ଭୁବନେଶ୍ବର, ୨୯।୪(ବ୍ୟୁରୋ): ମହାନଦୀ ହେଉଛି ଓଡ଼ିଶାର ଜୀବନରେଖା। କୋଟି କୋଟି ଚାଷୀ ଏବଂ ମତ୍ସ୍ୟଜୀବୀ ସେମାନଙ୍କ ଜୀବନ ଜୀବିକା ପାଇଁ ଏହା ଉପରେ ନିର୍ଭରଶୀଳ। ମହାନଦୀ ଓଡ଼ିଶାର ଅଧା ଜିଲା ଦେଇ ପ୍ରବାହିତ ହେଉଛି ଏବଂ ରାଜ୍ୟର ପ୍ରାୟ ୨.୫ କୋଟି ଲୋକଙ୍କୁ ଏହା ପ୍ରଭାବିତ କରିଥାଏ। ଓଡ଼ିଶା ଏବଂ ମହାନଦୀର ଇତିହାସ ପରସ୍ପର ସହ ଜଡ଼ିତ। ହେଲେ ଛତିଶଗଡ଼ର ବେଆଇନ କାର୍ଯ୍ୟ ଯୋଗୁ ମହାନଦୀ ଶୁଖିଲା ପଡ଼ିଥିବାବେଳେ ଉଭୟ କଂଗ୍ରେସ ଓ ଭାଜପା ଏହାକୁ ନେଇ କୁମ୍ଭୀର କାନ୍ଦଣା କାନ୍ଦୁଥିବା ବିଜେଡି ମୁଖପାତ୍ର ଶ୍ରୀମୟୀ ମିଶ୍ର କହିଛନ୍ତି।
ଶଙ୍ଖ ଭବନଠାରେ ଶୁକ୍ରବାର ଆୟୋଜିତ ଏକ ଖବରଦାତା ସମ୍ମିଳନୀରେ ଶ୍ରୀମୟୀ କହିଛନ୍ତି, ଓଡ଼ିଶା ମହାନଦୀର ସମୃଦ୍ଧି ସହ ସିଧାସଳଖ ଜଡ଼ିତ। ବିଜେଡି ନେତୃତ୍ବାଧୀନ ଓଡ଼ିଶା ସରକାର ଛତିଶଗଡ଼ର ଏହି ବେଆଇନ କାର୍ଯ୍ୟକଳାପକୁ ବନ୍ଦ କରିବାକୁ ଦାବି କରୁଥିଲେ ମଧ୍ୟ ସେମାନେ ତାହା କରୁନାହାନ୍ତି। ଯେତେବେଳେ ଓଡ଼ିଶା ସରକାର ଚାହୁଁଥିଲେ ଯେ କେନ୍ଦ୍ର ଏହି ପ୍ରସଙ୍ଗରେ ହସ୍ତକ୍ଷେପ କରିବ, ସେତେବେଳେ ଜଣେ ଓଡ଼ିଆ କେନ୍ଦ୍ରମନ୍ତ୍ରୀ ମହାନଦୀ ପ୍ରସଙ୍ଗରେ ଓଡ଼ିଶାର ଲୋକଙ୍କ ସ୍ବାର୍ଥ ପାଇଁ ଛିଡ଼ାହେବା ପରିବର୍ତ୍ତେ ଛତିଶଗଡ଼କୁ ସମର୍ଥନ କରିଥିଲେ। ଓଡ଼ିଶା କଂଗ୍ରେସ ନେତାମାନେ ମଧ୍ୟ ଦିଲ୍ଲୀ ଏବଂ ଛତିଶଗଡ଼ରେ ସେମାନଙ୍କ ଦଳ ସହ ହସ୍ତକ୍ଷେପ କରିବା ଜରୁରୀ। ହେଲେଉଭୟ କଂଗ୍ରେସ ଏବଂ ଭାଜପା ଗୋଟିଏ ମୁଦ୍ରାର ଦୁଇ ପାର୍ଶ୍ୱ ବୋଲି ଶ୍ରୀମୟୀ କହିଛନ୍ତି।
ଏ ପ୍ରସଙ୍ଗରେ ଭାଜପା ନେତା ଦିଲୀପ ମଲ୍ଲିକ କହିଛନ୍ତି, ବିଜେଡି ୨୩ ବର୍ଷ ଧରି ସରକାରରେ ରହି ଶାସନ କରୁଛି ନା ମଇଦାନରେ ଫୁଟ୍ବଲ ଖେଳୁଛିି। ଯଦି ସରକାରରେ ଅଛନ୍ତି ତେବେ ଓଡ଼ିଶା ପ୍ରଦେଶର ଦାୟିତ୍ୱ ଏବଂ ସୁରକ୍ଷା ତାଙ୍କର କାମ ନୁହେଁ କି ବୋଲି ସେ ପ୍ରଶ୍ନ କରିଛନ୍ତି। କେତେବେଳେ ଖଣ୍ଡେ ଚିଠି ଲେଖି ତ କେତେବେଳେ ନିଜ ଦଳର ପ୍ରବକ୍ତାଙ୍କୁ ଲଗାଇ ରାଜନୈତିକ ବିବୃତି ଦେଇଦେଲେ ମହାନଦୀ ସୁରକ୍ଷିତ ହେବ ନାହିଁ କି ଓଡ଼ିଶାର ବିକାଶ ହେବ ନାହିଁ। ଓଡ଼ିଶାର ଜୀବନରେଖା ମହାନଦୀ ବୋଲି କହି ଆସୁଥିବା ବିଜେଡି ସରକାର ଗତ ୨୩ ବର୍ଷ ମଧ୍ୟରେ ମହାନଦୀ ସୁରକ୍ଷା ନେଇ କ’ଣ ପଦକ୍ଷେପ ନେଇଛନ୍ତି ତାହା ପ୍ରଥମେ ରାଜ୍ୟବାସୀଙ୍କ ଆଗରେ ପ୍ରକାଶ କରନ୍ତୁ ବୋଲି ଦିଲୀପ କହିଛନ୍ତି।