ଚନ୍ଦାହାଣ୍ଡି,୪ା୧୧(ଦିଲୀପ ଦାସ): ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ଅଧୀନ ଦଣ୍ଡାମୁଣ୍ଡା ଛକ ପୂର୍ତ୍ତ ବିଭାଗ ରାସ୍ତା ପାର୍ଶ୍ୱରେ ଉମରକୋଟ-ଚନ୍ଦାହାଣ୍ଡି-ମାଲଗାଁ ରାସ୍ତାର ଉନ୍ନତୀକରଣ ନେଇ ଲାଗିଥିବା ହୋର୍ଡିଂରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଫଟୋଚିତ୍ର ଉପରକୁ ଶନିବାର ଗୋବର ମାଡ଼ ହୋଇଥିବା ଦେଖିବାକୁ ମିଳିଥିଲା। ରବିବାର ଭାଜପାର ବରିଷ୍ଠ ନେତା ଗୋବିନ୍ଦ ଜୈନଙ୍କ ଉପସ୍ଥିତିରେ ବିଧାୟକଙ୍କ ପ୍ରତିନିଧି ତଥା ଚନ୍ଦାହାଣ୍ଡି ମଣ୍ଡଳ ସଭାପତି ପ୍ରତାପ ଚନ୍ଦ୍ର ବାଘ, ସମିତିସଭ୍ୟ ପୌରଷ ମାଝୀ, ମାଲଗାଁ ମଣ୍ଡଳ ଉପସଭାପତି ଶ୍ୟାମ ମାଝୀ ପ୍ରମୁଖ ହୋର୍ଡିଂକୁ ପାଣିରେ ସଫା କରିବା ପରେ କ୍ଷୀରରେ ଧୋଇଥିଲେ।
ପ୍ରକାଶଥାଉ କି, ରାଜ୍ୟରେ ବିଜେଡି ସରକାର ହଟି ଭାଜପା ସରକାର ଗଠନ ହେବା ପରେ ରାଜ୍ୟର ସମସ୍ତ ପୂର୍ତ୍ତ ବିଭାଗ ରାସ୍ତା ପାର୍ଶ୍ୱରୁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହୋର୍ଡିଂ ବାହାରକରି ଉକ୍ତ ସ୍ଥାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ହୋର୍ଡିଂ ଲଗାଯାଉଛି। ଏହି କ୍ରମରେ ଚନ୍ଦାହାଣ୍ଡି ବ୍ଲକର ସମସ୍ତ ପୂର୍ତ୍ତ ବିଭାଗ ରାସ୍ତା ପାର୍ଶ୍ୱରେ ନୂତନ ହୋର୍ଡିଂ ଲଗାଯାଉଛି। ଖୋଦ୍ ବିଜେଡି ଜିଲା ସଭାପତିଙ୍କ ଗାଁ ଦଣ୍ଡାମୁଣ୍ଡା ଛକରେ ହୋର୍ଡିଂ ଉପରେ କିଏ ଏବଂ କେଉଁ ଉଦ୍ଦେଶ୍ୟରେ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଫଟୋ ଉପରେ ଗୋବର ମାଡ଼ କରିଛି ତାହା ଏବେ ବି ଅସ୍ପଷ୍ଟ ରହିଛି ।
