ନୂଆଦିଲ୍ଲୀ, ୧୩।୭ :କଂଗ୍ରେସ ନେତା ତଥା ମୁଖପାତ୍ର ଅଜୟ କୁମାର ଏକ ବିବାଦ ଆରମ୍ଭ କରି କହିଛନ୍ତି ଯେ, ‘ଏନଡିଏର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦ୍ରୀ ମୁର୍ମୁ ଭାରତର ଏକ ଖରାପ ଦର୍ଶନର ପ୍ରତିନିଧିତ୍ୱ କରୁଛନ୍ତି। ତାଙ୍କ ପ୍ରାର୍ଥୀତ୍ୱକୁ ଆଦିବାସୀଙ୍କ ପ୍ରତୀକ କରାଯିବା ଉଚିତ ନୁହେଁ ‘। ଅଜୟ କୁମାରଙ୍କ ମନ୍ତବ୍ୟ ଉପରେ ଭାଜପା ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ଫଳରେ ଜୁଲାଇ ୧୮ ରାଷ୍ଟ୍ରପତି ନିର୍ବାଚନ ପୂର୍ବରୁ ଭାଜପା କଂଗ୍ରେସ ମଧ୍ୟରେ କାଦୁଆ ଫିଙ୍ଗା ଆରମ୍ଭ ହୋଇଛି। ଏଏନଆଇ ନ୍ୟୁଜ ଏଜେନ୍ସି ସହ କଥାବାର୍ତ୍ତା କରି କଂଗ୍ରେସ ନେତା ଅଭିଯୋଗ କରିଛନ୍ତି ଯେ ଦେଶରେ ଅନୁସୂଚିତ ସମ୍ପ୍ରଦାୟର ଅବସ୍ଥା ଖରାପ ହୋଇଯାଇଛି।
କଂଗ୍ରେସ ନେତୃତ୍ୱାଧୀନ ବିରୋଧୀ ଦଳ ମୁର୍ମୁଙ୍କ ବିରୋଧରେ ପୂର୍ବତନ କେନ୍ଦ୍ର ମନ୍ତ୍ରୀ ଯଶଓ୍ବନ୍ତ ସିହ୍ନାଙ୍କୁ ପ୍ରାର୍ଥୀ କରିଛି। ଯଶୱନ୍ତ ସିହ୍ନା ଜଣେ ଭଲ ପ୍ରାର୍ଥୀ ଏବଂ ମୁର୍ମୁ ମଧ୍ୟ ଜଣେ ସମ୍ମାନୀୟ ବ୍ୟକ୍ତିତ୍ୱ। କିନ୍ତୁ ମୁର୍ମୁ ଭାରତର ଏକ ଖରାପ ଦର୍ଶନକୁ ପ୍ରତିନିଧିତ୍ୱ କରୁଛନ୍ତି। ଆମେ ତାଙ୍କୁ ଆଦିବାସୀଙ୍କର ପ୍ରତୀକ କରିବା ଉଚିତ ନୁହେଁ। ଆମ ପାଖରେ ରାଷ୍ଟ୍ରପତି ଭାବେ ରାମ ନାଥ କୋବିନ୍ଦ ଅଛନ୍ତ। ତଥାପି ହାଥରସ ଭଳି ଘଟଣା ଘଟିଥିଲା। ଦେଶରେ ଅନୁସୂଚିତ ସମ୍ପ୍ରଦାୟର ଅବସ୍ଥା ବିଗିଡି ଯାଇଛି । ରାଷ୍ଟ୍ରପତି ନିର୍ବାଚନକୁ ଜାତିର ଆତ୍ମା ପାଇଁ ସଂଗ୍ରାମ ବୋଲି ବର୍ଣ୍ଣନା କରି କଂଗ୍ରେସ ନେତା କହିଛନ୍ତି ଯେ ସମସ୍ତ ଦଳ ବିରୋଧୀ ପ୍ରାର୍ଥୀ ଯଶଓ୍ବନ୍ତ ସିହ୍ନାଙ୍କୁ ଭୋଟ ଦେବା ଉଚିତ୍।
ସେ କହିଛନ୍ତି, ପ୍ରତୀକ ତିଆରି କରି ଭାରତର ଲୋକଙ୍କୁ ବୋକା ବନାଇବା ଲାଗି ପ୍ରଧାନନ୍ତ୍ରୀ ନରେନ୍ଦ୍ର ମୋଦି ସରକାର ଯୋଜନା କରିଛନ୍ତି। ଏହା ଦେଶର ଆତ୍ମା ପାଇଁ ଲଢ଼େଇ। ତେଣୁ ସମସ୍ତ ଦଳ ସିହ୍ନାଙ୍କୁ ଭୋଟ ଦେବା ଜରୁରୀ ବୋଲି ସେ କହିଛନ୍ତି।
ଅଜୟ କୁମାରଙ୍କୁ ଜବାବ ଦେଇ ଭାଜପାର ଜାତୀୟ ମୁଖପାତ୍ର ଶାହାଜାଦ ପୁନାୱାଲା କହିଛନ୍ତି ଯେ କଂଗ୍ରେସ ମୁର୍ମୁଙ୍କୁ ଅପମାନିତ କରିଛି।
ସୂଚନାଯୋଗ୍ୟ, ନିର୍ବାଚିତ ହେଲେ ଦ୍ରୌପଦୀ ମୁର୍ମୁ ଭାରତର ପ୍ରଥମ ଆଦିବାସୀ ରାଷ୍ଟ୍ରପତି ହେବା ସହିତ ଦେଶର ଦ୍ୱିତୀୟ ମହିଳା ରାଷ୍ଟ୍ରପତି ହେବେ। ସେ ଝାଡଖଣ୍ଡର ପ୍ରଥମ ମହିଳା ରାଜ୍ୟପାଳ ଭାବେ ୨୦୧୫ରୁ ୨୦୨୧ ପର୍ଯ୍ୟନ୍ତ କାର୍ଯ୍ୟ କରିଛନ୍ତି।
ସେ ୨୦୧୩ ରୁ ୨୦୧୫ ପର୍ଯ୍ୟନ୍ତ ଭାଜପାର ଏସଟି ମୋର୍ଚ୍ଚାର ଜାତୀୟ କାର୍ଯ୍ୟନିର୍ବାହୀ ସଦସ୍ୟା ଥିଲେ। ୨୦୧୦ ଏବଂ ୨୦୧୩ ରେ ମୟୂରଭଞ୍ଜ (ପଶ୍ଚିମ) ର ଭାଜପା ଜିଲା ମୁଖ୍ୟ ଭାବରେ କାର୍ଯ୍ୟ କରିଥିଲେ। ୨୦୦୬ରୁ ୨୦୦୯ ମଧ୍ୟରେ ସେ ଓଡିଶାରେ ଭାଜପାର ଏସଟି ମୋର୍ଚ୍ଚାର ମୁଖ୍ୟ ଥିଲେ। ସେ ୨୦୦୨ ରୁ ୨୦୦୯ ପର୍ଯ୍ୟନ୍ତ ଭାଜପା ଏସଟି ମୋର୍ଚ୍ଚାର ଜାତୀୟ କାର୍ଯ୍ୟନିର୍ବାହୀ ସଦସ୍ୟା ଥିଲେ।