![](https://www.dharitri.com/wp-content/uploads/2024/07/Untitled-1-286.png)
ଫୁଲବାଣୀ, ୨୪ା୭(ରାକେଶ କୁମାର ରାଉତ): ଫୁଲବାଣୀ ପୌରାଧ୍ୟକ୍ଷା ସ୍ମିତାରାଣୀ ମହାନ୍ତିଙ୍କ ନାମରେ ଆସିଥିବା ଅନାସ୍ଥା ପ୍ରସ୍ତାବ ଉପରେ ମଙ୍ଗଳବାର ଆସ୍ଥା ଭୋଟ ହୋଇଥିଲା ଓ ଏଥିରେ ସେ ହାରିଯାଇଛନ୍ତି। ଭାଜପା ପୌରାଧ୍ୟକ୍ଷାଙ୍କ ବିରୋଧରେ ୧୧ ଜଣ କାଉନସିଲର ମତଦାନ କରିଥିଲେ। ସେମାନଙ୍କ ମଧ୍ୟରୁ ଜଣଙ୍କ ଭୋଟ ନାକଚ ହୋଇଯାଇଥିଲା। ବାକି ୧୦ଟି ଭୋଟ ପୌରାଧ୍ୟକ୍ଷାଙ୍କ ବିରୋଧରେ ଯାଇଥିଲା। ଦୀର୍ଘଦିନରୁ ପୌରାଧ୍ୟକ୍ଷାଙ୍କ ବିରୋଧରେ ଆସିଥିବା ଅନାସ୍ଥା ପ୍ରସ୍ତାବର ଅନ୍ତ ଘଟିଛି। ଆଗକୁ ପୌରାଧ୍ୟକ୍ଷାଙ୍କ ପଦବୀ ନେଇ ନିର୍ବାଚନ ହେବ। ସେ ପର୍ଯ୍ୟନ୍ତ ଏହି ପଦବୀରେ ଜିଲାପାଳ ରହିବେ କିମ୍ବା ସେ ଆଉ କାହାକୁ ଦାୟିତ୍ୱ ଦେଇପାରନ୍ତି ବୋଲି କୁହାଯାଉଛି। ନିର୍ବାଚନ ଫଳାଫଳ ଘୋଷଣା ହେବା ପରେ ବିଜେଡି ଏବଂ ଅନ୍ୟ କାଉନସିଲରଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି।
ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ କନ୍ଧମାଳ ଉପଜିଲାପାଳ ଚିତ୍ତରଞ୍ଜନ ମହନ୍ତ ନିର୍ବାଚନ ଅଧିକାରୀ ଭାବେ ଯାଇ ଫୁଲବାଣୀ ପୌର ପରିଷଦରେ ପହଞ୍ଚତ୍ଥିଲେ। ସେଠାରେ ଉପସ୍ଥିତ କାଉନସିଲରଙ୍କୁ ନେଇ ଅନାସ୍ଥା ପ୍ରସ୍ତାବ ଉପରେ ଆଲୋଚନା କରିଥିଲେ। ଆଲୋଚନା ସଫଳ ନ ହେବାରୁ ଭୋଟିଂ ପାଇଁ ନିଷ୍ପତ୍ତି ଗ୍ରହଣ କରାଯାଇଥିଲା। ୧୧ ଜଣ କାଉନସିଲର ସେମାନଙ୍କ ମତ ସାବ୍ୟସ୍ତ କରିିଥିଲେ। ଦିନ ସାଢ଼େ ୧ଟା ପରେ ଭୋଟ ଗଣତି ହୋଇଥିଲା। ପୌରାଧ୍ୟକ୍ଷାଙ୍କ ବିରୋଧରେ ୧୦ଟି