ନୂଆଦିଲ୍ଲୀ,୧୦।୧୨: ବରିଷ୍ଠ ଭାଜପା ନେତା ତଥା ପଶ୍ଚିମବଙ୍ଗ ବିଧାନସଭାର ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ ସମର୍ଥନ କରିଛନ୍ତି। ସେ ଶେଖ ହସିନାଙ୍କୁ ବାଂଲାଦେଶର ଆଇନଗତ ପ୍ରଧାନମନ୍ତ୍ରୀ ବୋଲି କହିବା ସହ ବର୍ତ୍ତମାନ କ୍ଷମତାରେ ଥିବା ମହମ୍ମଦ ୟୁନୁସ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି।
ବାଂଲାଦେଶର କାମଚଳା ୟୁନୁସ ସରକାର ବେଆଇନ ଭାବେ ଗଣତାନ୍ତ୍ରିକ ଉପାୟରେ ନିର୍ବାଚିତ ହୋଇଥିବା ଶେଖ ହାସିନାଙ୍କୁ ପ୍ରଧାନମନ୍ତ୍ରୀ ପଦରୁ ହଟାଇ ଦେଇଥିବା ଅଧିକାରୀ ଅଭିଯୋଗ କରିଛନ୍ତି। ସେ କହିଛନ୍ତି, ଶେଖ ହାସିନା ହେଉଛନ୍ତି ବାଂଲାଦେଶର ଆଇନଗତ ପ୍ରଧାନମନ୍ତ୍ରୀ। ଯଦି ତାଙ୍କୁ ହଟାଇବାର ଆବଶ୍ୟକ ରହିଛି, ତା’ହେଲେ ଗଣତାନ୍ତ୍ରିକ ଉପାୟରେ ଏହା କରାଯାଇ ପାରିବ। ବର୍ତ୍ତମାନର କାମଚଳା ସରକାର ବେଆଇନ। ଯେତେବେଳେ ହାସିନା ଢାକା ଏୟାରପୋର୍ଟରେ ପହଞ୍ଚିବେ ସେତେବେଳେ ତାଙ୍କୁ ପ୍ରଧାନମନ୍ତ୍ରୀ ଭାବେ ସ୍ବାଗତ କରାଯିବ। ବାଂଲାଦେଶରେ କେମିତି ଗଣତନ୍ତ୍ର ପ୍ରତିଷ୍ଠା ହେବ, ସେଥିରେ ଅନ୍ତର୍ଜାତୀୟ ସମୂହ ହସ୍ତକ୍ଷେପ କରନ୍ତୁ।
ସେ ଆହୁରି କହିଛନ୍ତି, ବେଙ୍ଗଲୀ ହିନ୍ଦୁମାନେ ଆତଙ୍କିତ ଅବସ୍ଥାରେ ରହିଛନ୍ତି। ଆମେ ବାଂଲାଦେଶ ତିଆରି କରିଥିଲୁ ଓ ୧୭ ହଜାର ଭାରତୀୟ ସୈନ୍ୟ ଏହାର ସ୍ବାଧୀନତା ପାଇଁ ବଳିଦାନ ଦେଇଥିଲେ। ଆମେ ମୁଜିବୁର ରହମନଙ୍କୁ ମଧ୍ୟ ସୁରକ୍ଷା ଦେଇଥିଲୁ। ଆଜି ବାଂଲାଦେଶରେ ହିନ୍ଦୁମାନଙ୍କୁ ର୍ନିଯାତନା ଦିଆଯାଉଛି। କେହି ବି ହିନ୍ଦୁମାନଙ୍କୁ ସେଠାରେ ଛୁଇଁପାରିବେ ନାହିଁ। ପୂରା ବିଶ୍ୱର ହିନ୍ଦୁ ସେମାନଙ୍କ ସୁରକ୍ଷା ପାଇଁ ରହିଛନ୍ତି।