ବାରିପଦା,୩ା୪(ନୀଳାଦ୍ରି ବିହାରୀ ଦଣ୍ଡପାଟ):ମୟୂରଭଞ୍ଜ ଜିଲାରେ ଥିବା ୯ ବିଧାନସଭା ଆସନ ମଧ୍ୟରୁ ମଙ୍ଗଳବାର ୫ଟିରେ ଭାଜପା ପ୍ରାର୍ଥୀ ଘୋଷଣା କରିଛି। ପୁରୁଣା ପ୍ରାର୍ଥୀଙ୍କ ଉପରେ ଭରସା କରି ଦଳ ପୁନର୍ବାର ସେମାନଙ୍କୁ ଟିକେଟ ଦେଇଛି। ବଡ଼ସାହି ନିର୍ବାଚନ ମଣ୍ଡଳୀରୁ ସନାତନ ବିଜୁଳି, ଉଦଳାରୁ ଭାସ୍କର ମଢ଼େଇ, ବାରିପଦାରୁ ପ୍ରକାଶ ସୋରେନ, ମୋରଡ଼ାରୁ ଡ.କୃଷ୍ଣଚନ୍ଦ୍ର ମହାପାତ୍ର ଓ ଯଶୀପୁରରୁ ଗଣେଶ ରାମସିଂ ଖୁଣ୍ଟିଆ ପୁଣି ଥରେ ପ୍ରାର୍ଥୀ ହୋଇଛନ୍ତି। ଅବଶିଷ୍ଟ ଆସନଗୁଡ଼ିକରେ ନୂଆ ମୁହଁ ଦେଖାଯିବା ନେଇ ଚର୍ଚ୍ଚା ଜୋର ଧରିଛି।
ଜିଲାର ବଡ଼ସାହି, ଉଦଳା, ବାରିପଦା, ମୋରଡ଼ା ଓ ଯଶୀପୁର ବିଧାନସଭା କ୍ଷେତ୍ର ପାଇଁ ଭାଜପା ପକ୍ଷରୁ ପ୍ରାର୍ଥୀ ଘୋଷଣା ପରେ ଦଳୀୟ ରାଜନୀତି ସରଗରମ ହୋଇଛି। ବାଲେଶ୍ୱର ଲୋକସଭା କ୍ଷେତ୍ର ଅଧୀନ ୩୨ନଂ. ବଡ଼ସାହି ବିଧାନସଭା ନିର୍ବାଚନ ମଣ୍ଡଳୀର ବିଧାୟକ ସନାତନ ବିଜୁଳିଙ୍କୁ ପୁନର୍ବାର ପ୍ରାର୍ଥୀ ଚୟନ କରାଯାଇଛି। ୨୦୧୯ ନିର୍ବାଚନରେ ମୋଟ ୧ଲକ୍ଷ ୯୦ହଜାର ୧୬୬ ଭୋଟରଙ୍କ ମଧ୍ୟରୁ ୧ଲକ୍ଷ ୪୫ହଜାର ୧୧୯ ଭୋଟ ଦେଇଥିଲେ। ସନାତନ ସେଥିମଧ୍ୟରୁ ୬୯୦୭୨ଖଣ୍ଡ ଭୋଟ ପାଇ ନିର୍ବାଚିତ ହୋଇଥିବା ବେଳେ ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେଡିର ବୃନ୍ଦାବନ ଦାସ ୫୯୯୫୩ ଭୋଟ ପାଇଥିଲେ। ସେହିପରି କରଞ୍ଜିଆ ନିର୍ବାଚନ ମଣ୍ଡଳୀକୁ ବାଦ ଦେଲେ ଅବଶିଷ୍ଟ ଆସନଗୁଡ଼ିକ ମୟୂରଭଞ୍ଜ ଲୋକସଭା କ୍ଷେତ୍ର ଅଧୀନରେ ରହିଛି। ୩୧ନଂ. ଉଦଳା ବିଧାନସଭା ନିର୍ବାଚନ ମଣ୍ଡଳୀର ବିଧାୟକ ଭାସ୍କର ମଢ଼େଇଙ୍କୁ ପ୍ରାର୍ଥୀ ଘୋଷଣା କରାଯାଇଛି। ଗତ ନିର୍ବାଚନରେ ମୋଟ ୧ଲକ୍ଷ ୯୨ହଜାର ୬୭୮ ଭୋଟରଙ୍କ ମଧ୍ୟରୁ ୧ଲକ୍ଷ ୫୧ହଜାର ୩୬ ଭୋଟ ଦେଇଥିଲେ। ସେଥି ମଧ୍ୟରୁ ୬୯୭୨୫ ଖଣ୍ଡ ଭୋଟ ପାଇ ଭାସ୍କର ନିର୍ବାଚିତ ହୋଇଥିବା ବେଳେ ତାଙ୍କ ନିକଟତମ ପ୍ରତିଦ୍ୱନ୍ଦୀ ଶ୍ରୀନାଥ ସୋରେନ ୬୮୨୯୨ଖଣ୍ଡ ଭୋଟ ପାଇଥିଲେ। ସେହିପରି ୩୩ନଂ. ବାରିପଦା ବିଧାନସଭା ନିର୍ବାଚନ ମଣ୍ଡଳୀର ବିଧାୟକ ପ୍ରକାଶ ସୋରେନଙ୍କ ନାମ ପ୍ରାର୍ଥୀ ତାଲିକାରେ ପ୍ରକାଶ ପାଇଛି। ୨୦୧୯ ନିର୍ବାଚନରେ ମୋଟ ୨ଲକ୍ଷ ୧୬ହଜାର ୧୪୫ ଭୋଟରଙ୍କ ମଧ୍ୟରୁ ୧ଲକ୍ଷ ୫୭ହଜାର ୯୦୩ ମତଦାନ ହୋଇଥିଲା। ସେଥିରୁ ୭୨୨୨୫ଖଣ୍ଡ ଭୋଟ ପାଇ ପ୍ରକାଶ ନିର୍ବାଚିତ ହୋଇଥିବା ବେଳେ ନିକଟତମ ପ୍ରତିଦ୍ୱନ୍ଦୀ ବିଜେଡିର ସରୋଜିନୀ ହେମ୍ବ୍ରମ ୫୨୮୧୪ ଭୋଟ ପାଇଥିଲେ। ୩୪ନଂ. ମୋରଡ଼ା ବିଧାନସଭା ନିର୍ବାଚନ ମଣ୍ଡଳୀର ପରାଜିତ ପ୍ରାର୍ଥୀ ଡ.କୃଷ୍ଣଚନ୍ଦ୍ର ମହାପାତ୍ରଙ୍କୁ ଦଳ ପକ୍ଷରୁ ପୁନର୍ବାର ପ୍ରାର୍ଥୀ ଘୋଷଣା କରାଯାଇଛି। ଗତ ନିର୍ବାଚନରେ ମୋଟ ୨ଲକ୍ଷ ୨୪ହଜାର ୫୭୪ ଭୋଟରଙ୍କ ମଧ୍ୟରୁ ୧ଲକ୍ଷ ୭୭ହଜାର ୭୭୩ ମତଦାନ ହୋଇଥିଲା। ସେଥିରୁ ଭାଜପା ପ୍ରାର୍ଥୀ କୃଷ୍ଣଚନ୍ଦ୍ର ୬୧୮୪୭ଖଣ୍ଡ ଭୋଟ ପାଇ ପରାଜିତ ହୋଇଥିବା ବେଳେ ବିଜେଡି ପ୍ରାର୍ଥୀ ରାଜକିଶୋର ଦାସ ୬୮୫୫୧ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ୨୬ନଂ. ଯଶୀପୁର ବିଧାନସଭା କ୍ଷେତ୍ରର ବିଧାୟକ ଗଣେଶ ରାମ ସିଂ ଖୁଣ୍ଟିଆଙ୍କୁ ଭାଜପା ପୁଣି ପ୍ରାର୍ଥୀ କରିଛି। ଗତ ନିର୍ବାଚନରେ ମୋଟ ୨ଲକ୍ଷ ୧୦ହଜାର ୮ ଭୋଟରଙ୍କ ମଧ୍ୟରୁ ୧ଲକ୍ଷ ୫୮ହାଜର ୭୪ ଜଣ ଭୋଟ ଦେଇଥିଲେ। ସେଥିରୁ ୫୮୭୦୮ଖଣ୍ଡ ଭୋଟ ପାଇ ଗଣେଶ ରାମସିଂ ନିର୍ବାଚିତ ହୋଇଥିବା ବେଳେ ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେଡିର ଗୋଲକ ବିହାରୀ ନାୟକ ୫୦୧୫୬ଖଣ୍ଡ ଭୋଟ ପାଇଥିଲେ। ତେବେ ଭାଜପା-ବିଜେଡି ମେଣ୍ଟ ଚର୍ଚ୍ଚାରେ ପୂର୍ଣ୍ଣଚ୍ଛେଦ ପଡ଼ିବା ପରେ ଗୋଷ୍ଠୀ କନ୍ଦଳକୁ ପ୍ରତିହତ କରିବା ଉଦ୍ଦେଶ୍ୟରେ ଭାଜପା ପୁରୁଣା ପ୍ରାର୍ଥୀଙ୍କ ଉପରେ ଭରସା କରି ପୁନର୍ବାର ମଇଦାନକୁ ଓହ୍ଲାଇଛି ବୋଲି କୁହାଯାଉଛି। ଅବଶିଷ୍ଟ କରଞ୍ଜିଆ, ବାଙ୍ଗରିପୋଷି, ସାରସକଣା ଓ ରାଇରଙ୍ଗପୁର ଆସନ ପାଇଁ ଦଳ ପକ୍ଷରୁ ନୂଆ ମୁହଁ ଦିଆଯାଇପାରେ ବୋଲି ଆଲୋଚନା ହେଉଛି।
