ନୂଆଦିଲ୍ଲୀ,୮।୩: ଆସନ୍ତା ଲୋକ ସଭା ନିର୍ବାଚନରେ ଭାଜପା କ୍ରିକେଟର ମହମ୍ମଦ ଶାମିଙ୍କୁ ପ୍ରାର୍ଥୀ କରିପାରେ। ରଣଜୀ ଟ୍ରଫିରେ ଶାମି ପଶ୍ଚିମବଙ୍ଗରୁ ଖେଳୁଥିଲେ। ଏପରିକି ରାଜ୍ୟ ପାଇଁ ଘରୋଇ କ୍ରିକେଟ ଖେଳୁଥିବାରୁ ଏଠାରୁ ହିଁ ତାଙ୍କୁ ମଇଦାନକୁ ଓହ୍ଲାଇବାକୁ ଚିନ୍ତା କରାଯାଉଛି। ଏନେଇ ଦଳ ପକ୍ଷରୁ ଶାମିଙ୍କୁ ପ୍ରସ୍ତାବ ଦିଆଯାଇଛି। ହେଲେ ସେ ଏଯାଏ କୌଣସି ନିଷ୍ପତ୍ତି ନେଇ ନ ଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି।
ଗତବର୍ଷ ଦିନିକିଆ ବିଶ୍ୱକପ ଶେଷ ହେବା ପରଠୁ ମହମ୍ମଦ ଶାମି ଆଉ ମଇଦାନକୁ ଓହ୍ଲାଇ ନାହାନ୍ତି। ସେ ଏବେ ଆହତ ସମସ୍ୟାକୁ ନେଇ ଅସ୍ତ୍ରୋପଚାର କରାଇଥିବା ବେଳେ ପ୍ରଧାନମନ୍ତ୍ରୀ ମୋଦି ଆଶୁ ଆରୋଗ୍ୟ କାମନା କରିଥିଲେ।
ତେବେ ବିଶ୍ୱକପ୍ ଫାଇନାଲରେ ଅଷ୍ଟ୍ରେଲିଆଠାରୁ ପରାସ୍ତ ହେବା ପରେ ଟିମ ଇଣ୍ଡିଆର ଖେଳାଳିମାନଙ୍କୁ ପ୍ରଧାନମନ୍ତ୍ରୀ ମୋଦି ଭେଟିଥିଲେ। ନିରୁତ୍ସାହିତ ନହେବା ପାଇଁ କହିଥିଲେ। ଉକ୍ତ ସମୟରେ ସେ ଶାମିଙ୍କୁ ତାଙ୍କର ଚମତ୍କାର ପ୍ରଦର୍ଶନ ପାଇଁ ପ୍ରଶଂସା କରିଥିଲେ। ଡ୍ରେସିଂ ରମ୍ର ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ପରେ ଶାମି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହାଙ୍କୁ ମଧ୍ୟ ଭେଟିଥିଲେ। ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶାମିଙ୍କ ଜନ୍ମଭୂମି ଅମରୋହାରେ ତାଙ୍କ ନାମରେ ଏକ କ୍ରିକେଟ ଷ୍ଟାଡିୟମ ନିର୍ମାଣଣ କରିବାକୁ ଘୋଷଣା କରିଥିଲେ।