ଭୋଟ ପଡିଥିବା ବେଳେ ଗୋଟିଏ ନାକଚ ହୋଇଥିଲା। ଆଗକୁ ପୌର ପରିଷଦର ଉନ୍ନତି ଦିଗରେ କାର୍ଯ୍ୟ କରାଯିବ ବୋଲି ଅନାସ୍ଥା ଆଣିଥିବା କାଉନସିଲରମାନେ କହିଛନ୍ତି। ଗତ ୧୯ ତାରିଖରେ ଅନାସ୍ଥା ପ୍ରସ୍ତାବ ଉପରେ ଆଲୋଚନା କରାଯାଇ ଆବଶ୍ୟକ ସ୍ଥଳେ ଭୋଟ ଗ୍ରହଣ କରାଯିବା ପାଇଁ ଦିନ ଧାର୍ଯ୍ୟ ହୋଇଥିଲା। ନିର୍ବାଚନ ଅଧିକାରୀ ଭାବେ ଅତିରିିକ୍ତ ଜିଲାପାଳଙ୍କୁ ଦାୟିତ୍ୱ ପ୍ରଦାନ କରାଯାଇଥିଲା। ହେଲେ ସେ ଜରୁରିକାଳୀନ ଛୁଟିରେ ଚାଲିଯିବାରୁ ସେଦିନ ଭୋଟ ଗ୍ରହଣ ହୋଇ ପାରି ନ ଥିଲା। ପ୍ରଶାସନର ଏଭଳି କାର୍ଯ୍ୟକୁ ନେଇ ଅନାସ୍ଥା ଆଣିଥିବା ବିଜେଡି ଏବଂ ଅନ୍ୟ କାଉନସିଲରଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଥିଲା। ପରେ ସମସ୍ତ କାଉନସିଲର ଜିଲାପାଳଙ୍କୁ ଭେଟି ନିଜ ଅଭିଯୋଗ ଜଣାଇଥିଲେ। ଜିଲାପାଳଙ୍କ ଉପସ୍ଥିତିରେ ୨୩ରେ ଅନାସ୍ଥା ଉପରେ ବୈଠକ ହେବା ପରେ ଭୋଟିଂ ହେବ ବୋଲି କହିବା ସହ ସମସ୍ତ କାଉନସିଲରଙ୍କୁ ଚିଠି କରିଥିଲେ।
ସୂଚନାଯୋଗ୍ୟ, ପୌର ପରିଷଦ ସିଧାସଳଖ ନିର୍ବାଚନରେ ଭାଜପାରୁ ଲଢ଼ୁଥିବା ସ୍ମିତାରାଣୀ ମହାନ୍ତି ବିଜୟୀ ହୋଇ ପୌରାଧ୍ୟକ୍ଷା ହୋଇଥିଲେ। ନିଜ କାର୍ଯ୍ୟକାଳ ଆରମ୍ଭରୁ ସେ ବିବାଦୀୟ ହୋଇପଡିଥିଲେ। ମିଥ୍ୟା ବିଲ କରି ଅର୍ଥ ନେଉଥିବା ନେଇ ଅଭିଯୋଗ ହେବା ପରେ କାଉନସିଲରଙ୍କ ମଧ୍ୟରେ ଅସନ୍ତୋଷ ଆରମ୍ଭ ହୋଇଥିଲା। ଫଳସ୍ବରୂପ ଗତ ଏପ୍ରିଲରେ ପ୍ରଥମ କରି ତାଙ୍କ ନାମରେ ଅନାସ୍ଥା ଅଣାଯାଇଥିଲା। ସୂଚନାଯୋଗ୍ୟ, ଫୁଲବାଣୀ ପୌରପାଳିକାର ୧୩ ଆସନ ମଧ୍ୟରୁ ବିଜେଡି ୭, ଭାଜପା ୪ ଓ ସ୍ବାଧୀନ ୨ ଜଣ ଜିତିଥିଲେ। ହେଲେ ୧୧ ଜଣ ଅନାସ୍ଥାରେ ଭୋଟ ଦେଇଥିଲେ।