ଜଟଣୀ,୩୦।୩(ଡି.ଏନ୍.ଏ.): ଜଟଣୀ ପୌରାଞ୍ଚଳ ୧୪ ନମ୍ବର ୱାର୍ଡରେ ରହୁଥିବା ଜଣେ ଭାଜପା ନେତାଙ୍କ ଝୁଲନ୍ତା ମୃତଦେହକୁ ମଙ୍ଗଳବାର ତାଙ୍କୁ ଘରୁ ଜଟଣୀ ଥାନା ପୋଲିସ ଜବତ କରିଛି। ସେ ହେଲେ ଜଟଣୀର ପୂର୍ବତନ ନଗର ସଭାପତି ଡ. ଅରବିନ୍ଦ ନାୟକ। ଏ ନେଇ ପୋଲିସ ଏକ ଅପମୃତ୍ୟୁ ମାମଲା (ନଂ.୮/୨୨) ରୁଜୁ କରି ତଦନ୍ତ ଚଳାଇଛି। ପୋଲିସ ସୂଚନା ଅନୁଯାୟୀ, ଭାଜପା ନେତା ଅରବିନ୍ଦ ଓ ତାଙ୍କ ସ୍ତ୍ରୀଙ୍କ ମଧ୍ୟରେ କିଛିଦିନ ହେବ ପାରିବାରିକ ବିବାଦକୁ ନେଇ ପାଟିତୁଣ୍ଡ ହେଉଥିଲା। ଏଥିପାଇଁ ଅରବିନ୍ଦ ପ୍ରାୟ ସମୟ ମନସ୍ତାପରେ ରହୁଥିଲେ। ସୋମବାର ଅପରାହ୍ନରେ ଉଭୟଙ୍କ ମଧ୍ୟରେ କୌଣସି କଥାକୁ ନେଇ ପୁଣି କଥା କଟାକଟି ହୋଇଥିଲା। ରାତିରେ ପୂର୍ବରୁ ହୋଇଥିବା ଟିକେଟ ଅନୁଯାୟୀ ଅହମଦାବାଦରେ ରହୁଥିବା ପୁଅ ପାଖକୁ ଯିବା ପାଇଁ ସ୍ତ୍ରୀଙ୍କୁ ସେ ଟ୍ରେନରେ ଛାଡ଼ିଥିଲେ। ପରଦିନ ସକାଳେ ଅରବିନ୍ଦ ଠାକୁରଙ୍କ ପୂଜା କରିବା ପରେ ସ୍ତ୍ରୀଙ୍କୁ କିଛି ମେସେଜ କରିଥିଲେ। ତେବେ ଅରବିନ୍ଦଙ୍କ ସ୍ତ୍ରୀ ସନ୍ଦେହରେ ପଡ଼ୋଶୀଙ୍କୁ ଫୋନ କରି ଜଣାଇଥିଲେ। ପଡ଼ୋଶୀ ଆସି ଦେଖିବା ବେଳେ ଅରବିନ୍ଦ ବେକରେ ଗାମୁଛା ବାନ୍ଧି ଝୁଲୁଥିଲେ। ଖବରପାଇ ପୋଲିସ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଭୁବନେଶ୍ୱରର ଏକ ହସ୍ପିଟାଲକୁ ପଠାଇଛି। ଅରବିନ୍ଦଙ୍କ ମୃତ୍ୟୁ ଖବର ଶୁଣି ବହୁ ସ୍ଥାନୀୟ ଭାଜପା କର୍ମୀ, ନେତାଙ୍କ ସହିତ ବହୁ ମାନ୍ୟଗଣ୍ୟ ବ୍ୟକ୍ତି ତାଙ୍କ ବାସଭବନରେ ପହଞ୍ଚତ୍ ଶେଷ ଦର୍ଶନ କରିବା ସହିତ ସ୍ବର୍ଗତ ଆତ୍ମାର ସଦ୍ଗତି କାମନା ଜରିଥିଲେ। ୪୯ବର୍ଷୀୟ ଅରବିନ୍ଦ ଜଣେ ପରୋପକାରୀ, ଦକ୍ଷ ଭାଜପା ସଂଗଠକ ଓ ନେତା ଭାବେ ଜଟଣୀ ଓ ଖୋର୍ଦ୍ଧା ଅଞ୍ଚଳରେ ପରିଚିତ ଥିଲେ। ତେବେ ଦୀର୍ଘ ବର୍ଷ ସେ ବିଶ୍ୱ ହିନ୍ଦୁ ପରିଷଦ ସଦସ୍ୟ ଓ ଭାଜପାରେ ରହି ନିଷ୍ଠାର ସହ କାର୍ଯ୍ୟ କରିଥିଲେ।