କୋଲକାତା,୨୧ ।୧୨: ପଶ୍ଚିମବଙ୍ଗରେ ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନକୁ ନେଇ ଏବେଠାରୁ ରାଜନୀତି ହେଲାଣି ସରଗରମ । ପ୍ରତିଦିନ ଏଠାରୁ କିଛି ନା କିଛି ନୂଆ ଖବର ଆସୁଛି । ରାଜ୍ୟରେ ଏବେ ଦଳ-ବଦଳକୁ ନେଇ ଚର୍ଚ୍ଚା ଜୋର ଧରିଛି । କିଛି ଦିନ ହେବ ଶାସକ ତ୍ରୁଣମୂଳ କଂଗ୍ରେସ(ଟିଏମ୍ସି)ରୁ କେତେଜଣ ନେତା ଦଳ ଛାଡି ଭାରତୀୟ ଜନତା ପାର୍ଟି(ଭାଜପା)ରେ ଯୋଗ ଦେଇଥିବା ବେଳେ ଏବେ ପ୍ରଥମ କରି ଭାଜପା ଛାଡି ଟିଏମ୍ସିରେ ଯୋଗଦେବା ପ୍ରକ୍ରିୟା ଆରମ୍ଭ ହାଇଯାଇଛି । ଭାଜପା ଏମ୍ପି ସୌମିତ୍ର ଖାଁଙ୍କ ପତ୍ନୀ ସୁଜାତା ମଣ୍ଡଳ ଖାଁ ସୋମବାର ଭାଜପା ଛାଡି ଟିଏମ୍ସିରେ ଯୋଗ ଦେଇଛନ୍ତି । ସୂଚନାଯୋଗ୍ୟ, ନିକଟରେ ଶୁଭେନ୍ଦୁ ଅଧିକାରୀ ଟିଏମ୍ସି ଛାଡି ଭାଜପାରେ ସାମିଲ ହୋଇଥିଲେ । ସୁଜାତା ଟିଏମ୍ସି ଏମ୍ପି ସୌଗତ ରାୟ ଓ ପ୍ରବକ୍ତା କୁଣାଲ ଘୋଷଙ୍କ ଉପସ୍ଥିତିରେ ଦଳରେ ସାମିଲ ହୋଇଛନ୍ତି । ଏହାପରେ ସୁଜାତା କହିଛନ୍ତି ରାଜ୍ୟରେ ଭାଜପାକୁ ଉପରକୁ ଉଠିବା ପାଇଁ ମୁଁ ବହୁତ ପରିଶ୍ରମ କରିଛି ହେଲେ ଏବେ ସେଠାରେ ସମ୍ମାନ ନାହିଁ । ଜଣେ ମହିଳା ହିସାବରେ ଏବେ ଦଳରେ ରହିବା ମୋ ପାଇଁ କଷ୍ଟକର ହୋଇ ପଡିଥିଲା । ଏବେ ଭାଜପା କେବଳ ଭ୍ରଷ୍ଟାଚାରୀ ନେତାଙ୍କୁ ନେଇ ଦଳ ଗଢିବାରେ ଲାଗିପଡିଛି । ଭାଜପାରେ ଏବେ କେହି ମୁଖ୍ୟମନ୍ତ୍ରୀ ପ୍ରାର୍ଥୀ ନାହାନ୍ତି । ତେଣୁ ମମତାଙ୍କ ପାଇଁ କାମ କରିବା ଜଣେ ମହିଳା ଭାବେ ମୋ ପାଇଁ ସମ୍ମାନନକ ହେବ ବୋଲି ସୁଜାତା କହିଛନ୍ତି ।
