚଣ୍ଡିଗଡ଼,୨୧ ।୧: ପାଖେଇ ଆସିଲାଣି ପଞ୍ଜାବ ବିଧାନସଭା ନିର୍ବାଚନ । ଶୁକ୍ରବାର ଭାରତୀୟ ଜନତା ପାର୍ଟି(ଭାଜପା) ତା’ର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛି । ଏଥିରେ ୩୪ ଜଣଙ୍କ ନାମ ରହିଛି । ଭାଜପା ରାଷ୍ଟ୍ରୀୟ ମହାସଚିବ ତରୁଣ ଚୁଘ କହିଛନ୍ତି ୩୪ ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରାଯାଇଛି । ଏଥିରେ କୃଷକ ପରିବାରରୁ ୧୨, ଅନୁସୂଚିତ ଜାତିରୁ ୮ ଓ ୧୩ ଜଣ ଶିଖଙ୍କୁ ସ୍ଥାନ ଦିଆଯାଇଛି । ଏହି ତାଲିକାରେ ଡାକ୍ତର, ଓକିଲ, ଖେଳାଳି, କୃଷକ, ଯୁବ, ମହିଳା ଓ ପୂର୍ବତନ ଆଏଏସ୍ଙ୍କୁ ସାମିଲ କରାଯାଇଛି । ଏହି ଅବସରରେ ଦୁଷ୍ୟନ୍ତ ଗୌତମ କହିଥିଲେ ଭାଜପା ନିର୍ବାଚନ କମିଶନଙ୍କୁ ଧନ୍ୟବାଦ ଜଣାଉଛି । ରବିଦାସ ଜୟନ୍ତି ପାଇଁ ପଞ୍ଜାବ ବିଧାନସଭା ନିର୍ବାଚନକୁ ୧୪ ଫେବୃୟାରୀ ପରିବର୍ତ୍ତେ ୨୦ ଫେବୃୟାରୀ କରି ଦେଇଛନ୍ତି । ଏହାପରେ ଦୁଷ୍ୟନ୍ତ ପଞ୍ଜାବର ଶାସକ କଂଗ୍ରେସ ସରକାରକୁ ଟାର୍ଗେଟ କରି କହିଛନ୍ତି, ରାଜ୍ୟରେ ନିଶା ସମସ୍ୟା, ଭ୍ରଷ୍ଟଚାର ଓ ଅନ୍ୟ ବହୁ ସମସ୍ୟା ମୁଣ୍ଡ ଟେକିଛି । ଦୁର୍ଭାଗ୍ୟର କଥା ଯେ ଆଜିବି ସେହି ସମସ୍ୟା ସେହିପରି ରହିଛି । ଏହି ସରକାରରେ ରାଜ୍ୟର କୌଣସି ଉନ୍ନତି ହୋଇନାହିଁ ।
