ନୂଆଦିଲ୍ଲୀ,୬।୯: ଲୋକ ସଭା ନିର୍ବାଚନକୁ ନେଇ ବିଭିନ୍ନ ରାଜନୈତିକ ଦଳ ଏବେଠାରୁ ଅଣ୍ଟା ଭିଡ଼ିଲେଣି। ଏହି ରେସ୍ରେ ଭାଜପା ମଧ୍ୟ ପଛରେ ନାହିଁ। ୨୦୨୪ ଲୋକ ସଭା ନିର୍ବାଚନ ପାଇଁ ଭାଜପା ନିଜର ସମସ୍ତ ପ୍ରସ୍ତୁତି ଆରମ୍ଭ କରିସାରିଛି। ଏହାକୁ ଦୃଷ୍ଟିରେ ରଖି ମଙ୍ଗଳବାର ଦିଲ୍ଲୀରେ ଭାଜପା ମୂଖ୍ୟାଳୟରେ ଏକ ବଡ ବୈଠକ ଅନୁଷ୍ଠିତ ହୋଇଛି। ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଛି। ଏଥିରେ ବହୁ ନେତା ମନ୍ତ୍ରୀ ଯୋଗଦେଇଛନ୍ତି। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ବୈଠକରେ ସେହି ୧୪୪ଲୋକ ସଭା ଆସନ ଜିତିବା ପାଇଁ ରଣନୀତି ପ୍ରସ୍ତୁତ କରାଯିବ। ଯେଉଁଥିରେ ଗତ ନିର୍ବାଚନରେ ଭାଜପା ସାମାନ୍ୟ ବ୍ୟବଧାନରେ ବଞ୍ଚିତ ହୋଇଥିଲା। ଏଥିରେ ସେହି ନିର୍ବାଚନମଣ୍ଡଳୀ ସାମିଲ ରହିଛି, ଯେଉଁଠାରେ ୨୦୧୯ ଲୋକ ସଭା ନିର୍ବାଚନରେ ଭାଜପା ଦ୍ୱିତୀୟ ବା ତୃତୀୟ ସ୍ଥାନ ହାସଲ କରିଛି କିମ୍ବା ଏଠାରେ କେବେ ବିଜୟ ଲାଭ କରିନାହିଁ। ତେବେ ଏହି ଆସନଗୁଡିକୁ ଗୋଷ୍ଠୀରେ ବିଭକ୍ତ କରାଯାଇ ପ୍ରତ୍ୟେକ ଗୋଷ୍ଠୀକୁ କେନ୍ଦ୍ରମନ୍ତ୍ରୀ ପରିଚାଳନା କରିଥିଲେ। ମନ୍ତ୍ରୀମାନେ ଏହି ନିର୍ବାଚନମଣ୍ଡଳୀରେ ଭାଜପାର ସ୍ଥିତିକୁ ବିଶ୍ଳେଷଣ କରିବା ସହ ୨୦୨୪ ନିର୍ବାଚନରେ ଦଳର ବିଜୟ ନିଶ୍ଚିତ କରିବାକୁ ଆବଶ୍ୟକ ପଦକ୍ଷେପଗୁଡିକୁ ଚିହ୍ନଟ କରିଛନ୍ତି। ତେବେ ଏହି ବୈଠକରେ ମନ୍ତ୍ରୀମାନେ ଏହି ନିର୍ବାଚନମଣ୍ଡଳୀଗୁଡ଼ିକ ଉପରେ ବିସ୍ତୃତ ରିପୋର୍ଟ ଉପସ୍ଥାପନ କରିବେ ବୋଲି ସୂତ୍ରରୁ ଜଣାପଡିଛି ।