![](https://www.dharitri.com/wp-content/uploads/2023/05/SATA-2-231.jpg)
ଟାଙ୍ଗୀ(ଖୋର୍ଦ୍ଧା),୨୩ା୫ (ଡି.ଏନ୍.ଏ.): ଖୋର୍ଦ୍ଧା ଜିଲା ଟାଙ୍ଗୀ ବିଡିଓ ଐଶ୍ୱର୍ଯ୍ୟା ସାମନ୍ତରାୟଙ୍କ ଦସ୍ତଖତକୁ ଜାଲ୍ କରି ୧୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ଉଠାଇ ନେଇଥିବା ଅଭିଯୋଗରେ ଟାଙ୍ଗୀ ଥାନା ପୋଲିସ ଜଣେ ଠିକାଦାରଙ୍କୁ ଗିରଫ କରି ମଙ୍ଗଳବାର କୋର୍ଟଚାଲାଣ କରିଛି। ସେ ହେଲେ ଚିଲିକା ବ୍ଲକ ଅଧ୍ୟକ୍ଷାଙ୍କ ସ୍ବାମୀ ତଥା ଭାଜପା ନେତା କିଶୋର ବେହେରା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନା ଅନୁଯାୟୀ, ଟାଙ୍ଗୀ ବ୍ଲକ ଅନ୍ତର୍ଗତ ବଡ଼ପାରି ଏବଂ କୁହୁଡ଼ି ସ୍ବାସ୍ଥ୍ୟ ଉପକେନ୍ଦ୍ର ଗୃହ ନିର୍ମାଣ ପାଇଁ କିଶୋର ଟେଣ୍ଡର ପାଇଥିଲେ। ଏହି କାମ କରିବା ପାଇଁ କିଶୋର ବ୍ଲକ ପ୍ରଶାସନ ସହ ଏଗ୍ରିମେଣ୍ଟ କରିଥିଲେ। ଏହି ଏଗ୍ରିମେଣ୍ଟ ଅନୁସାରେ ସିକ୍ୟୁରିଟି ବାବଦକୁ ୧୫ ଲକ୍ଷରୁ ଅଧିକ ଟଙ୍କାର ୪ଟି ଟିଡିଆର ନିଜ ନାମରେ ସୋରଣ ସ୍ଥିତ ଇଣ୍ଡିଆନ ଓଭରସିଜ୍ ବ୍ୟାଙ୍କ ଶାଖାରେ ଫିକ୍ସ ଡିପୋଜିଟ୍ କରି ବିଡିଓଙ୍କ ନାମରେ ପ୍ଲେଜ୍ କରିଥିଲେ। ନିୟମ ଅନୁସାରେ କାମ ସରିବା ପରେ ବ୍ଲକ କର୍ତ୍ତୃପକ୍ଷଙ୍କ ନିର୍ଦ୍ଦେଶ ପରେ ସେ ସେହି ଜମା ଅର୍ଥ ଉଠାଣ କରିଥାନ୍ତେ। ହେଲେ କାମ ଆରମ୍ଭ କରିବା ପୂର୍ବରୁ ବିଡିଓ ସାମନ୍ତରାୟଙ୍କ ଦସ୍ତଖତକୁ ଜାଲ କରି କିଶୋର ସେହି ଟଙ୍କା ଉଠାଇ ନେଇଥିବା ଜଣାପଡିଥିଲା। ବ୍ଲକର ଆକାଉଣ୍ଟ ନମ୍ବର ୭୪୫୪୦୯୬୧୪୮ରୁ ୨୮,୧୭୪ ଟଙ୍କା, ଆକାଉଣ୍ଟ ନଂ.୭୪୫୪୦୯୦୭୧୪ରୁ ୨୮,୧୭୪ ଟଙ୍କା, ଆକାଉଣ୍ଟ ନଂ. ୭୫୫୪୧୦୨୬୯୭ରୁ ୭,୪୫,୧୮୮ ଏବଂ ଆକାଉଣ୍ଟ ନଂ.୭୪୫୪୯୦୧୮୩୭ରୁ ୭,୪୫,୧୮୮ ଟଙ୍କା ଏପରି ୪ଟି ପର୍ଯ୍ୟାୟରେ ଦୁଇଦିନ ମଧ୍ୟରେ ୧୫ ଲକ୍ଷ ୪୬ହଜାର ୭୨୪ ଟଙ୍କା ଉଠାଇ ନେଇଥିଲେ। ଏହି ଘଟଣା ଜଣାପଡିବା ପରେ ବିଡିଓ ସାମନ୍ତରାୟ ଥାନାରେ ଅଭିଯୋଗ କରିଥିଲେ। ଏ ସମ୍ପର୍କରେ ପୋଲିସ ଏକ ମାମଲା (ନଂ.୪୧୪/୨୩) ରୁଜୁ କରି ତଦନ୍ତ ଚଳାଇବା ସହ ସୋମବାର ରାତିରେ କିଶୋରଙ୍କୁ ଗିରଫ କରିଥିଲା। ପ୍ରକାଶ ଯେ, ଅଭିଯୁକ୍ତ କିଶୋର ଭାଜପାର ଜଣେ ଟାଣୁଆ ସଙ୍ଗଠକ ଭାବେ ଜଣାଶୁଣା। ତାଙ୍କର ଠିକାଦାରି ଲାଇସେନ୍ସ ଥିବାରୁ ସେ ଏହି ନିର୍ମାଣ କାମ ହାତେଇଥିଲେ।