କୋଲକାତା,୯।୧: ଆଗକୁ ପଶ୍ଚିମବଙ୍ଗ ବିଧାନସଭା ନିର୍ବାଚନ। ଏହାକୁ ଦୃଷ୍ଟିରେ ରଖି ଭାଜପା ପକ୍ଷରୁ ମିଶନ ପଶ୍ଚିମବଙ୍ଗ ଯୋଜନା ଉପରେ ଗୁରୁତ୍ୱାରୋପ କରାଯାଉଛି। ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ପୁଣିଥରେ ରାଜ୍ୟଗସ୍ତରେ ଆସିଛନ୍ତି। ବର୍ଦ୍ଧମାନରେ ୯ କିଲୋମିଟର ରୋଡ ଶୋ’ରେ ନଡ୍ଡା ଯୋଗଦେବେ। ଏହି ଅବସରରେ ସେ ଘରଘର ଅନ୍ନଦାତାଙ୍କ ପରିବାରରୁ ଏକ ମୁଠା ଚାଉଳ ସଂଗ୍ରହ କରିବେ। ଏହି କାର୍ଯ୍ୟକ୍ରମ ଜାନୁୟାରୀ ୨୪ ପର୍ଯ୍ୟନ୍ତ ଜାରି ରହିବ। ଜାନୁୟାରୀ ୨୫ରୁ ୩୦ ମଧ୍ୟରେ ସଂଗୃହୀତ ଚାଉଳ ଦ୍ୱାରା କମ୍ୟୁନିଟ୍ କିଚେନ ଆରମ୍ଭ କରାଯିବ। ରନ୍ଧା ଖାଦ୍ୟକୁ ଗରିବ ଏବଂ ଚାଷୀ ପରିବାରଙ୍କୁ ପ୍ରଦାନ କରାଯିବ। ରାଜ୍ୟର ୨୩ଟି ଜିଲାର ୪୮ ଗାଁରେ ଏହି ଅଭିଯାନ ଅନୁଷ୍ଠିତ ହେବ। ସୁରକ୍ଷା ଦୃଷ୍ଟିରୁ ସମ୍ବେଦନଶୀଳ ଅଞ୍ଚଳରେ ସିଆର୍ପିଏଫ୍ ବାହିନୀଙ୍କୁ ମୁତୟନ କରାଯାଇଛି। ଏହା ଦ୍ୱାରା ରାଜ୍ୟର ୭୪ ଲକ୍ଷ ଚାଷୀ ପରିବାରଙ୍କ ପାଖରେ ପହଞ୍ଚିବାର ଲକ୍ଷ୍ୟ ରଖାଯାଇଛି। କେନ୍ଦ୍ର ସରକାରଙ୍କ କୃଷି ଆଇନକୁ ଅନ୍ନଦାତାମାନେ ବିରୋଧ କରୁଥିବାବେଳେ ଭାଜପାର ଏଭଳି ଅଭିଯାନ ନେଇ ଏବେ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି।
