ରାୟପୁର,୧୦।୫: ଫିଲ୍ମ ‘ଦ କେରଲା ଷ୍ଟୋରି’ କୁ ନେଇ ସାରା ଦେଶରେ ରାଜନୀତି ଚାଲିଛି। ଅନେକ ରାଜ୍ୟରେ ଏହି ଫିଲ୍ମକୁ ବ୍ୟାନ କରାଯାଉଥିବା ବେଳେ କେତେକ ରାଜ୍ୟରେ ଏହାକୁ ସମର୍ଥନ କରୁଛନ୍ତି। ତେବେ ପଶ୍ଚିମବଙ୍ଗରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ଫିଲ୍ମ ଉପରେ ପ୍ରତିବନ୍ଧକ ଲଗାଇଥିବା ବେଳେ ୟୁପିରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଫିଲ୍ମ ଟିକସମୁକ୍ତ କରିଛନ୍ତି। ଏହି କ୍ରମରେ ଏବେ ଛତିଶଗଡରେ ‘ଦ କେରଲା ଷ୍ଟୋରି’ ଟିକସମୁକ୍ତ କରିବାକୁ ଦାବି ରହିଛି। ଏହାକୁ ନେଇ ଭାଜପା ଓ କଂଗ୍ରେସ ମଧ୍ୟରେ ତୀବ୍ର ବିତର୍କ ଚାଲିଛି।
ମଙ୍ଗଳବାର ରାୟପୁରରେ ଭାଜପାର ରାଜ୍ୟ ଅଧ୍ୟକ୍ଷ ଅରୁଣ ସାଓ, ବିରୋଧୀ ଦଳର ନେତା ନାରାୟଣ ଚନ୍ଦେଲ ଏବଂ ଭାଜପା କର୍ମୀମାନେ ଏହି ଫିଲ୍ମ ଦେଖିବାକୁ ଆସିଥିଲେ। ଏଥିପାଇଁ ରାୟପୁରର ଏକ ଘରୋଇ ସିନେମା ହଲରେ ଏକ ଶୋ’ ବୁକ କରାଯାଇଥିଲା। ଫିଲ୍ମ ଦେଖିବା ପରେ ଅରୁଣ ସାଓ ଏହି ଫିଲ୍ମକୁ ପ୍ରଶଂସା କରିଛନ୍ତି। ଏହା ସହିତ ବିରୋଧୀ ଦଳର ନେତା ନାରାୟଣ ଚନ୍ଦେଲ ଫିଲ୍ମକୁ ରାଜ୍ୟରେ ଟିକସମୁକ୍ତ କରିବାକୁ ମୁଖ୍ୟମନ୍ତ୍ରୀ ଭୁପେଶ ବାଗେଲଙ୍କୁ ଦାବି କରିଥିଲେ।
ବିରୋଧୀ ଦଳର ନେତା ନାରାୟଣ ଚନ୍ଦେଲ କହିଛନ୍ତି, ଏହି ଫିଲ୍ମ ସତ୍ୟର ନିକଟତର ଏବଂ କଂଗ୍ରେସ ଏହି ସତ୍ୟକୁ ଅସ୍ବୀକାର କରୁଛି। ମୁଖ୍ୟମନ୍ତ୍ରୀ ଭୁପେଶ ବାଗେଲ ଏହି ଫିଲ୍ମକୁ ଦେଖିବା ଉଚିତ୍ ଏବଂ ତୁରନ୍ତ ସେ ଫିଲ୍ମକୁ ଟିକସମୁକ୍ତ ଘୋଷଣା କରିବା ଉଚିତ। ସେ କହିଛନ୍ତ, ଯଦି କଂଗ୍ରେସ ଏହି ଫିଲ୍ମକୁ ଟିକସମୁକ୍ତ କରେ ନାହିଁ, ତେବେ କଂଗ୍ରେସ କାହା ହାତରେ ଅଛି ତାହା ଜଣାପଡିବ।
