ନୂଆଦିଲ୍ଲୀ,୮।୯: ଗତ କିଛିଦିନ ଧରି କେନ୍ଦ୍ର ମନ୍ତ୍ରୀ ତଥା ଲୋକଜନଶକ୍ତି ପାର୍ଟିର ଅଧ୍ୟକ୍ଷ ଚିରାଗ ପାସଓ୍ବାନ କେନ୍ଦ୍ର ସରକାରଙ୍କ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି। ଚିରାଗଙ୍କ ଏହିସବୁ ବୟାନକୁ ନେଇ ହରଡଘଣାରେ ପଡିଛନ୍ତି ଭାଜପା ହାଇକମାଣ୍ଡ। ତେବେ ଚିରାଗଙ୍କ ଉପରେ ଲଗାମ କଷିବା ପାଇଁ ଭାଜପା ନେଇଛି ବଡ଼ ନିଷ୍ପତ୍ତି। ଭାଜପା ପୁଣି ଥରେ ଚିରାଗଙ୍କ ମାମୁଁ ପଶୁପତି ପାରସଙ୍କୁ ଏନଡିଏରେ ସକ୍ରିୟ କରିବାକୁ ଚିନ୍ତା କରିପାରେ। ଏବେ ପ୍ରଶ୍ନ ହେଉଛି ପ୍ରଧାନମନ୍ତ୍ରୀ ମୋଦୀ ନିଜ ହନୁମାନ ଚିରାଗ ପାସୱାନଙ୍କ ଆଗରେ ତାଙ୍କ ମାମୁଁ ପଶୁପତିଙ୍କୁ ଶକ୍ତିଶାଳୀ କରିବାକୁ ଯୋଜନା କରୁଛନ୍ତି କି?
ଗତ କିଛି ମାସ ଧରି ରାଜନୀତିଠାରୁ ବହୁ ଦୂରରେ ଥିବା ପଶୁପତି ପାରସଙ୍କୁ ଭାଜପା ଖୁବ ଶୀଘ୍ର କୌରସି ରାଜ୍ୟର ରାଜ୍ୟପାଳ କିମ୍ବା ଏକ ଗୁରୁତ୍ୱପୂର୍ଣ୍ଣ କେନ୍ଦ୍ରୀୟ ବୋର୍ଡର ଅଧ୍ୟ୪ ଦାୟିତ୍ୱ ଦେଇପାରେ। ଯାହାକୁ ନେଇ ଭାଜପା ଦେଖେଇବାକୁ ଚାହୁଁଛି ଯେ, ପଶୁପତି ଏବେ ଚିରାଗଙ୍କ ସମସ୍କନ୍ଦ ଅଟନ୍ତି। ଏବଂ ଏହା ପରେ ଚିରାଗଙ୍କୁ ନିୟନ୍ତ୍ରଣ କରିବା ସୁବିଧା ହେବ।
ଗତ କିଛି ଦିନ ତଳେ ଚିରାଗ ପାସୱାନ କେନ୍ଦ୍ର ସରକାରଙ୍କ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିକୁ ବିରୋଧ କରିଥିଲେ ଯେପରିକି ସରକାରୀ ଚାକିରିରେ ଲାଟେରାଲ ଏଣ୍ଟ୍ରି ଓ ୱାକଫ ବିଲ। କେବଳ ଏତିକି ନୁହେଁ, ଅନୁସୂଚିତ ଜାତି ଏବଂ ଜନଜାତି କୋଟାରେ ଉପ ବର୍ଗ ଏବଂ କ୍ରିମି ଲେୟାର ଚିହ୍ନଟ କରିବାକୁ ସୁପ୍ରିମକୋର୍ଟଙ୍କ ନିଷ୍ପତ୍ତିକୁ ଚିରାଗ ମଧ୍ୟ ବିରୋଧ କରିଥିଲେ।
ଏଥିରୁ ସ୍ପଷ୍ଟ ଯେ ସରକାରଙ୍କ ନିଷ୍ପତ୍ତିକୁ ବିରୋଧ କରିବାରୁ ଚିରାଗଙ୍କୁ ନେଇ ଭାଜପା ଏବେ ଅସହଜ ମନେ କରୁଛି। ଚିରାଗକୁ ନିୟନ୍ତ୍ରଣକୁ ଆଣିବା ପାଇଁ ପଶୁପତିଙ୍କୁ ପୁରିଥରେ ସକ୍ରିୟ କରିବାକୁ ଭାଜପା ବଡ଼ ଗେମ୍ ଖେଳିବାକୁ ଯାଉଛି। କାରଣ ଚିରାଗଙ୍କ ମାମୁଁଙ୍କ ସହ ପୁରୁଣା ଶତ୍ରୁତା ରହିଛି। ପାରସଙ୍କୁ ବଡ଼ ପଦବୀରେ ନିଯୁକ୍ତ କରି କେନ୍ଦ୍ର ଚିରାଗ ପାସୱାନଙ୍କୁ ଏକ ସ୍ପଷ୍ଟ ବାର୍ତ୍ତା ଦେବାକୁ ଚାହୁଁଛି ଯେ ସେ ସରକାରଙ୍କ ନିଷ୍ପତ୍ତିରେ ଅଧିକ ହସ୍ତକ୍ଷେପ କରନ୍ତୁ ନାହିଁ।
ସୂଚନାତାଉ କି, ଗତ କିଛି ମାସ ଧରି ପଶୁପତି ରାଜନୀତିରେ ସକ୍ରିୟ ହୋଥିଲେ। ଏନଡିଏର ଏକ ଅଂଶ ହୋଇଥିଲେ ମଧ୍ୟ ୨୦୨୪ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଭାଜପା ତାଙ୍କୁ ଗୋଟିଏ ବି ଆସନ ଦେଇ ନ ଥିଲା। ଯାହାକୁ ନେଇ ଯଦିଓ ସେ ନିଜର ଅସନ୍ତୋଷ ବ୍ୟକ୍ତ କରିଥିଲେ, ତଥାପି ସେ ଏନଡିଏର ଅଂଶ ହୋ ରହିଥିଲେ। ତେବେ କିଛି ଦିନ ପୂର୍ବରୁ ସେ ଦିଲ୍ଲୀରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଭେଟିଥିଲେ, ପରେ ତାଙ୍କୁ କିଛି ବଡ ପଦରେ ନିଯୁକ୍ତ କରାଯାଇପାରେ ବୋଲି କଳ୍ପନାଜଳ୍ପନା କରାଯାଉଛି।