କଟକ ଅଫିସ,୭।୬: ପୁଣି ଅଭିନେତା ତଥା ବିଜେଡି ଏମ୍ପି ଅନୁଭବ ମହାନ୍ତିଙ୍କ ଆଉ ଏକ ଭିଡିଓ ଚର୍ଚ୍ଚାରେ। ସୋମବାର ଏକ ଭିଡିଓରେ ମିଥ୍ୟା ଖବର ଛାପିବା ତଥା ଅପଲୋଡ୍ କରୁଥିବା ନ୍ୟୁଜ ପୋର୍ଟାଲ ଏବଂ ୟୁଟ୍ୟୁବ୍ ଚ୍ୟାନେଲଗୁଡିକୁ ସେ ଟାର୍ଗେଟ କରିଥିବା ବେଳେ ମଙ୍ଗଳବାର ଭିନ୍ନ ପ୍ରସଙ୍ଗ ଉଠାଇଛନ୍ତି। ୟୁଟ୍ୟୁବ୍ରେ ଅନୁଭବଙ୍କ ନାମରେ ଥିବା ପେଜ୍ରେ ଭିଡିଓଟି ଅପ୍ଲୋଡ୍ ହୋଇଛି।
ଭିଡିଓରେ ଅନୁଭବ ଦୀର୍ଘ ଦିନ ଧରି ନିଜ ମନ ତଳେ ଚାପି ହୋଇ ରହିଥିବା କୋହକୁ ବ୍ୟକ୍ତ କରି କହିଛନ୍ତି, ‘ତୁମେ ମୋତେ ମାରି ସାରିଲଣି । ମରିବାକୁ ନେଇ ଆଉ ଡରାଅ ନାହିଁ। ମୁଁ ଗୋଟିଏ ମଲା ମଣିଷ। ମୁଁ ଏବେ ଗୋଟିଏ ମଲା ମଣିଷର ଜୀବନ ବଞ୍ଚିଛି । ହେଲେ ସମସ୍ତଙ୍କ ପରି ମୋର ବି ଶେଷ ଇଚ୍ଛା ଅଛି। ମୁଁ ବି ବଞ୍ଚିବାକୁ ଚାହେଁ। ମୁଁ ବହୁତ ବୋଝ ନେଲିଣି। ମୋତେ ମାରି ସାରିଲଣି । ମୁଁ ସବୁବେଳେ ବଞ୍ଚିବାକୁ ଚାହୁଁଥିଲି । ମୁଁ ଆଶା କରୁଛି ମୋର ଏହି ଶେଷ ଇଚ୍ଛା ପୂରଣ ହେବ । ଏହାପରେ ମୁଁ ଆଉ କିଛି କହି ପାରିବିନି । କାରଣ ମୋ ପାଟି ସିଲ୍ ହୋଇ ଯାଇଛି। ଯାହା ବି ସମସ୍ୟା ଆସିବ ସେସବୁର ମୁଁ ସାମ୍ନା କରିବା ପାଇଁ ପ୍ରସ୍ତୁତ ଅଛି । ଦିନେ ନା ଦିନେ ସୂର୍ଯ୍ୟୋଦୟ ହେବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ସ୍ତ୍ରୀ ବର୍ଷା ପ୍ରିୟଦର୍ଶନୀଙ୍କ ବିରୋଧରେ ସୋସିଆଲ ମିଡିଆରେ ଭିଡିଓ ଛାଡ଼ିବା ପରେ ସେ ସାଇବର ଥାନାରେ ଅନୁଭବଙ୍କ ନାମରେ ମାନହାନୀ ହେଉଥିବା ନେଇ ଅଭିଯୋଗ ସହ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହି ମାମଲାର ଶୁଣାଣି କରି କୋର୍ଟ ଦୁଇଜଣଙ୍କୁ ସୋସିଆଲ ମିଡିଆରେ ଟିପ୍ପଣୀ ନ କରିବାକୁ ତାଗିଦ୍ କରିଥିଲେ। ଏହାପରଠାରୁ ଅନୁଭବ ଭିଡିଓ ପୋଷ୍ଟ କରୁଥିଲେ ହେଁ ବର୍ଷାଙ୍କୁ ସିଧାସଳଖ ଟାର୍ଗେଟ କରୁନାହାନ୍ତି।
