ମୁମ୍ବାଇ/ଗୁଆହାଟୀ,୨୯ା୬: ଶିବସେନା ମୁଖ୍ୟ ଉଦ୍ଧବ ଠାକ୍ରେଙ୍କ ସରକାରରେ ଅସ୍ଥିରତା ସୃଷ୍ଟି ପାଇଁ ଭାଜପା ଉଦ୍ୟମ କରୁନାହିଁ ବୋଲି ଦଳ ପକ୍ଷରୁ ବାରମ୍ବାର ସଫେଇ ଦିଆଯାଉଥିବାବେଳେ ଏବେ ଭିତିରି କଥା ସାମ୍ନାକୁ ଆସିଛି। ବିରୋଧୀ ଦଳ ନେତା ଦେବେନ୍ଦ୍ର ଫଡ୍ନବିସ ମଙ୍ଗଳବାର ସନ୍ଧ୍ୟାରେ ରାଜ୍ୟପାଳ ଭଗତସିଂ କୋଶିୟାରୀଙ୍କୁ ସାକ୍ଷାତ କରିଛନ୍ତି। ବିଧାନସଭା ଅଧିବେଶନ ଡକାଇ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କୁ ସଂଖ୍ୟାଗରିଷ୍ଠତାର ପ୍ରମାଣ ଦେବାକୁ ନିର୍ଦ୍ଦେଶ ଦେବା ପାଇଁ ରାଜ୍ୟପାଳଙ୍କ ନିକଟରେ ସେ ଦାବି କରିଛନ୍ତି।
ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସଙ୍କ ନେତୃତ୍ୱରେ ଭାଜପାର ଏକ ପ୍ରତିନିଧି ଦଳ ରାଜଭବନରେ କୋଶିୟାରୀଙ୍କୁ ଭେଟିଛି। ଏହି ଅବସରରେ ଫଡ୍ନବିସ ରାଜ୍ୟପାଳଙ୍କୁ ଏକ ପତ୍ର ଜରିଆରେ ରାଜନୈତିକ ସ୍ଥିତି ସମ୍ପର୍କରେ ଅବଗତ କରାଇଛନ୍ତି। ସେ କହିଛନ୍ତି, ଶିବସେନାର ୩୯ ବିଧାୟକ ମହା ବିକାଶ ଅଘାଡ଼ି ସରକାରଙ୍କଠାରୁ ସମର୍ଥନ ପ୍ରତ୍ୟାହାର କରିଥିବା ବିଷୟ ସ୍ପଷ୍ଟ କରିସାରିଛନ୍ତି। ସେହିପରି ୮ ସ୍ବାଧୀନ ବିଧାୟକ ମଧ୍ୟ ଇ-ମେଲ୍ ଜରିଆରେ ରାଜ୍ୟପାଳଙ୍କୁ ଆସ୍ଥାଭୋଟ କରାଇବା ପାଇଁ ଦାବି କରିଛନ୍ତି। ମୁଖ୍ୟମନ୍ତ୍ରୀ ଆସ୍ଥା ହରାଇସାରିଥିବାର ନିଜ ସରକାର ସପକ୍ଷରେ ସଂଖ୍ୟାଗରିଷ୍ଠତାର ପ୍ରମାଣ ଦିଅନ୍ତୁ। ଅଦାଲତଙ୍କ ପୂର୍ବ ରାୟଗୁଡ଼ିକୁ ଅନୁଧ୍ୟାନ କରି ରାଜ୍ୟପାଳ ଭାଜପାର ଅନୁରୋଧ ଉପରେ ବିଚାର କରିବେ ବୋଲି ଆଶାବାଦୀ ଥିବା ଫଡ୍ନବିସ ଗଣମାଧ୍ୟମକୁ କହିଛନ୍ତି। କେତେକ ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ଗୁରୁବାର ବିଦ୍ରୋହୀ ନେତା ଏକନାଥ ସିନ୍ଧେଙ୍କ ସହ ବିଧାୟକମାନେ ଗୁଆହାଟୀରୁ ମୁମ୍ବାଇକୁ ଫେରିବା ପରେ ଆସ୍ଥାଭୋଟ ହୋଇପାରେ।
ରାଜ୍ୟପାଳଙ୍କୁ ଭେଟିବା ପୂର୍ବରୁ ଫଡ୍ନବିସ ଦିଲ୍ଲୀରୁ ଫେରିଥିଲେ। ସେ ଦିଲ୍ଲୀରେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କ ସହ ମହାରାଷ୍ଟ୍ରର ରାଜନୈତିକ ଘଟଣାକ୍ରମ ଉପରେ ଆଲୋଚନା କରିଥିଲେ। ସୋମବାର ଫଡ୍ନବିସଙ୍କ ଘରେ ଭାଜପାର ବରିଷ୍ଠ ନେତାମାନଙ୍କ ବୈଠକ ଅନୁଷ୍ଠିତ ହୋଇଥିଲା। ସେ ପୁନର୍ବାର କ୍ଷମତା ଦଖଲ ପାଇଁ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହାଙ୍କ ସହ ମନ୍ତ୍ରଣା କରୁଥିବା କୁହାଯାଉଛି। ଶିବସେନା ବିଦ୍ରୋହୀମାନେ ମହାରାଷ୍ଟ୍ରରୁ ପ୍ରଥମେ ଭାଜପା ଶାସିତ ଗୁଜରାଟରୁ ସୁରଟକୁ ଯାଇଥିଲେ। ସେଠାରୁ ସେମାନେ ଆସାମର ଗୁଆହାଟୀ ଗସ୍ତ କରିଥିଲେ। ଇତିମଧ୍ୟରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କୁ ବିଦ୍ରୋହୀ ରହୁଥିବା ହୋଟେଲରେ ଦେଖିବାକୁ ମିଳିଛି। ନିକଟରେ ଏକନାଥ ସିନ୍ଧେ କହିଥିଲେ, ତାଙ୍କ ବିଦ୍ରୋହକୁ ଏକ ଜାତୀୟ ଦଳ (ମହାଶକ୍ତି) ପ୍ରଶଂସା କରିଛି। ଆଗକୁ ସବୁ ପ୍ରକାର ସାହାଯ୍ୟର ପ୍ରତିଶ୍ରୁତି ଦେଇଛି।