ନୂଆଦିଲ୍ଲୀ,୨୬ା୬: ଉତ୍ତରାଖଣ୍ଡର ହରିଦ୍ୱାରରେ ଜଣେ ୧୩ ବର୍ଷୀୟା ଝିଅଙ୍କୁ ବଳାତ୍କାର ପରେ ହତ୍ୟା ଅଭିଯୋଗରେ ଭାଜପା ନେତା ଆଦିତ୍ୟରାଜ ସାଇନି ଗିରଫ ହୋଇଛନ୍ତି। ଗିରଫଦାରି ପରେ ଭାଜପା ତାଙ୍କୁ ଦଳରୁ ବହିଷ୍କାର କରିଛି। ଏଥିସହ ଓବିସି ପଛୁଆ ବର୍ଗ କମିଶନ ମନୋନୀତ ସଦସ୍ୟ ପଦରୁ ମଧ୍ୟ ସାଇନିଙ୍କୁ ହଟାଇ ଦିଆଯାଇଛି।
ନାବାଳିକା ଜଣକ ୩ ଦିନ ତଳେ ନିଖୋଜ ହୋଇଯାଇଥିଲେ। ଘର ଲୋକେ ଖୋଜାଖୋଜି କରି ନ ପାଇବାରୁ ଝିଅଙ୍କୁ ଫୋନ୍ କରିଥିଲେ। ଭାଜପା ନେତା ସାଇନି ଫୋନ୍ ଉଠାଇ ଝିଅ ତାଙ୍କ ସହ ଥିବା କହିଥିଲେ। ପରେ ସେ ଫୋନ୍କୁ ସୁଇଚ୍ ଅଫ୍ କରିଦେଇଥିଲେ। ପୀଡ଼ିତାଙ୍କ ମୃତଦେହ ପତଞ୍ଜଳି ଯୋଗ ରିସର୍ଚ୍ଚ ସେଣ୍ଟର ନିକଟସ୍ଥ ବହାଦରାବାଦ ଅଞ୍ଚଳରୁ ମଙ୍ଗଳବାର ଜବତ ହୋଇଥିଲା। ନାବାଳିକାଙ୍କୁ ହତ୍ୟା ପୂର୍ବରୁ ଭାଜପା ନେତା ସାଇନି ଓ ତାଙ୍କ ସହଯୋଗୀମାନେ ଗଣବଳାତ୍କାର କରିଥିବା ପରିବାର ଲୋକେ ଅଭିଯୋଗ କରିଥିଲେ। ଭାରତୀୟ ପିଙ୍ଗଳ କୋଡ୍ (ଆଇପିସି) ଏବଂ ଶିଶୁଙ୍କୁ ଯୌନ ଅପରାଧରୁ ସୁରକ୍ଷା ଦେବା ପାଇଁ ଉଦ୍ଦିଷ୍ଟ ପୋକ୍ସୋର ବିଭିନ୍ନ ଦଫାରେ ସାଇନିଙ୍କ ବିରୋଧରେ ବଳାତ୍କାର ଓ ହତ୍ୟା ମାମଲା ରୁଜୁ ହୋଇଛି। ତଦନ୍ତ ପାଇଁ ୫ ପୋଲିସ ଟିମ୍ ଗଠନ କରାଯାଇଛି।