ନୂଆଦିଲ୍ଲୀ,୨୮।୧୧(ପି.ଟି.): ୨୦୧୭ରୁ ୨୦୨୧ ମଧ୍ୟରେ ଗୁଜରାଟରୁ ଭାଜପା ସର୍ବାଧିକ କର୍ପୋରେଟ ଚାନ୍ଦା ପାଇଛି। ଏହି ଚାନ୍ଦା ପରିମାଣ କଂଗ୍ରେସ ପାଇଥିବା ଚାନ୍ଦାର ୧୬ ଗୁଣ ବୋଲି ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ପକ୍ଷରୁ ରବିବାର ପ୍ରକାଶିତ ରିପୋର୍ଟରେ କୁହାଯାଇଛି। ଉକ୍ତ ରିପୋର୍ଟ ଅନୁଯାୟୀ ୨୦୧୬-୧୭ରୁ ୨୦୨୦-୨୧ ଆର୍ଥିକ ବର୍ଷରେ ଗୁଜରାଟର ୧,୫୭୧ ଦାତାଙ୍କଠାରୁ ମୋଟ ୧୭୪.୦୬ କୋଟି ଟଙ୍କାର କର୍ପୋରେଟ୍ ଚାନ୍ଦା ଭାଜପା, କଂଗ୍ରେସ, ଏଏପି ଏବଂ ଏସ୍କେଏମ୍କୁ ମିଳିଛି। ସେଥିରୁ କେବଳ ଭାଜପାକୁ ୧,୫୧୯ ଦାତାଙ୍କଠାରୁ ୧୬୩.୫୪ କୋଟି ଟଙ୍କା ମିଳିଥିବା ରିପୋର୍ଟରେ କୁହାଯାଇଛି। ଅନ୍ୟ ପକ୍ଷରେ କଂଗ୍ରେସ ଏହି ସମୟରେ ମାତ୍ର ୧୦.୪୬ କୋଟି ଟଙ୍କା କର୍ପୋରେଟ ଚାନ୍ଦା ପାଇଥିବା ଜଣାପଡ଼ିଛି। ଗୁଜରାଟରେ ନୂଆ ଦଳ ଭାବେ ଉଭା ହୋଇଥିବା ଆମ୍ ଆଦ୍ମୀ ପାର୍ଟି (ଏଏପି)କୁ ୫ ବର୍ଷରେ ମୋଟ ୩.୨ ଲକ୍ଷ ଟଙ୍କା କର୍ପୋରେଟ୍ ଚାନ୍ଦା ମିଳିଥିବାବେଳେ ୨୦୧୭-୨୦ରେ ଆଦୌ ଚାନ୍ଦା ପାଇନାହିଁ।
ରିପୋର୍ଟ ଅନୁଯାୟୀ ଗତ ୫ ବର୍ଷରେ ବିଭିନ୍ନ ରାଜନୈତିକ ଦଳଙ୍କୁ ମୋଟ ୪,୦୧୪.୫୮ କୋଟି ଟଙ୍କାର କର୍ପୋରେଟ ଚାନ୍ଦା ମିଳିଛି। ସେଥିରୁ ଗୁଜରାଟରୁ ଆସିଥିବା ଚାନ୍ଦା ପରିମାଣ ୪.୩୪ ପ୍ରତିଶତ ବା ୧୭୪.୦୬ କୋଟି ଟଙ୍କା। ରାଜନୈତିକ ଦଳଗୁଡ଼ିକ ନିର୍ବାଚନ କମିଶନଙ୍କ ନିକଟରେ ଦାଖଲ କରିଥିବା ତଥ୍ୟରୁ ଏହା ଜଣାପଡ଼ିଛି। ଉଭୟ ଜାତୀୟ ଏବଂ ଆଞ୍ଚଳିକ ଦଳଗୁଡ଼ିକ ମୋଟ ୧୨,୭୪୫.୬୧ ଚାନ୍ଦା ସଂଗ୍ରହ କରିଥିବା ସେମାନଙ୍କ ବାର୍ଷିକ ଅଡିଟ୍ ରିପୋର୍ଟରେ ଘୋଷଣା କରିଛନ୍ତି। ସେଥିରୁ ୮ ଜାତୀୟ ଦଳ ପାଇଥିବା ଚାନ୍ଦା ପରିମାଣ ୧୦,୪୭୧.୦୪ କୋଟି ଟଙ୍କା ବୋଲି ଏଡିଆର୍ ରିପୋର୍ଟରେ କୁହାଯାଇଛି।