ପାଟନା,୧୮ ।୯: କିଛି ବଡ ବଡ ରାଜ୍ୟରେ ନିର୍ବାଚନରେ ହାରିବା ପରେ ଏବେ ବିହାରରେ ଆଉ ବିପଦକୁ ବରଣ କରିବାକୁ ଚାହୁଁ ନାହିଁ ଭାରତୀୟ ଜନତା ପାର୍ଟି(ଭାଜପା) । ସେଥିପାଇଁ ଦଳ ବିହାର ବିଧାନସଭା ନିର୍ବାଚନ ପୂର୍ବରୁ ଏକ ଅଭ୍ୟନ୍ତରୀଣ ସର୍ଭେ କରିଥିବା ସୂଚନା ମିଳିଛି । ଏହି ସର୍ଭେ ଦଳର ମହାସଚିବ, ଏମ୍ଏଲ୍ସି ଓ ପ୍ରଦେଶ ଉପାଧ୍ୟକ୍ଷଙ୍କୁ ନେଇ ଗଠିତ ଏକ ୯୦ ଜଣିଆ ଟିମ୍ କରିଥିବା କୁହାଯାଉଛି । ଗଣମାଧ୍ୟମର ସୂଚନା ଅନୁଯାୟୀ, ଏହା ୨୫ରୁ ୨୮ ଅଗଷ୍ଟ ମଧ୍ୟରେ କରାଯାଇଛି । ପାର୍ଟି ମଣ୍ଡଳ ସ୍ତର ପର୍ଯ୍ୟନ୍ତ ଯାଇ ଏହି ସର୍ଭେ କରିଥିବା ବେଳେ ଏବେ ଯାହା ଫଳାଫଳ ଆସିଛି ତାହା ସମସ୍ତଙ୍କୁ ଚମକାଇ ଦେଇଛି । ବିହାରରେ ଦୀର୍ଘ ୧୫ ବର୍ଷ ହେବ ଶାସନ କ୍ଷମତାରେ ଥିବା ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ବିରୋଧରେ ଏଥର Anti-incumbency factor ବହୁତ ଅଧିକ ଦେଖିବାକୁ ମିଳିଛି । ଏଥର ନୀତୀଶଙ୍କ ଉପରେ ଲୋକେ ଅନ୍ତୁଷ୍ଟ ଥିବା ସ୍ପଷ୍ଟ ବାରି ହୋଇପଡିଛି । ଏହାସହ ଗତ ୫ ବର୍ଷ ମଧ୍ୟରେ ନୀତୀଶ ଯେଉଁସବୁ କାମ କରିଛନ୍ତି ସେଥିରେ ଜନତା ଖୁସି ନାହାନ୍ତି । ଏବେ ଏହି ରିପୋର୍ଟ ବିହାର ଭାଜପା ପ୍ରଭାରି ଭୁପେନ୍ଦ୍ର ଯାଦବ ଓ ଉପ ମୁଖ୍ୟମନ୍ତ୍ରୀ ସୁଶିଲ ମୋଦିଙ୍କୁ ଦେଇ ଦିଆଯାଇଛି ।