ନୂଆଦିଲ୍ଲୀ,୧୧।୧୨: ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର(ପିକେ) ପୁଣି ଥରେ କଂଗ୍ରେସ ଦଳକୁ ଟାର୍ଗେଟ୍ କରିଛନ୍ତି। କଂଗ୍ରେସରେ ଗଣତନ୍ତ୍ର ନାହିଁ ବୋଲି ସେ କହିଛନ୍ତି। ଯଦି ଦଳକୁ ବଞ୍ଚାଇବାକୁ ପଡିବ, ତେବେ ଗଣତାନ୍ତ୍ରିକ ଉପାୟରେ ଗାନ୍ଧୀ ପରିବାର ବାହାରେ ଜଣେ ନେତାଙ୍କୁ ଅଧ୍ୟକ୍ଷ ଚୟନ କରିବାର ଆବଶ୍ୟକତା ରହିଛି। ସେ କହିଛନ୍ତି ଯେ ଦେଶର ସର୍ବ ପୁରାତନ ଦଳ କଂଗ୍ରେସ ବିନା ମଧ୍ୟ ଭାଜପା ବିରୋଧୀ ସାମ୍ମୁଖ୍ୟ ଗଠନ ସମ୍ଭବ।ଏକ ଘରୋଇ ଚ୍ୟାନେଲକୁ ଦିଆଯାଇଥିବା ଏକ ସାକ୍ଷାତକାରରେ ସେ ରାହୁଲ ଗାନ୍ଧୀଙ୍କୁ କଟାକ୍ଷ କରି କହିଛନ୍ତି ଯେ କେବଳ ଟୁଇଟ୍ ଏବଂ କ୍ୟାଣ୍ଡେଲ ରାଲି ମାଧ୍ୟମରେ ଭାଜପାକୁ ପରାସ୍ତ କରି ହେବ ନାହିଁ।
ଭାଜପା ଅଧିକ ଶକ୍ତିଶାଳୀ ହୋଇସାରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧିନ ଭାଜପାକୁ ପରାସ୍ତ କରିବାକୁ ରାହୁଲଙ୍କୁ ଏକ ଦୃଢ଼ ରଣନୀତ ପ୍ରସ୍ତୁତ କରିବାକୁ ପଡିବ ବୋଲି ସେ ହକିଛନ୍ତି। ପ୍ରଶାନ୍ତ କିଶୋର କହିଛନ୍ତି ଯେ ୧୯୮୪ ପରେ କଂଗ୍ରେସ ଏକାକୀ ଗୋଟିଏ ବି ଲୋକସଭା ନିର୍ବାଚନ ଜିତି ନାହିଁ।
ଗତ ଦଶ ବର୍ଷ ମଧ୍ୟରେ କଂଗ୍ରେସ ୯୦ ପ୍ରତିଶତ ନିର୍ବାଚନରେ ପରାଜିତ ହୋଇଛି। କଂଗ୍ରେସ ନେତୃତ୍ୱ ପରାଜୟ ପାଇଁ ଦାୟୀ ବୋଲି ସେ କହିଛନ୍ତି। ସେ ପ୍ରଧାନମନ୍ତ୍ରୀଙ୍କୁ ପ୍ରଶଂସା କରିବା ସହ କହିଛନ୍ତି ଯେ ମୋଦି ସମସ୍ତ ଲୋକଙ୍କ କଥା ଶୁଣୁଛନ୍ତି। ଏହା ହେଉଛି ତାଙ୍କର ସବୁଠାରୁ ବଡ ଶକ୍ତି ।
ମୋଦି ଲୋକମାନଙ୍କର ଆବଶ୍ୟକତା କ’ଣ ଜାଣିଛନ୍ତି । ଆଗାମୀ କିଛି ଦଶନ୍ଧି ଧରି ଦେଶର ରାଜନୀତିରେ ଭାଜପାର ପ୍ରଭାବ ଜାରି ରହିବ ବୋଲି ପ୍ରଶାନ୍ତ କିଶୋର କହିଛନ୍ତି।