ନୂଆଦିଲ୍ଲୀ, ୩୦।୮ : ଦିଲ୍ଲୀରେ ଚାଲିଥିବା ରାଜନୈତିକ ଆରୋପ ପ୍ରତ୍ୟାରୋପ ମଧ୍ୟରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଭାଜପାକୁ ଟାର୍ଗେଟ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଭାଜପା କହୁଛି ମଦ ନୀତିରେ ଦୁର୍ନୀତି ହୋଇଛି। କିନ୍ତୁ ସିବିଆଇ କହିଛି କୌଣସି ଦୁର୍ନୀତି ନାହିଁ। ଲୋକମାନେ ଭାଜପାର ମିଥ୍ୟା ଅଭିଯୋଗ ଶୁଣୁ ନାହାଁନ୍ତି। ବର୍ତ୍ତମାନ ଭାଜପା ଆନ୍ନା ହଜାରେଙ୍କ କାନ୍ଧରେ ବନ୍ଧୁକ ଧରି ଗୁଳି ଫୁଟାଇବାର ଉଦ୍ୟମ କରୁଛନ୍ତି। ରାଜନୀତିରେ ଏହା ସାଧାରଣ କଥା।
ଆମେ ଯେ କୌଣସି ଯାଞ୍ଚ୍ ପାଇଁ ସର୍ବଦା ପ୍ରସ୍ତୁତ ରହିବା ଉଚିତ। ସିବିଆଇ ଏହାର ସମସ୍ତ ଯାଞ୍ଚ୍ ସମାପ୍ତ କରିଛି। ମନୀଷ ସିସୋଡିଆଙ୍କୁ ୧୪ ଘଣ୍ଟା ଧରି ଜେରା କରାଯାଇଛି। ସିସୋଡିଆ ସିବିଆଇ ପ୍ରଶ୍ନର ସନ୍ତୋଷଜନକ ଉତ୍ତର ଦେଇଥିଲେ। ତାଙ୍କ ଲକରରୁ କିଛି ମିଳିଲା ନାହିଁ। ତାଙ୍କୁ ଅନୌପଚାରିକ କ୍ଲିନ୍ ଚିଟ୍ ଦିଆଯାଇଛି।
ମୁଖ୍ୟମନ୍ତ୍ରୀ କହିଛନ୍ତି, ବର୍ତ୍ତମାନ ସିବିଆଇ ତଦନ୍ତରୁ କିଛି ବି ବାହାରି ନାହିଁ। ଏଥିରେ କୌଣସି ରାଜନୀତି ହେବା ଉଚିତ ନୁହେଁ। ଭାଜପା ଦିଲ୍ଲୀରେ ବିଧାୟକଙ୍କୁ ୨୦ କୋଟି ଟଙ୍କାରେ କିଣିବାକୁ ଚାହୁଁଛି। ସେନେଇ ତଦନ୍ତ ହେବା ଜରୁରୀ। ଯଦି ଆମେ ଏଥିରୁ ପଳାୟନ କଲୁ ନାହିଁ ତେବେ ସେମାନେ କାହିଁକି ପଛଘୁଞ୍ଚା ଦେଉଛନ୍ତି ବୋଲି କେଜରିଓ୍ବାଲ ପ୍ରଶ୍ନ କରିଛନ୍ତି।