ନୂଆଦିଲ୍ଲୀ,୨୫।୭: ବଜେଟ୍କୁ ନେଇ ଲୋକ ସଭାରେ ଜୋରଦାର ହଙ୍ଗାମା ହୋଇଛି। କଂଗ୍ରେସ ସଦସ୍ୟମାନେ ଭାଜପା ଏମ୍ପି ଅଭିଜିତ ଗଙ୍ଗୋପାଧ୍ୟାୟଙ୍କ ମନ୍ତବ୍ୟକୁ ନେଇ ହଟ୍ଟଗୋଳ କରିଛନ୍ତି। ସରକାର ଏବଂ ସଦସ୍ୟଙ୍କୁ କ୍ଷମା ମାଗିବାକୁ ଜିଦ୍ ଧରିଛନ୍ତି।
ଗୃହରେ ବଜେଟ ଉପରେ ଆଲୋଚନା ବେଳେ ବଙ୍ଗଳାର ତାମଲୁକରୁ ଭାଜପା ଏମ୍ପି ଅଭିଜିତ ଗଙ୍ଗୋପାଧ୍ୟାୟ ଏ ପ୍ରସଙ୍ଗରେ ନିଜର ମତାମତ ଦେଉଥିବାବେଳେ କଂଗ୍ରେସ ଏମ୍ପି ଗୌରବ ଗୋଗୋଇ ଏକ ମନ୍ତବ୍ୟ ଦେଇଥିଲେ। ଏଥିରେ ଅଭିଜିତ ତାଙ୍କ ବିରୋଧରେ ଆପତ୍ତିଜନକ ଶବ୍ଦ ବ୍ୟବହାର କରିଥିଲେ।
ବଜେଟ ଉପରେ ଆଲୋଚନା ବେଳେ ଅଭିଜିତ୍ ନିଜର ମତ ଉପସ୍ଥାପନ କରିଥିଲେ। ଏହି ସମୟରେ କଂଗ୍ରେସ ଏମ୍ପି ଗୋଗୋଇ କିଛି କହିବାରୁ ଅଭିଜିତ୍ କହିଥିଲେ, ଶିକ୍ଷିତ ସଦସ୍ୟମାନେ ଏ ବିଷୟରେ ଅବଗତ ନୁହଁନ୍ତି। ସେମାନେ ଅଧିକ ଶିଖିବା ଆବଶ୍ୟକ କରନ୍ତି। ଗୋଗୋଇ ଗଡ୍ସେ ବିଷୟରେ ମନ୍ତବ୍ୟ ଦେଇଥିଲେ। ଏନେଇ ଅଭିଜିତ ତାଙ୍କୁ ଷ୍ଟୁପିଡ୍(ମୂର୍ଖ) ବୋଲି କହିଥିଲେ। ଯାହାକୁ ବିରୋଧୀ ସଦସ୍ୟମାନେ ବିରୋଧ କରିଥିଲେ।
