ପାଟନା,୨।୪: ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ନେତା ନୀତୀଶ କୁମାରଙ୍କ ପାଇଁ ଭାଜପା ଦ୍ୱାର ସବୁଦିନ ବନ୍ଦ ହୋଇଯାଇଛି ବୋଲି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ବିହାର ଗସ୍ତ ସମୟରେ କହିଛନ୍ତି। ନୱାଡାଠାରେ ଏକ ସାଧାରଣ ସଭାରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏବଂ ଜେଡିୟୁ ନେତା ଲଲନ ସିଂଙ୍କୁ ଟାର୍ଗେଟ୍ କରି ଅମିତ ଶାହା କହିଛନ୍ତି, ଯଦି ଆପଣ ଭାବୁଛନ୍ତି ଯେ ଆପଣ ପୁନର୍ବାର ଭାଜପାର ସମର୍ଥନ ପାଇବେ, ତେବେ ଏହା ଭୁଲିଯାଆନ୍ତୁ। ଆପଣଙ୍କ ପାଇଁ ଭାଜପାର ଦ୍ୱାର ସବୁଦିନ ବନ୍ଦ ହୋଇଯାଇଛି। ମୁଁ ବିହାରର ଲୋକଙ୍କୁ ସ୍ପଷ୍ଟ କରିବାକୁ ଚାହୁଁଛି, ଆମେ ଆଗକୁ ନୀତୀଶ କୁମାରଙ୍କ ସହ ମେଣ୍ଟ କରିବୁ ନାହିଁ।
ଶାହା ଆହୁରି ମଧ୍ୟ କହିଚନ୍ତି, ନୀତୀଶ ବାବୁଙ୍କୁ କ୍ଷମତାର ଲୋଭ ଲାଲୁ ଜିଙ୍କ କୋଳରେ ବସିବାକୁ ବାଧ୍ୟ କଲା। ମୁଁ ଏପରି ସ୍ବାର୍ଥପର ସରକାର ଦେଖି ନାହିଁ। ଜଣେ ବ୍ୟକ୍ତିଙ୍କୁ ପ୍ରଧାନମନ୍ତ୍ରୀ ହେବାକୁ ପଡିବ ଏବଂ ଲାଲୁଜୀଙ୍କ ପୁଅକୁ ମୁଖ୍ୟମନ୍ତ୍ରୀ ହେବାକୁ ପଡିବ। ମୁଁ ଲାଲୁ ଜୀଙ୍କୁ ମଧ୍ୟ କହିବାକୁ ଆସିଛି, ନୀତୀଶ ଜୀ ପ୍ରଧାନମନ୍ତ୍ରୀ ହେବାକୁ ଯାଉନାହାଁନ୍ତି। ସେଠାରେ କୌଣସି ଖାଲି ସ୍ଥାନ ନାହିଁ ଏବଂ ଯଦି ସେ ପ୍ରଧାନମନ୍ତ୍ରୀ ହୁଅନ୍ତି ତେବେ ମଧ୍ୟ ଆପଣଙ୍କ ପୁଅକୁ ମୁଖ୍ୟମନ୍ତ୍ରୀ କରିବେ ନାହିଁ। ବିହାରର ଲୋକମାନେ ନିଷ୍ପତ୍ତି ନେଇଛନ୍ତି ଯେ, ବିହାରର ସମସ୍ତ ୪୦ଟି ଆସନରେ ପଦ୍ମ ଫୁଟିବାକୁ ଯାଉଛି। ମୁଁ ବିହାରର ଲୋକଙ୍କୁ କହିବାକୁ ଚାହେଁ, ୨୦୨୪ରେ ବିହାରରୁ ଭାଜପାକୁ ୪୦ଟି ଆସନ ଦିଅନ୍ତୁ ଏବଂ ୨୦୨୫ରେ ଭାଜପା ସରକାର ଗଠନ କରନ୍ତୁ। ଦଙ୍ଗାକାରୀଙ୍କୁ ଉଚିତ ଜବାବ ଦିଆଯିବ।
