ନୂଆଦିଲ୍ଲୀ,୨୮।୯: ଗୁଜରାଟ ନିର୍ବାଚନରେ ପରାଜୟ ଭୟରେ ଏଏପିକୁ ଦମନ କରିବା ଲାଗି ଭାଜପା ଯଥାସମ୍ଭବ ଚେଷ୍ଟା କରୁଛି। ଏମିତିରେ ମିଥ୍ୟା ଅଭିଯୋଗରେ ଦଳର ଯେକୌଣସି କର୍ମୀଙ୍କୁ ଜେଲ ଯିବାକୁ ପଡ଼ିପାରେ ବୋଲି ବୁଧବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କହିଛନ୍ତି। ଦିଲ୍ଲୀ ଅବକାରୀ ନୀତି ମାମଲାରେ ଏଏପିର କମ୍ୟୁନିକେଶନ ଦାୟିତ୍ୱରେ ଥିବା ବିଜୟ ନାୟାରଙ୍କୁ ସିବିଆଇ ଗିରଫ କରିବାର ଗୋଟିଏ ଦିନ ପରେ କେଜ୍ରିଓ୍ବାଲଙ୍କ ବୟାନ ଆସିଛି। ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ମଧ୍ୟ ଏହି ମାଲାରେ ଅଭିଯୁକ୍ତ ଅଛନ୍ତି।
କେଜ୍ରିଓ୍ବାଲ ଦାବି କରିଛନ୍ତି ଯେ, ସିସୋଡିଆଙ୍କ ବିରୋଧରେ ମିଥ୍ୟା ବୟାନ ଦେବାକୁ ତଥା ଏଜେନ୍ସି ଚାପରେ ନଇଁବାକୁ ମନା କରିବା ପରେ ଅବକାରୀ ନୀତି ଘୋଟାଲାରେ ନାୟାରଙ୍କୁ ଗିରଫ କରାଯାଇଛି। ଗୁଜରାଟ ବିଧାନସଭାରେ ପରାଜୟ ଭୟରେ ଏଏପି ଦଳର ନେତାଙ୍କୁ ମିଥ୍ୟା ମାମଲାରେ ଫସାଇବା ଲାଗି କେନ୍ଦ୍ର ସରକାର ୨୪ ଘଣ୍ଟିଆ ଷଡଯନ୍ତ୍ର ରଚିଛନ୍ତି। କାରଣ ନାୟାରଙ୍କର ଉକ୍ତ ଘୋଟାଲା ସହ କୌଣସି ସମ୍ପର୍କ ନାହିଁ। ପ୍ରଥମେ ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜେନାଙ୍କୁ ଗିରଫ କରାଯାଇଥିଲା। ପରେ ଏଏପି ବିଧାୟକ ଅମାନତୁଲ୍ଲା ଖାଁ, ଆଉ ଏବେ ନାୟାରଙ୍କୁ ସମ୍ପୂର୍ଣ୍ଣ ମିଥ୍ୟା ଅଭିଯୋଗରେ ଗିରଫ କରାଯାଇଛି। ଆସନ୍ତା ସପ୍ତାହରେ ସେମାନେ ସିସୋଡିଆଙ୍କୁ ଗିରଫ କରିବାକୁ ଯାଉଥିବା କହିଛନ୍ତି। ଯଦି ଭାଜପା ନାୟାରଙ୍କ ଭଳି ଦଳର ଛୋଟ କର୍ମୀଙ୍କୁ ଗିରଫ କରିପାରେ ତେବେ ସେ କାହାକୁ ବି ଗିରଫ କରିପାରିବେ ବୋଲି ସେ କହିଛନ୍ତି।
