ପଦ୍ମପୁର,୨୩।୧୧(ଡି.ଏନ.ଏ.): ବରଗଡ଼ ଜିଲା ପଦ୍ମପୁର ଉପଖଣ୍ଡକୁ ଜିଲା ଗଠନ ପ୍ରସଙ୍ଗରେ ମିଳିତ କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ତରଫରୁ ଏକ ୪୦ ଜଣିଆ ପ୍ରତିନିଧି ଦଳ ଗତ ୧୬ ତାରିଖରେ ଭୁବନେଶ୍ୱର ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ଆଲୋଚନା କରିଥିଲେ। ମୁଖ୍ୟମନ୍ତ୍ରୀ ସକରାତ୍ମକ ମନୋଭାବ ପୋଷଣ କରି ଉକ୍ତ ପ୍ରତିନିଧି ମଣ୍ଡଳୀକୁ ୨୦୨୪ ଡିସେମ୍ବର ସୁଦ୍ଧା ଜିଲା ଘୋଷଣା କରିବା ପାଇଁ ପ୍ରତିଶ୍ରୁତି ଦେଇଥିଲେ। ଏହି କ୍ରମରେ ମିଳିତ କ୍ରିୟାନୁଷ୍ଠାନ କମିଟି ତରଫରୁ କଚେରି ପରିସରରେ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଥିଲା। ଏଥିରେ କ୍ରିୟାନୁଷ୍ଠାନ କମିଟିର ଆବାହକ ଉମେଶ ସାହୁ ମୁଖ୍ୟମନ୍ତ୍ରୀଙ୍କ ଘୋଷଣାରେ ଆମେ ସନ୍ତୁଷ୍ଟ ନୋହୁଁ। ଆଗାମୀ ଦିନରେ ଏହି ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି କହିଥିଲେ। ପ୍ରସ୍ତାବିତ ପଦ୍ମପୁର ଜିଲା ପୁନର୍ଗଠନ କ୍ରିୟାନୁଷ୍ଠାନ ଓ ପ୍ରସ୍ତାବିତ ଜିଲା କ୍ରିୟାନୁଷ୍ଠାନ କମିଟି ମିଳିତ ହୋଇ ଗୋଟିଏ ମଞ୍ଚରେ ଆନ୍ଦୋଳନ କରି ଦାବି ରଖିବେ। ଏହାସହ ଉଭୟଙ୍କ ପକ୍ଷରୁ ଜଣେ ଆବାହକ ଓ ସଂଯୋଜକ ରହିବେ ବୋଲି କମିଟି ତରଫରୁ ଅଜିତ ଶତପଥୀ ସୂଚନା ଦେଇଥିଲେ। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଆନନ୍ଦ ପଣ୍ଡା, ପ୍ରଶାନ୍ତ ମାଝୀ, ପ୍ରମୋଦ ମିଶ୍ର, ପ୍ରଦୀପ ଯୋଷୀ ପ୍ରମୁଖ ଉପସ୍ଥିତ ଥିଲେ।