ବରୀ,୨୮ା୪(ମହେନ୍ଦ୍ର ସ୍ବାଇଁ)ଯାଜପୁର ଜିଲାର ବରୀ ନିର୍ବାଚନମଣ୍ଡଳୀରେ ଭାଜପା ଏଯାଏ ପ୍ରାର୍ଥୀ ଦେଇପାରିନାହିଁ। ଏଠାରେ ବିଜେଡି ବିଶ୍ୱରଞ୍ଜନ ମଲ୍ଲିକ ଓ କଂଗ୍ରେସ ଆରତୀ ଦେଓଙ୍କୁ ପ୍ରାର୍ଥୀ କରିବା ପରେ ସେମାନେ ପ୍ରଚାର ଅଭିଯାନକୁ ଜୋର୍ଦାର କରିଛନ୍ତି। ଭାଜପାରେ ଆଶାୟୀଙ୍କ ସଂଖ୍ୟା କ୍ରମଶଃ ବୃଦ୍ଧି ପାଉଥିବାରୁ ତାହା ଏବେ ଦଳ ପାଇଁ ମୁଣ୍ଡବିନ୍ଧାର କାରଣ ପାଲଟିଥିବା ଚର୍ଚ୍ଚା ହେଉଛି। ୨୦୧୯ ନିର୍ବାଚନରେ କଂଗ୍ରେସରୁ ବିଧାୟକ ପ୍ରାର୍ଥୀ ହୋଇଥିବା ଉମେଶ ଚନ୍ଦ୍ର ଜେନା ଭାଜପାରେ ଯୋଗଦେବା ପରେ ସେ ଦଳୀୟ ପ୍ରାର୍ଥୀ ହେବା ଏକ ପ୍ରକାର ଚୂଡାନ୍ତ ହୋଇଥିବା ଚର୍ଚ୍ଚା ହେଉଥିଲା। ଜେନା ମଧ୍ୟ ଅନେକ ସମୟରେ ଦଳୀୟ କାର୍ଯ୍ୟକ୍ରମରେ ଯୋଗଦେବା ସହ ସଂଗଠନକୁ ସୁଦୃଢ଼ କରିବା ପାଇଁ ଚେଷ୍ଟା ଜାରି ରଖିଥିଲେ। ତେବେ ବରୀର ୪ ଥର ବିଧାୟକ ହୋଇଥିବା ଦେବାଶିଷ ନାୟକ ଭାଜପାରେ ଯୋଗଦେବା ପରେ ତାଙ୍କ ନାମ ମଧ୍ୟ ଚର୍ଚ୍ଚାକୁ ଆସିଥିଲା। ଦେବାଶିଷ ଭାଜପାରେ ଯୋଗଦେବା ପରେ ମୁଖ୍ୟମନ୍ତ୍ରୀ ଓ ୫-ଟି ଅଧ୍ୟକ୍ଷଙ୍କୁ କଡ଼ା ସମାଲୋଚନା କରୁଥିବା ଦେଖାଯାଇଥିଲା। ଉମେଶ କିମ୍ବା ଦେବାଶିଷଙ୍କୁ ଛାଡ଼ି ଦେଲେ ଟିକେଟ ଆଶାୟୀ ଦୌଡ଼ରେ ଯୁବନେତା କବୀର ଦାସ, ବିବେକାନନ୍ଦ ଜେନା ଓ ଆଶୁତୋଷ ପରିଡ଼ାଙ୍କ ନଁା ଯୋଡ଼ିହୋଇଥିଲା। କେବଳ ଏତିକି ନୁହେଁ, ବିଜେଡି ଛାଡି ଭାଜପାରେ ସାମିଲ ହୋଇଥିବା ଅଭିନେତା ତଥା କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି ଓ ଅରିନ୍ଦମ ଦାସଙ୍କୁ ମଧ୍ୟ ଦଳ ବରୀରେ ପ୍ରାର୍ଥୀ କରି ବିଜେଡି ଓ କଂଗ୍ରେସକୁ କଡ଼ା ଟକ୍କର ଦେବା ପାଇଁ ଚିନ୍ତା କରୁଥାଇପାରେ ବୋଲି ରାଜନୈତିକ ସମୀକ୍ଷକମାନେ ଅନୁମାନ କରୁଥିଲେ। ହେଲେ ଭାଜପା ଅରିନ୍ଦମଙ୍କୁ ସାଲେପୁରରୁ ପ୍ରାର୍ଥୀ କରଛି। ତେବେ ଭାଜପାର ପ୍ରାର୍ଥୀ ଚୟନ ପ୍ରକ୍ରିୟା ବିଳମ୍ବ ହେଉଥିବାରୁ ଅସନ୍ତୋଷ ପ୍ରକାଶ କରି ବହୁ କର୍ମୀ ବିଜେଡି ଓ କଂଗ୍ରେସରେ ଯୋଗଦେବାର ଦେଖିବାକୁ ମିଳୁଛି। ଶନିବାର ଭାଜପାର ୮ ଜଣିଆ ପ୍ରାର୍ଥୀ ତାଲିକାରେ ବରୀ ନ ଥିବାରୁ କର୍ମୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। କେବଳ ଦଳୀୟ କନ୍ଦଳ ନୁହେଁ, ପ୍ରାର୍ଥୀ ଘୋଷଣା ନ ହେବା ପଛରେ ଶାସକ ଦଳ ସହ ଭାଜପାର ଭିତିରି ବୁଝାମଣା ରହିଥିବା ଅନେକେ ସନ୍ଦେହ କରୁଛନ୍ତି।
