ବିଆରଏସକୁ ପରାଜିତ କରାଇବା ଲାଗି ମିଳିତ ହୋଇଛନ୍ତି ଭାଜପା-କଂଗ୍ରେସ: କେସିଆର…

ହାଇଦ୍ରାବାଦ,୧୮।୧୧ : ତେଲଙ୍ଗାନା ବିଧାନସଭା ନିର୍ବାଚନ ପାଇଁ ଦିନ ପାଖେଇ ଆସୁଥିବାରୁ ପରସ୍ପର ଉପରେ ରାଜନୈତିକ ନେତାଙ୍କ କଡା ସମାଲୋଚନା ତୀବ୍ର ହେବାରେ ଲାଗିଛି। ଏହି ସମୟରେ ରାଜ୍ୟ ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଶନିବାର ଅଭିଯୋଗ କରିଛନ୍ତି ତାଙ୍କ ରାଜନୈତିକ କାର୍ଯ୍ୟକଳାପକୁ ସୀମିତ ରଖିବା ଏବଂ ମହାରାଷ୍ଟ୍ରରେ ଭାରତ ରାଷ୍ଟ୍ର ସମିତି (ବିଆରଏସ) କୁ ବିସ୍ତାର ନ କରାଇ ଦେବାକୁ ଭାଜପା ଓ କଂଗ୍ରେସ ମିଳିତ ହୋଇଛନ୍ତି। ବିଆରଏସକୁ ପରାଜିତ କରାଇବା ଲାଗି ଭାଜପା କଂଗ୍ରେସ ମଧ୍ୟରେ ଯୋଗାଯୋଗ ଆରମ୍ଭ ହୋଇଛି।

ଏକ ନିର୍ବାଚନୀ ସମାବେଶକୁ ସମ୍ବୋଧିତ କରି ରାଓ ଉଭୟ ଜାତୀୟ ଦଳ ବିରୋଧରେ ଅଭିଯୋଗ କରିଛନ୍ତି କଂଗ୍ରେସ ଶାସନ କାଳରେ ତେଲଙ୍ଗାନା ନଷ୍ଟ ହୋଇଯାଇଥିବାବେଳେ ଭାଜପା ନେତୃତ୍ୱାଧୀନ କେନ୍ଦ୍ର ସରକାର ଏପରିକି ଗୋଟିଏ ମେଡିକାଲ କଲେଜ କିମ୍ବା ନାବୋଦୟ ବିଦ୍ୟାଳୟକୁ ଅନୁମତି ଦେଇନାହାଁନ୍ତି। ବିଆରଏସ ପ୍ରାର୍ଥୀଙ୍କ ପାଇଁ ଭୋଟ ଲୋଡୁଥିବା କେସିଆର କହିଛନ୍ତି ବିକାଶ ଜାରି ରଖିବା ପାଇଁ ତାଙ୍କ ଦଳକୁ କ୍ଷମତାକୁ ଫେରାଇ ଆଣିବା ଉଚିତ।

ଭାଜପା ଏବଂ କଂଗ୍ରେସକୁ ଲକ୍ଷ୍ୟ କରି ସେ କହିଛନ୍ତି ଉଭୟ ଜାତୀୟ ଦଳ ମତେ ଭୟ କରୁଛନ୍ତି। ସେମାନେ ଅନୁଭବ କରୁଛନ୍ତି ଯଦି ମୁଁ ତେଲଙ୍ଗାନାରେ ଜିତନ୍ତି ତେବେ ସେ ମହାରାଷ୍ଟ୍ରକୁ ଆସି ବଂଶୀ ବଜାଇବେ। ମହାରାଷ୍ଟ୍ରର ୧୫୦ ଟି ପଞ୍ଚାୟତ ତେଲେଙ୍ଗାନା ସହିତ ମିଶ୍ରଣ କରିବାକୁ ଅନୁରୋଧ କରି ପ୍ରସ୍ତାବ ପାରିତ କରିଛନ୍ତି।

ପରସ୍ପର ବିରୋଧରେ ଟାଣୁଆ ପ୍ରାର୍ଥୀ ନ ଦେବାକୁ ଦୁଇ ଦଳ ମଧ୍ୟରେ ଏକ ଚୁକ୍ତିନାମା ରହିଛି ବୋଲି ସେ ଅଭିଯୋଗ କରିଛନ୍ତି। କେସିଆର କହିଛନ୍ତି, ତେଲଙ୍ଗାନାରେ ମୁଁ ହାରିଗଲେ ସେମାନେ ନିଜକୁ ସୁରକ୍ଷିତ ମଣିବେ।

ଆମ ଦଳର ବୈଠକ ମହାରାଷ୍ଟ୍ରବାସୀଙ୍କଠାରୁ ଭଲ ପ୍ରତିକ୍ରିୟା ଗ୍ରହଣ କରୁଛି। ତେଲଙ୍ଗାନାର ସଫଳତାକୁ ଗଣନା କରି କେସିଆର କହିଛନ୍ତି ଧାନ ଉତ୍ପାଦନରେ ରାଜ୍ୟ ପଞ୍ଜାବକୁ ପଛରେ ପକାଇ ଦେଇଛି।

ସେ କହିଛନ୍ତି ଯେ ତେଲେଙ୍ଗାନା ରାଜ୍ୟର ସଫଳତା ତଥା ଏହାର ଲୋକଙ୍କ ଅଧିକାରର ସୁରକ୍ଷା ପାଇଁ ବିଆରଏସର ଜନ୍ମ ହୋଇଛି। ଗତ ଦଶ ବର୍ଷ ମଧ୍ୟରେ କଂଗ୍ରେସର ୫୦ ବର୍ଷ ଶାସନ ସହିତ ରାଜ୍ୟର ବିକାଶକୁ ତୁଳନା କରିବାକୁ ମୁଖ୍ୟମନ୍ତ୍ରୀ ମଧ୍ୟ ଲୋକଙ୍କୁ କହିଛନ୍ତି।

ସେ ଅଭିଯୋଗ କରିଛନ୍ତି କଂଗ୍ରେସ ଦଳ ହିଁ ତେଲେଙ୍ଗାନା ଏବଂ ଆନ୍ଧ୍ରପ୍ରଦେଶକୁ ଏଠାରେ ଲୋକଙ୍କ ସହମତି ବିନା ମିଶ୍ରଣ କରି ୫୦ ବର୍ଷ ଅସୁବିଧାର ସମ୍ମୁଖୀନ ହୋଇଛି। କେସିଆର କହିଛନ୍ତି, ’କଂଗ୍ରେସ ଶାସନ କାଳରେ ତେଲଙ୍ଗାନାର ଅବସ୍ଥା ବିଶୃଙ୍ଖଳିତ ଥିଲା। ସେମାନେ କେବେ ରାଜ୍ୟ ପାଇଁ ଚିନ୍ତା କଲେ ନାହିଁ। ପାନୀୟ ଜଳ ପାଇଁ କୌଣସି ବ୍ୟବସ୍ଥା ନ ଥିଲା। ଆତ୍ମହତ୍ୟା ହାର ବଢ଼ିଥିଲା। କଂଗ୍ରେସ ଦଳ ହିଁ ତେଲଙ୍ଗାନାକୁ ନଷ୍ଟ କରି ଦେଇଥିଲା।