ବିଜୁ ପଟ୍ଟନାୟକଙ୍କୁ ଅପମାନିତ କରିଛି ଭାଜପା ସରକାର: ବିଜେଡି ପକ୍ଷରୁ ଜୋରଦାର ପ୍ରତିବାଦ

ବଲାଙ୍ଗୀର, ୬।୩(ସୁନିଲ କୁମାର ମହାନ୍ତି): ବଲାଙ୍ଗୀର ବିଜେଡି ପକ୍ଷରୁ ଗୁରୁବାର ଜିଲାପାଳ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ସମାବେଶ ଓ ପ୍ରତିବାଦ ସଭା କରାଯାଇଥିଲା। ପୂର୍ବରୁ ପ୍ରତିବର୍ଷ ମାର୍ଚ୍ଚ ୫ ତାରିଖ ବିଜୁ ପଟ୍ଟନାୟକଙ୍କ ଜନ୍ମଦିନରେ ପଞ୍ଚାୟତିରାଜ ଦିବସ ପାଳନ କରାଯାଉଥିଲା । ଏହି ଦିନକୁ ସରକାରୀ ଛୁଟି ଘୋଷଣା କରଯାଉଥିଲା l ମାତ୍ର ରାଜ୍ୟରେ ନୂଆ ଭାଜପା ସରକାର ଆସିବା ପରେ ମାର୍ଚ୍ଚ ୫ ପରିବର୍ତ୍ତେ ଏପ୍ରିଲ ୨୪ ତାରିଖକୁ ପଞ୍ଚାୟତିରାଜ ଦିବସ ପାଳନ କରିବାକୁ ସ୍ଥିର କରାଯାଇଥିବା କୁହାଯାଇଛି l ଏହାକୁ ବିଜେଡି ପକ୍ଷରୁ ତୀବ୍ର ବିରୋଧ କରାଯାଇଛି। ଏହି ଦିବସକୁ ବଦଳାଇବା ପଛର ରହସ୍ୟ କଣ ରହିଛି ବୋଲି ବିଜୁ ଜନତା ଦଳ ପକ୍ଷରୁ ପ୍ରଶ୍ନ କରାଯାଇଛି l ଏହା ବିଜୁବାବୁଙ୍କ ଭଳି କୃତି ସନ୍ତାନଙ୍କ ପ୍ରତି ଘୋର ଅପମାନ ବୋଲି କୁହାଯାଇଛି । ବିଜୁ ପଟ୍ଟନାୟକ ଓଡ଼ିଶାର ସୁଯୋଗ୍ୟ ସନ୍ତାନ । ସର୍ବସାଧାରଣଙ୍କ ହିରୋ। ତାଙ୍କୁ କେହିବି ହଟାଇ ପାରିବେ ନାହିଁ। ଭାଜପା ଏଭଳି ହୀନମନ୍ୟତା ପରିତ୍ୟାଗ କରୁ ବୋଲି ବିଜେଡି ନେତା ଓ ନେତ୍ରୀମାନେ କହିଥିଲେ।